InfoHub Logo

Birde bul kisi (Tóremurat) Taldytrýba degen jerge jolaýshy bolyp baryp, bir úıge túse qalsa, sol úıde bir top aýyl aqsaqaldary men jigitteri sóz jarystyryp otyr eken.

Sonda sol úıde Alasha Naıman rýynan bir aqsaqal sózge sheshen, tilge júırik, ıakı basqalarǵa qaraǵanda sol úıde sol kisiniń sózi basym bolyp, bir ózi jurtty aýzyna qaratyp otyr eken.

Álgi Tóremurat degen kisi de baryp, úıge kirip otyra qalady. Bul kisi ózi iri bolyp kelgen, keń jaýyryndy sary kisi bolǵanymen, eshqaısysy elemeıdi. Sonda turyp álgi aqsaqal bylaı dep áńgimeni baıandaı bastaıdy:

— Biz munda Syr boıyna ótken jyly barǵanymyzda mynadaı bir qyzyq kórdik, — deıdi, — ol jaqtyń jigitteri óte iri bolady. İriligi sonshalyq — alty jasta atanǵa mingende aıaqtary jerge túsip, jer tirep, salbyrap júredi eken, — degende, sol úıdegi kisiler ne derin bilmeı, bir-birine qarap tańdanyp qalady. Sonda álgi kelgen Tóremurat degen kisi esik jaqta otyryp bylaı deıdi:

— Iá, ol ras, aqsaqal durys aıtady. Myna biz ótken jyly kúz aıynda sol Syr boıyna toıǵa kókpar tartýǵa baratyn bolyp, on attyly attandyq. Sonda jolda bara jatqan kezde bir jerge qonaǵa jatatyn bolyp, attardy shiderlep, elsiz jerde qondyq. Bir kezde tún jarym bolǵan eken, jaýyn jaýyp, kıimderim sý bolypty. Ústimde [kıimim] juqa edi. Al sol kezde qarasam, oń jaǵymda bir úlken in tur eken. Soǵan bardym da jatyp, rahattanyp uıyqtap, dem aldym. Tańerteń qarasam, bireý meni jerge shalp etkizip alyp urdy. Ornymnan turyp qarasam, túndegi in dep júrgenim Órisbaı degen aǵamnyń etigi eken, — depti.

Sonda turyp álgi aqsaqal qarıa shal bylaı depti:

— Túý, ishiń jarylǵyr, balam, ótirikti adam eptep aıtady. Al myna sen syqyldy dáý sary jigit adamnyń etiginiń qonyshyna sıa ma? — degende, álgi turyp:

— İshińiz jarylsa, qaq bólinsin. Neshebir úlken jigit bolǵanmen, alty jasar atannan aıaǵym jerge tımeıdi, — dep álgi kisini sózden toqtatqan eken. Úı ishindegiler endi baryp, bul kisige syı-qurmet kórsetip, ózderi uıalys taýypty.

---