InfoHub Logo

Jaıshylyqta daryndy erdi bilmeısiz,
Keıde kózge ilemiz de, ilmeımiz.
Ómir ótip, el eskerip jatsa eger,
Sonda ǵana qasymyzda júr deımiz.

Júreginde sımfonıa oınaǵan,
Al mıynda myń másele qaınaǵan –
Saǵan búgin kelip otyr qaýmalap,
Óner degen rýlasyń – aınalań!

Elge tarap jatyr qansha jazǵanyń,
Án de bolyp, ánshi de bop mazdadyń.
Sazger de bir – kenshi, taýdy qoparǵan!
Qazyna bop elge jetsin qazǵanyń!

* * *

Men buryn syrttaı ǵana tanýshy edim,
Ǵıbrat minezińnen alýshy edim.
Qoldaǵan Qyzyr ata Azamat dep,
Sońyńnan uzaq qarap qalýshy edim.

Syılastyq keıinirek ózińizben,
Aqyldy nur tógildi kózińizden!
Taǵdyr birte-birte tarta berdi,
Sóılemi bir qaralyq sózińizben!

Sózińmen tanystym da qulaı berdim,
Tórt jaǵy túgel beıne Qudaı kórdim:
Boıynda bar eken dep jan-jaqtylyq,
Shımaılap jer-jahandy suraı berdim-
Men Sizge ................. qulaı berdim!

Qulatqan qudaı shyǵar kim biledi,
Qalasa jylatady, kúldiredi...
Alataý men Qarataý qosylǵandaı,
Arada arý-senim úlbiredi.

* * *

Bilem sende bir kıeniń barlyǵyn,
Kórdim ómir keńdigi men tarlyǵyn.
Qazyǵurttyń taýlarynan daryǵan,
Bolmysyńa saqy minez, arly uǵym.

Ótken kúnder kózdi arbaǵan, qaryǵan,
Keleshegin armandaıdy ár ulan.
Saǵym belde qozy baǵyp júrgende,
Sary adyrdan sabyrlylyq daryǵan.

---