InfoHub Logo

Jákish aıaǵyn yqylassyzdaý basyp keledi. Osylaı qaraı júrse, betinen oty shyǵady. Qulaǵy qyp-qyzyl bolyp ketedi. Aýlaǵa kire berip, moınyn sozyp qoraǵa qarady. Rysbaı ataı shóp úıip jatyr eken, janyna bardy.

— Deniń saý ma, balam!

— Shúkir, ata, aıyryńyzdy bere turyńyzshy, men-aq laqtyryp tastaıyn.

— Kóp jasa, qarǵam, ózim de úıem ǵoı.

Qarttyń sheshek sekpildegen betinen ter tamshylap tur.

— Ata, berińizshi, siz demala turyńyz.

— Kóp jasa, qarǵam! Kúshiń keler me eken?

— Keledi.

Jákish ıisi muryn jaratyn jap-jasyl sýdyraǵan pishendi ilip laqtyra berdi. Boıy bıikke erkin jetpese de, shópti eńserip tastady. Denesi terlep qoıa berdi. Moınyna shóptiń úgindisi túskenine de qaramady. Anadaı jerde dóńgelek júgirtip Báıken ótip barady.

— Kel-eı, ataıdyń shóbine qolǵabys eteıik, — dedi aıqaılap. Anaý qolyn bir siltep kete bardy. Sońǵy aıyr pishendi de tóbege shyǵardy.

—  Kóp jasa, qaraǵym, jigit ekensiń, Tý-ý, terimdi qurǵatyp, demalyp qalǵanymdy qarashy! — dedi Rysbaı ataı balany basynan sıpap. Jákish arsalańdap kúle berdi.

— Ata, kómek kerek bolsa shaqyra qoıyńyz. Qashanda bas tartpaımyn. Ózimniń kúshim jetpese, mekteptegi balalardy alyp kelem.

— Kóp jasa, qaraǵym, Birimjanǵa tartqan ekensiń, — dedi qart rıza bolyp.

---