InfoHub Logo

Syrym jasynda astynda tulpardan týǵan tory tóbel aty bar jalǵyz kele jatsa, sáske túste Jaıyqtyń arǵy tusynda Nuraly han qusbegileri, bıleri, ańshylarymen seıilde ań aýlap júr eken. Syrym bulardy kórgen soń: «Bul júrgender Nuraly hannyń ańshylary bolar, tildeseıin», — dep burylyp kelip Nuraly hanǵa sálem beredi. Sol kúnde Syrym batyr on segiz jasynda eken.

— Sen qaı tuqymsyń? — depti Nuraly. Sonda Syrym:

— Qydyrqojanyń balasy — Sultan Sıyq, onan týǵan — Baıbaqty, Baıbaqtydan Sholan, Sholannyń balasy — Dat, Dattyń balasymyn, atym — Syrym, — deıdi.

Sonda Nuraly turyp:

— E, Qudıardyń kóp tenteginiń tuqymy ekensiń ǵoı, — depti.

Syrym:

— Saqbar sýynyń boıyndaǵy áńgi tóreniń tuqymy ediń-aý! Seniń de tuqymǵa kúlgeniń be? — dep, atynyń basyn buryp alyp jónine júre beripti. Sodan Nuraly han bir tóbeniń basyna shyǵyp, bılerin, ańshylaryn shaqyrtypty. Bıler, ańshylar qasyna kelgende, Nuraly:

— Bıler, sizderdi mezgilsiz shaqyryp turmyn. Shaqyrǵanymnyń mánisi — anaý ketip bara jatqan qazaqtyń bir bozbalasy kelip, sóılesip turǵanda baıqasam, kóziniń bir tamyry úsh taraý bolyp bólingen eken, munan ne shyǵar eken dep sózben shabyna túrtip qoıyp em, oıymda «keıin sheginer me eken» degen edim, sheginbedi, qaıta ózime qarsy umtyldy. Naızamnyń ushyn burap ketti. Bıler, sol bala kim boldy? — dep, qasaqana qaıta surapty. Sonda bıler óz rýyndaǵy pysyq jigitterdi atap, pálenshe bolar, túgenshe bolar dep bári de jigitterin aıta bastapty. Sonda alasha Altaı degen kisi turyp:

— Taqsyr, bórkińdi alshysynan kıgizip ketti me? Ol áli kúnine jetpeı kele jatyr, kúnine jetse, bórkińdi qyrynan da kıgizer, qyrqyp ta kıgizer... onyń aty Syrym bolar... — depti.

---