InfoHub Logo

«Syr eli - jyr eli. Nurtýǵan aqynnyń murasy».
Sabaqtyń maqsaty: Syr eli - jyr eli taqyrypty jalǵastyra otyryp, Nurtýǵan jyraýdyń shyǵarmashylyǵymen tanystyrý, termesin jattaý.
Bilimdilik: Nurtýǵan jyraýdyń ómirbaıanymen tanysyp, terme-tolǵaýlary arqyly oqýshylardyń bilim-tanym qasıetterin arttyrý.
Damytýshylyq: Oqýshylardyń yrǵaqty seziný, oryndaý, estý arqyly tyńdaı bilý qabiletterin damytý, án aıtý, vokaldyq qabiletterin damytý.
Tárbıeshilik: Halqymyzdyń mýzyka ónerine súıispenshiligin oıata otyryp, ulttyq ónerge tárbıeleý.
Halqymyzdyń mádenı muralaryn urpaqtan urpaqqa jetkizý.
Sabaqtyń túri: aralas sabaq.
Sabaqtyń ádis - tásilderi: suraq - jaýap, problemalyq sıtýasıa, zertteý,
áńgimelesý, oıyn, shyǵarmashylyq jumys.
Pánaralyq baılanys: ádebıet, tarıh
Sabaq kórnekiligi: Nurtýǵan jyraýdyń portreti, terme qurastyrý úlgileri, jyraýlar portretterine jasalynǵan býklet, jyrlar turaly ádebı oqýlyqtar, jyraýlardy beınelegen qolmen salynǵan sýret - ılústrasıa, suraqtary bar úlestirme qaǵaz,
«Oqýshylar shyǵarmashylyǵy»- bolashaq kitapsha jınaǵynyń muqabasy.
Tehnıkalyq quraldar:
mýzykalyq sentr, teledıdar, beınemagnıtofon,
beınetaspa, úntaspalar, fortepıano aspaby.
Sabaqta qoldanatyn mýzykalyq shyǵarmalar:
1. Turmaǵambet jyraýdyń beınetaspaǵa jazylǵan «Tálim» termesi, E. Jańabergenovanyń oryndaýynda
2. Nurtýǵan jyraýdyń úntaspaǵa jazylǵan «Qanekı, tilim, sóıleshi» termesiniń 2 nusqasy E. Jańabergenovanyń oryndaýynda jáne R. Rymbaevanyń oryndaýynda.
3. «Qanekı, tilim, sóıleshi» termesiniń úntaspaǵa jazylǵan ınstrýmentaldyq
aranjırovka (fonogram)
4. «Jyr jazamyn júregimnen» Ǵ. Jubanovanyń shyǵarmasy (shyǵarmashylyq jumysynyń fon - mýzykasy)

Sabaqtyń barysy:
İ. Uıymdastyrý kezeńi, balalardy túgendeý, sabaq taqyrybyn aıtyp, maqsatyn qoıý.
- Balalar, qazir sender beınekórinisti tamashalaısyńdar. Nazarlaryńdy aýdaryp, zeıin qoıyp tyńdańdar. /beıne kóriniste Turmaǵambet jyraýdyń «Tálim» termesi, Elmura Janabergenovanyń oryndaýynda/
- Balalar, tyńdaǵan shyǵarma qandaı shyǵarma túrine jatady?
- Iá, bul terme
- Kimniń termesi? Qalaı atalady?
- /Turmaǵambet jyraýdyń «Tálim» termesi/
- Beınekóriniste termeni oryndap turǵan - ataqty ánshi, qazirgi zamanymyzda termelerdi oryndaıtyn jyrshy E. Jańabergenova. /dápterge jazyp alý /
- Termeniń mazmuny ne týraly?/jaýap/
- Turmaǵambet aqyn qaı jyraýlyq mektepshiliginiń ókili?
- /Syr boıyndaǵy mektepshilikke jatady/
- Nege biz «syr eli - jyr eli» deımiz?
- Syr boıyndaǵy eldi mekennen kóptegen ataqty jyraýlar shyqqan jáne jyraýlyq mektepshilik óte damyǵan.
- Osy mektepshiliktiń ereksheligi nede?
- kómeıimen aıtý mánerinde
- Al, terme degen ne?/jaýap/
- Jyraýlardyń sol zamanda atqarǵan mindetteri nede?/jaýap/
- Sondyqtan, jyraýlardy kim deýge bolady?
- Aqyn, sheshen, oryndaýshy, ustaz, fılosof.
- Termeden biz ne alamyz?
- tálim, tárbıe, úlgi...

