InfoHub Logo

Kereı Bárdáýletuly Jánibek batyr qasyna nóker ertip Altaıǵa baryp, qonys shalyp qaıtady. Tarbaǵataı taýynyń ústirtimen sýyt júrip otyryp Qarǵyba ózenine jetedi. Qarǵybanyń basyna qosyn tigip aıaldaıdy. Ol ýaqytta bul jerdi Qarakereı Muryn eliniń jýany Janaı aýyldary qonystap, ıemdenip alǵan. Olar Jánibek batyrdy basa-kóktep, kıligip qonǵanynan kúdiktenedi. «Jánibektiń myna qonysy jaı bolmas, kóshir!» — deıdi Shegirge aǵalary. Shegirdiń jasy jıyrmanyń jýan ortasynda, myqty, batyr bolam dep júrgen kezi eken.

Shegir aq berenin kıip, qolyna naızasyn alyp attanady. Sol betimen Jánibek batyrdyń qosyna keledi. Jalǵyz attyny dúbirinen bilip Jánibek batyr:

— Áı, kim de bolsań attan tús, beri qosa kir! — dep daýystaıdy qostyń ishinen.

Jánibek batyrdyń jyly lebizin estip, Shegir sabasyna túsip sabyr qylady. İstiń aqyryn nasyrǵa shaptyrmaıdy.

Shegir qosqa kirip jaıǵasady. İship otyrǵan tańerteńgi shaıynan Jánibek oǵan shaı usynyp, syılaıdy. Shegirdiń tekten tek júrmegenin suńǵyla Jánibek batyr ishteı sezedi. Kelgen jón-josyǵyn suraıdy. Áýel basta «qýam, kóshirem» — dep kelgen betinen qaıtyp:

— Sizdi erýlikke shaqyryp keldim, — deıdi Shegir.

Aldymen Jánibek batyr osy qonǵan jerin sóz etip, myna shýmaqty aıtqan eken:

— Asan-qaıǵy izdegen
Jerdeı eken balmuzdaq.
Talasady bul jerge
Dáti shydap qaı qazaq…

Osylaı Tarbaǵataıdyń jerin maqtap, onda áıgili Qarakereı Qabanbaı, Muryn Boranbaı batyrdyń eli otyrǵanyn aıtady. «Al biz jer jannaty Altaıǵa kóshpekshi bolyp kelemiz». — deıdi Shegirge. Sodan soń Shegirdiń ózin synyp:

— Batyrlyqqa tán bitken
Nusqasy bar boıynda.
Jaýǵa týra kezengen
Naızasy júr qolynda.
Kórerme edi ózińdi
Jeke shyqqan shaıqasta, —

dep, naızanyń ushyn túırep, qas jaýyn jekpe-jekte jaıratpaı, batyr ataǵy shyqpaıtynyn aıtqan eken. Endi qonaq bolý jaıyna kóship:

— «Rızyq aıdap, dám tartsa, barmaıyn degen jerine adam balasy úsh barady» deýshi edi. Qudaıym, rızyǵymnan aıyrmasyn, úıińe baryp, dám-tuzyńdy tataıyn, — dep rızalyq peıilin bildiripti.

Sol joly Kereı Jánibek batyr Shegirdiń úıine qutty qonaq bolady. Shegirdiń jambasymen súıretilip eńbekteıtin Kúnpeıis degen ulyna qolymen et asatady. Onyń budan bylaı aty «Jambas» bolsyn dep Jánibek batyr qaıtadan at qoıyp bata beredi. Sodan keıin:

— Kelin júkti, ekiqabat eken, ul tabady. Atymdy berdim. Atyn Jánibek qoıyńdar, — dep tapsyrady.

Aman-esen Jánibek týady. Keıin onyń Dýan degen balasy eldi bılep, bolys bolady. Kereı Jánibek batyrdyń bergen batasy Jambas ataǵa da daryp qonady. Jambas ári baı, dáýletti, ári kisilikti, áýletti bolady. Jambastyń báıbishesi 50 jasynda ul tabady. Atyn Ybyraı qoıady. Ol on bes jasynda atqa minip rý basy — starshyn bolyp saılanypty. Sóıtip, Jambastyń bes balasy — bes aýyl bolypty.

Oqýǵa keńes beremiz:

Jalańtós batyr

Elshibek batyr týraly

Berdiqoja (İ nusqa)

---