InfoHub Logo

Elordada ótip jatqan «Mektep álemin ózgertetin - ustazdar» halyqaralyq konferensıasynda álemdegi barlyq pedagogtardy tolǵandyratyn máseleler talqylandy.

Alqaly jıynda álemniń túkpir-túkpirinen jınalǵan eki myńnan astam pedagog bas qosty. Shetelden kelgen sarapshylar ózderiniń avtorlyq eńbekterin usynyp, zamanaýı bilim berý, bolashaq urpaqty oqytýda tıimdi tetikterdi paıdalaný, pedagogıka salasynyń keleli máseleleri taqyrybynda jazylǵan kitaptaryn tanystyrdy.

«Men eńbek jolymdy daryndy balalarǵa arnalǵan mektepte sabaq berýden bastadym. Jumys barysynda bilimdi urpaq tárbıeleý úshin bilim júıesine ózgerister engizý kerek ekenin túsindim. Bilim berý – adamdar oılap tapqan proses», - deıdi Izraıldegi Beıt Berl kolejiniń aǵa oqytýshysy Ioram Harpaz.

Ol muǵalim sóılep, oqýshynyń tyńdap otyrýy ótken ǵasyrlarda qalyp qoıǵan tásil ekenin aıtty.

«Oqýshy alǵan bilimin emtıhan kezinde aıtyp, odan keıin umytyp qalatyn kezeńnen de ótip kettik. Bul tásilmen oqytqan kezde «Jaman oqýshy oqyǵanyn emtıhan tapsyrýǵa bir mınýt qalǵanda umytyp qalady, jaqsy oqýshy oqyǵanyn emtıhan tapsyrǵannan keıin bir mınýt ótken soń umytady» degen ázil bolǵan. Aqyl-oı men mıdy áldenemen toltyrylýy tıis bos ydysqa teńeýge bolmaıdy. Bilim berýdiń maqsaty – sol ydysty bilimmen toltyrý deıdi. Bul da – eski júıe. Biz oqýshylarǵa bilimniń emtıhannan keıin esten shyǵaratyn nárse emes, ómirlik tájirıbede qoldanylatyn qural ekenin úıretýimiz kerek», - deıdi Ioram Harpaz.

Shara barysynda Kembrıdj ýnıversıtetiniń bilim berý ınovasıalary ortalyǵynyń dırektory Kollın MakLaflın, Izraıl Beıt Berl kolejiniń aǵa oqytýshysy Ioram Harpaz, KidZania halyqaralyq bilim berý baǵdarlamalarynyń dırektory, balalar aldyndaǵy eńbegi úshin Brıtan ımperıasy ordeniniń qurmetti ofıseri Ger Graýs sıaqty belgili sarapshylar men ǵalymdar baıandama jasady.

---