InfoHub Logo

Birde áıeli Qojamen janjaldasyp, úıinen tura qashady. Qoja qolynda uzyn taıaǵy bar, tas-talqan bop ashýlanǵan:

— Senen kórgen qorlyǵym jetti. Otyz jyldan bergi óshimdi bir alyp, kók ala qoıdaı qylyp sabamasam ba, bálem. Sonsoń baratyn jerińe bara ber! — dep, aqyryp sońynan qýyp beredi.

— Musylmandar-aý? Mynaý dúleı jyndandy bilem, arashalańdar, oıbaı, — dep áıeli úıdi aınala qashady.

Kórshi úıde toı bolyp jatsa kerek. Aıǵaı-shýdy estip, jurt syrtqa dúrlige shyǵady. Qojanyń áıelin áıelder otyrǵan bólmege kirgizip, Qojaǵa «ashýyńdy bas» dep, basalqy sózder aıta bastaıdy:

— Qojeke, qoı! «Qatynnyń shashy uzyn, aqyly qysqa» degen emes pe? Al, erkekterdiń jóni bir basqa. Qazy, ǵulama degen atyń bar. Bizdiń bireýimiz óstisek, óziń jón aıtýǵa tıissiń. Uıat qoı munyń.

Úı ıesi sózge aralasady:

— «Igiliktiń erte-keshi joq» degen. Túý basta seni toıǵa shaqyrmaǵanym — kileń jastar jınalar, otaǵasyna kóńilsiz bolar, dep oılap edim. Mine, endi «biter istiń basyna — jaqsy keler qasyna» dep, ózińdi Qudaı aıdap ákeldi. Úıge kir, tórge shyq. Úı-ishi bolǵan soń ydys-aıaq shyldyramaı tura ma, oqasy joq qazir-aq tatýlasasyńdar.

Bul sózdi estigen soń Qojanyń ashýy biraz basylaıyn dese kerek. Úıge kiredi. Ystyq tamaq bergeli jatqan mezgil eken, jurt qol shaıyp, dastarqan basyna otyrysady. Qoja áıelimen qalaı ursysyp qalǵanyn aıtady, jurt shek-silesi qatyp, qyran kúlki bolady. Olar kúlkiden esin jınaǵansha, Qoja tátti palaýdy apyl-qupyl asap, qyzyl óńeshten ári asyra beredi.

Tabaqtyń bergi jaǵyn oısyratyńqyrap tastap:

— Munda panalap, janyń qaldy bilem, áıtpegende qolyma ilikseń, sen saldaqyny shashyńnan súırep, myna tabaqtaı shyr kóbelek aınaldyrar edim, — dep Qoja tabaqtyń arǵy toly jaǵyn ózine qaratyp alady da, taǵy da qos qoldap asaı bastaıdy.

Otyrǵandar áli de kúlkiden shek-silesi qatyp:

— Qojeke, ashý ústinde de ázil-qaljyńyń qalmaıdy eken, — dep qolpashtap qoıady.

Aqyry tátti-dámdi taǵamdar jelinip bolǵan soń, kúreń shaıǵa qanyp alǵan Qoja kóńili shat, jaılanyp otyryp qonaqtarǵa taǵy da bir syr shertedi:

— Myrzalar, kórshimniń toı jasaǵaly jatqanynan habardar edim, biraq meni toıǵa shaqyrǵan joq. Toıǵa arnap túrli tátti-dámdi taǵamdar, onyń ishinde meniń jerik asym — maıly palaý da pisirilip jatqanyn bilip otyrdym. Sonsoń báıbishemiz ekeýmiz keńesip, toıǵa barýdyń jolyn qarastyrsaq, ótirik janjaldan abzaly joq eken. Áıtpese, ınshalla, ázir báıbishemmen tús shytysyp kórgen adam emespin. Báıbisheme aıtyńdarshy, úıge qaıtatyn ýaqyt boldy. Al, ózderiń toıdy odan ári qyzdyra berińder, — depti Qoja.

Toıǵa kelgen jurt Qojanyń osyndaı bir tapqyrlyǵyna taǵy da tań qalypty.

---