Sypaıy tońbas, qaltyrar
Baıaǵyda Qalshabaı degen sypaıy kisi bolǵan eken. Ol bir joly sapar shegip kele jatyp, bir úıge qonady. Qara kúz, kún qytymyr sýyq bolsa kerek. Alaıda Qalshabaı sypaıy, jeńil-jelpi kıingen eken. Onyń ústine, álgi úıge ol keshtetip, el orynǵa otyrǵan kezde keledi.
Qonaq úı ishimen amandasady, jón surasyp bilisedi. Úı ıesi ázilkesh adam eken. Ol sypaıyny bir synaıyn degen oımen:
— Sypaıy, qazan kóterýge kesh. Qaýyn-qarbyz jep jatatyn bolarsyz! — deıdi.
Sonda Qalshabaı:
— Tamaǵym toq, sýsyndyqqa qaýyn-qarbyz da jetedi ǵoı, — deıdi.
Qaýyn-qarbyz jep bolǵan soń úı ıesi:
— Qalsha-eke, atyńyzǵa kóz-qulaq bolyp, dalada jatatyn bolarsyz? — depti.
— Iá, dalada jatqanym teris bolmas, — deıdi Qalshabaı.
— Biraq kórpe-tósek jaǵynan uıattymyz...
— Oqasy joq. Eshteńe kerek emes. Óz kıimim jetedi ǵoı, — dep sypaıygershilik etedi...
Tún ortasynda úı ıesi syrtqa shyǵady. Er-toqymnyń syldyrlaǵan únin estıdi. Baıqasa, Qalshabaı tońǵan soń ústin er- toqymdarmen bastyryp, qaltyrap jatyr eken.
— Sypaıy tońbas, qaltyrar! — depti ázilkesh úı ıesi kúlip.
«Sypaıy tońbas, qaltyrar» degen mátel sonan qalǵan eken.
You Might Also Like
-
Ataqty Móńke bıdiń qartaıǵan kezi eken. Janynda eki atqosshysy bar, jasy on altydan jańa asqan turymdaı músindi, qyrǵı tildi qara bala úıge ruqsatpen kiripti.
-
Atam bir ertegi bastady. Bárimiz uıyp tyńdadyq. Búgingi aıtqan ertegisi bala qyran týraly edi. Qolǵa úıretilgen bala qyran ań aýlap, bir eldi asyraǵan mergenniń senimdi serigi, aınymas dosynda...
