InfoHub Logo

Shymkent qalalyq bilim bóliminiń basshysy Janat Tájıeva jumysqa tegin turý neǵaıbyl ekenin jasyrmaıdy. Ol bul týraly oıyn bilim salasyndaǵy jańa jobalardy júzege asyrýǵa arnalǵan kezdesýde aıtyp berdi, dep habarlaıdy NUR.KZ.

Shymkentte respýblıkada alǵash bolyp bilim salasyna qatysty tórt jobanyń tanystyrylymy ótti. Endi ata-analar úıinde otyryp-aq balalaryn balabaqsha men mektepke ınternet arqyly kezekke turǵyza alady. Ol úshin bilim bóliminiń resmı saıtyna kirýi qajet. Kezekke turýshylar bala men ata-ananyń JSN engizip, elektrondy poshtasy jáne telefon nómirin jazsa boldy. Bul júıe arqyly ata-ana balabaqsha ne mektepti turǵylyqty mekenjaıy boıynsha tańdap, tipti ol bilim mekemesi týraly keńinen aqparat alýǵa múmkindigi bar.

«Bilim júıesin avtomattandyrý» taqyrybynda ótken kezdesýde odan ózge oqýshynyń sabaq úlgerimi men sabaqqa qatysqany týraly málimetti elektrondy baqylaý júıesi de tanystyryldy. Taǵy bir aıta keterligi, jańa jobalardy tanystyrý barysynda muǵalimderdi elektrondy túrde taǵaıyndaý júıesi de sóz boldy. Iaǵnı, endi aldaǵy ýaqytta kez kelgen maman ákimdiktiń resmı saıty arqyly bos jumys oryndaryna ótinish qaldyryp, tipti onlaın-test arqyly jumysqa ornalasa alady. Olardyń biliktiligin arnaıy komısıa baqylap otyrady. Qalalyq bilim bóliminiń basshysy Janat Tájıevanyń aıtýynsha, mundaı elektrondy júıeler sybaılas jemqorlyqtyń aldyn alýǵa úlken kómegin tıgizedi.

«Bul korrýpsıanyń aldyn alý ǵoı. Osy máseleniń barlyǵy biz úshin jańalyq bolyp otyr. Al álemdik standartta tájirıbege enip qoıǵan. Shymkentte «elektron» dese tyrqyldap kúledi sheteldikter, Máskeýdiń ózi kúledi bizge. Bul bizdiń alǵa qaraı jyljyp jatqanymyzdyń dáleli. Ashyqtyqqa kelip jatqannyń dáleli», - dedi Shymkenttiń bas pedagogy.

«Jasyratyny joq bizde jumysqa turý aqshamen, tegin tura almaısyń. Maǵan kelesiń, Janat ápke, meni tanısyz ǵoı, ápkem matematık, ornalastyryńyzshy» deısiń... Durys pa? Al bul júıede olaı demeısiń. Kompúterge tirkelesiń, bul jaqsy ǵoı», - dedi Tájıeva hanym.

Bilim bóliminiń basshysy bul jańa jobalardy synaýshylardyń bolýy múmkin ekenin joqqa shyǵarmady.

«Synaýy múmkin, jaman deýi múmkin. Iá, kemshilik bolady. Men aıta almaımyn kúshti bop ketemiz dep. Súrinemiz, biraq bir nátıje shyǵaramyz» dep sózin túıdi Tájıeva. Aıta keteıik, resmı túrde tanystyrylymy ótken jobalarǵa 42 mln teńge qarjy jumsalǵan.

---