InfoHub Logo

Men bir kúni Toqpaq bazaryna bardym. Sebebi, men on jyldaı bir qyz ekeýimiz birge oqydyq. Sol qyz bir kúni túsimde: «Sen jaqynda Qyzarttyń asýyna barýyń kerek. Kisileriń aıtty», — dep aıtqan.

Bazardy aralaı júrip bir qoı aıdaıtyn sart kópeske kezdestim. Osy adamǵa jaldanyp, qoı aıdap Qyzart asýynyń túbinde bir eki-úsh úı otyr eken, sol úıge qasymda taǵy qoı aıdap kele jatqan eki-úsh adamdarmen bir úıge kep túse qaldyq. Kirip kelsek bir adam sarnap, aýyryp jatyr eken. Eger osy adamdy qamshymen bir tartyp jibersem, aýyryp jatqan adam ornynan turyp keter edi. Men qasymdaǵy joldastarymnen uıalyp, urmadym. Osy úıden sýsyn iship, atymyzǵa minip qoıǵa kele jatqanda álgi qyz taǵy: «Áı, Saıaqbaı, nege jańaǵy sorlyny qamshymen bir tartpadyń?» — dedi.

Sodan Qyzarttyń asýynda kún buzylyp, boran bolyp júre almaı qatty qınalyp júrgende álgi qyz taǵy kep aıtty: «Endi, Saıaqbaı, ádeıi shaqyrýmen keldiń, nege? Tapsyrma berse, buljytpaı orynda», — dep. Men: «Jaraıdy», — dedim.

Osydan soń kún ashylǵandaı bop, aman-esen asýdan óttik. Sol kezde bir jaman jerge bir at qulap ketip, sýǵa aqty. «Sol atty aldynan tosyp al» dep maǵan ózimniń qojaıynym aıtty. Men buıryǵyn buljytpaı, ózim sýyq sýǵa ketip qala jazdap júrip, áreń óldim-taldam dep júrip oryndadym.

Budan sol qoıdy ýádeli jerge aıdap kep sarttan aqymdy alyp, qaıtyp esen-aman úıge keldim. Aýylǵa kelgennen soń oılaı júrdim «endi kisilerim ókpelep qaldy-aý, tapsyrma bermes» dep. Joq, bir kúni alys emes, jaqyn jerde bir jas jigit sal aýrý eken. Eki jyl bolǵan eken. Sol jigitti emdeýdi tapsyrdy. Kelsem jigit sarnap jatyr eken. Kelip aqyryp, qamshymmen bir urdym: «ket, báleket, ket!» dep. Sonan osy úıde eki kún boldym. Jigit táýir boldy, basyn kóterip júrip ketti. Qaıtyp úıge keldim, syılyq berip edi, almadym.

Ekinshi jyly taǵy bir tapsyrma berdi. Bul qar erip jatqan ýaqyt edi. Aýyldan shyǵyp júrip kettim. Qolymda taıaǵym bar. Jer buldyraǵandaı bop otyrady. Kórgen jerim emes. Atty kisige keminde eki kúndikteı jer. Taý ishi namazdyger kezinde qoı baǵyp júrgen bir aqsaqaldy úlken qart adamǵa kezdesip, sálem berdim. Ol sálem aldy da:

— Balam, jolyń bolsyn, — dedi.

Men:

— Qudaıy meımanmyn, — dep jaýap berdim.

Qart:

— Jaqsy, balam, onda kún keshkirip qaldy. Anaý jatqan tam jolmen osy qyrdy assań, sol qyrdyń astynda bizdiń úı. Sonda baryp jaılan, shyraǵym, — dedi.

Men sol kisiniń aıtýymen úıdi taýyp, jaıǵasyp, dem alyp tynyǵyp, osy úıde aýyryp jatqan áıeldi emdep bop otyrǵanda álgi shal keldi. Bir qoıdy soıyp, eki-úsh kún jatyp tynyǵyp, aýrý da orynynan turyp táýir boldy.

Qaıtýda eki-úsh kún jol júrip keldim.

---