InfoHub Logo

Bilim jáne ǵylym birinshi vıse-mınıstri Sholpan Qarınova sońǵy qońyraý men atestat tabystaý sharalary qalaı ótetinin túsindirdi.

«Oqý jylynyń aıaqtalýy boıynsha dástúrli túrde eki shara ótkiziledi, olar – 25 mamyrdaǵy sońǵy qońyraý jáne 11-synyptyń qorytyndy atestattaýynan keıin jalpy orta bilim týraly atestatty saltanatty tapsyrý. Olar barlyq ótken jyldar sekildi qajetti merzimde ótedi. Bıyl sońǵy qońyraý 25 mamyrda bolady. Ár mektep bul sharany óz qalaýynsha uıymdastyrady. Saltanatty atestat tapsyrý da – balalardyń ómirindegi alǵashqy mańyzdy qujat alýy, sondyqtan bul shara da ótkiziledi jáne oǵan bilim berý uıymy jaýapty bolady», - dedi Sh. Qarınova Senattyń jalpy otyrysynan keıin tilshilerge bergen suhbatynda.

Onyń aıtýynsha, Bilim mınıstrligi mektep bitirý keshin ótkizý týraly usynymdar ázirlep jatyr.

«Mınıstrlik osyndaı usynymdar ázirlep jatyr. Oqý jylynyń aıaqtalýyna áli bir jarym aı bar. Biz bul usynymdardy daıyndaımyz, áriptesterimiz ben BAQ habardar bolatyndaı jarıalaımyz. Bul jańadan paıda bolǵan shara emes, jyl saıyn ótip kele jatyr. Ótken jyldary karantındik shekteý qaǵıdalary boldy. Al bıyl atestatty saltanatty tapsyrý mektep qabyrǵasynda mindetti túrde ótedi. Basqa da usynymdardy tizemiz jáne jarıalaımyz», - dedi Sholpan Qarınova.

---