İİ. Endeshe, búgingi sabaqta Syr eliniń taǵy bir ataqty jyraýynyń biri Nurtýǵan aqynnyń ómirbaıanymen tanysyp, «Qanekı, tilim, sóıleshi» termesin taldap, aıtyp úırenemiz./Dápterge taqyrypty jazý/
- Men senderge aldyn ala Nurtýǵannyń ómiri týraly zertteý jumysyn bergenmin. Kim oqıdy? Túıinin ǵana oqyndar. /okýshylar daıyndaǵan málimetti qysqa ǵana oqıdy /
- Iá, balalar, Nurtýǵan HİH ǵ. ómir súrgen, Aral óńirinen shyqqan ataqty jyraý, ári oryndaýshy - jyrshy ekeniń bildik. Óziniń sońyna kóptegen terme - tolǵaýlar men jyr - dastandar jazyp qaldyrǵan. /jaýap bergen balalardy baǵalaý /
- Búgingi sabaqta osy jyraýdyń ataqty termesimen tanysyp, mátinin taldap, aıtýyn úırenip, termeni oryndaýǵa mashyqtanamyz.
/ osy jerde kitaptaǵy «Qanekı, tilim, sóıleshi» termesiniń sózderin ashyp, mátinmen taldaý jumysyn jasaý /- Terme ne týraly? /jaýap /
- Balalar, kázir biz osy termeniń 2 nusqasyn eki ánshiniń oryndaýynda tyńdaımyz. Aldyn ala mynandaı suraktar qoıamyn:- Termeniń 2 nusqadaǵy oryndaý máneri qandaı, salystyrý kerek?
- Oryndaǵan ánshiler senderge tanys pa?
/Úntaspaǵa jazylǵan «Qanekı, tilim, sóıleshi» termeni E. Jańabergenovanyń ulttyq aspaptar orkestrdiń súıemeldeýimen oryndaýynda jáne osy termeni ataqty ánshi - Qazaqstannyń halyq ártisi Roza Rymbaevanyń oryndaýynda tyńdatqyzý /Oqýshylar jaýap berip, dápterge termeni oryndaǵan ánshilerdiń attaryn jazyp alady/

İİİ. Endi biz sabaǵymyzdyń negizgi bólimine kóshemiz. Termeni jattap, oryndaýǵa mashyqtanamyz. Aldyn ala daýysymyzǵa jattyǵýlardy jasaımyz. Aldylaryndaǵy taqtaǵa jazylǵan termeniń sózderine nazar aýdaryp kóreıik. /oqýshylarǵa jattaý jumysyn júrgizgende dybysyn joǵary jáne tómen baratyn jerlerin kórsetý, áýenin úıretý, qıyn jerlerimen jumys jasaý / Bir ret aspappen tez ekpinde oryndatý. Sodan keıin, jazylǵan ınstrýmentaldyq aranjırovkamen (fonogrammen) aıtqyzyp kórý.
- Balalar, biz búgin qaı jyraýmen, qaı shyǵarmamen tanystyq?
- Nurtýǵan aqyn qaı óńirden shyqqan, qaı ǵasyrda ómir súrgen?
- Aqynnyń qaı shyǵarmasymen biz tanystyq?

İV. Sabaǵymyzdy ári qaraı jalǵastyra otyryp shyǵarmashylyq jumysqa kóshemiz.
Búgin sender aqyn - jyraýlardyń izimen oılaryndy órbitip, ózderinde aqyn, jyraý bop sezinip kórinder.
1 - shi toptyń jumysyn « Bolmasań da uqsap baq...»
2 - shi toptyń jumysyn « Bir úzik syr...» dep atadym.
- Aldylaryndaǵy termeni qurastyrý úlgileri 3 nusqada. 1 - shi toptaǵy «aqyndar» bir nusqa tańdap alyp termeni qurastyryp kóredi.
2 - shi toptaǵy balalar «qazirgi zamannyń jyraýlary» bolyp óz oılaryn tolǵatady. Taqyryby: qazirgi zamannyń jyraý neni jyrlaıdy?
/ balalardy topqa bólip, arnaıy paraqtardy taratamyn, olar jumysqa kirisedi. Sol ýaqytta baıaý fon - mýzykany qoıamyn - Ǵazıza Jubanovanyń « Jyr jazamyn júregimnen» atty shyǵarmany. Oqýshylar jumystaryn bitirgennen keıin tekseremin. Ár bir nusqadan bir - eki baladan tyńdap, qorytyndy shyǵaryp, jumystaryn jınap alamyn./
- Balalar, búgingi senderdiń shyǵarmashylyq jumystaryńdy biriktirip mynandaı kitapsha shyǵaramyn /balalar jazǵan paraqtardy jınap, daıyn muqabamen birge steplermen bekitip kitapshany kórsetý /

V. Sabaǵymyzdyń qorytyndysyn shyǵarý úshin men senderge taratyp bergen jeke úlestirme qaǵazdaǵy suraqtarǵa nazar aýdaraıyq. Qandaı suraqtardy kórip otyrsyńdar:
ne bildik, ne úırendik, ne belgilerin, úırengileriń keledi. Osy suraqtarǵa qysqa jaýap beremiz. / jaýaptaryn tyńdap, qorytyndy jasaý /.
Sabaqqa jaqsy qatysqan balalarǵa baǵa qoıyp, úıge tapsyrma berý: termeni jattaý,
Syr eliniń jyraýlary týraly málimetterdi qaıtalaý, Nurtýǵan aqynnyń ómiri týraly oqyp mazmundap kelý.
- Osymen bizdiń sabaǵymyz aıaqtaldy, saý bolyńyzdar!