InfoHub Logo

Qazaqstannan 1941-1945 jyldardaǵy qandy qyrǵynǵa 1,5 mıllıon ul men qyz attanypty. 600 myńnan astam qazaqstandyq bul soǵystan oralmady. 500-den astamy elge Batyr atanyp, ańyzǵa aınala oraldy.

Bul soǵysqa Qazaqstan Keńester Odaǵynyń bir bóligi retinde qatysty.

Qazaqstan soǵys ýaqytynda maıdan qajetine qaraı beıimdeldi. Kóptegen áskerı dıvızıalar men brıgadalar, artılerıa, mınomet, avıasıa polkteri jáne derbes batalóndar quryldy. Qazaqstan jaýyngerleri keńes-german maıdanynyń sheshýshi shaıqastaryna qatysty.

Qazaqstan 1942 jyldyń jazynda Stalıngrad shaıqasynyń eń jaqyn tylyna aınalyp, soǵys qımyldaryna Batys Qazaqstandaǵy temir jol stansalary men eldi mekender keńinen tartyldy.

Qazaqstandyqtar partızan soǵysyna da belsene qatysty. Lenıngrad oblysyndaǵy shaıqastarda — 220, Smolensk jerinde — 270-ten astam, Ýkraına men Belorýssıada — 3000-daı qazaqstandyq erlik kórsetti. Bulardyń ishinde Q.Qaısenov, Ǵ.Ahmedıarov, B.Jangeldın, Á.Sháripov, N.Baıseıitova men T.Jumabaeva, J.Saın, Ǵ.Omarov sıaqty qazaqtyń ul-qyzdary boldy.

Qazaqstannyń aýyl sharýashylyǵy maıdan men tyldy azyq-túlikpen, ónerkásipti shıkizatpen jabdyqtady. 1942 jyly mal basy 2 mln-ǵa, egis kólemi 8 mln gektarǵa jýyq arttyryldy. Respýblıka 1941-1945 jyldary 5829 myń tonna astyq, 734 myń tonna et jáne basqa azyq-túlik berdi. Soǵys jyldary respýblıka eńbekshileri maıdanǵa kıim-keshek, azyq-túlik jiberip, jeke azamattardyń qarjysyna tankter, ushaqtar, súńgýir qaıyqtar jasaldy. Respýblıka halqynyń maıdan qajetine erikti jınaǵan qarjysy 4 700 mln som boldy.

---