InfoHub Logo

Sútten dámi til úıiretin kokteıl jasaýdy bilesiz be? Sizdermen sútten jasalatyn kokteılderdiń keremet resepterimen bólispekshimiz. Al endi, blenderlerińizdi daıyndańyzdar!

Bárimiz qarapaıym úsh ıngredıentten – banan, sút jáne balmuzdaqtan dámdi sútti kokteıldi jyldam daıyndaýǵa bolatynyn bilemiz.

Alaıda, sútten jasalatyn kokteılderdiń sany munymen shektelmeıdi: as úıińizde sút, balmuzdaq jáne blender bolsa, onda óz qıalyńyzǵa erik berip qarapaıym reseptpen dámi til úıiretin kokteıl daıyndaı alasyz nemese balmuzdaq jáne basqa da táttilerdi qoldanbaı paıdaly jáne dıetalyq kokteıl daıyndaýyńyzǵa bolady.

Ártúrli sútterdi qoldanyp kórińiz

Eger de siz sıyr sútiniń dámin unatpaıtyn bolsańyz nemese vegan dıetasyn ustanatyn bolsańyz, názik sútti kokteılden bas tartýdyń qajeti joq.

Súttiń ósimdikti nusqalaryna den qoıyńyz: badam, kúnjút, kúrish, soıa jáne kokos sútteriniń qarapaıym sútterge qaraǵanda birqatar artyqshylyqtary bar. Mysaly, árqaısysynyń ózine tán qaıtalanbas dámi bar, sonymen qata rbarlyǵy derlik  E jáne D dárýmenderine baı ári tómen kalorıaly ónimge jatady.

Siz tipti, sıyr súttin ishýge úırengen bolsańyz da, joq degende bir ret aıtalyq, kokos sútimen jasap kórińiz. Sýsynnyń dáminiń ózgergenin birden baıqaısyz jáne ony basqa da dámdermen úılestirip kórgińiz keledi.

Kokteıldi tolyqqandy taǵamǵa aınaldyryńyz

Biz mılksheıktardy (milkshake – sútti kokteıl) desertti sýsyn retinde qabyldaýǵa ádettenip qalǵanbyz, olardy tek balalar men táttiqumarlar súısinip ishedi.

Mundaı «tátti» kokteılderdiń súıikti sýsynǵa birden aınalyp ketýi beker emes. Óıtkeni, basynda olardy barlyq shárbattardy, qantty, balmuzdaqty jáne shokoladtar men qulpynaıdy qoldanyp, óte tátti etip daıyndaǵan.

Qýanyshqa oraı, qazirgi tańda sútti kokteılderdi salaýatty ómir saltyn ustanatyndar da jasaýdy unatady. Óıtkeni, kokteıldiń esh zıany joq, ol qanyq dámimen adam aǵzasyna óte paıdaly. Oǵan qunarly zattardy qosyp (mysaly, aqýyz), kokteıldi toıymdy tiskebasarǵa nemese tipti, naǵyz tamaqqa aınaldyra alasyz!

Sýperfýdtardy qoldanyńyz

Sútten kokteıl daıyndamaq bolsańyz, qantpen balmuzdaqty jemisterge almastyryńyz. Sonda sulý músinińiz (jáne salmaǵyńyz ben aǵzańyz) sizge alǵys aıtady!

Sońǵy sýperfýdtarǵa úırengeniskennen keıin, olardy blendrden ótkize otyryp sútti kokteılderge op-ońaı qosa alasyz. Shyndyǵynda, ondaı qospalardyń basym bóligin sezbeı de qalasyz: chıa dánderi, zyǵyr dánderi, asaı jemisiniń untaǵy banan men sútten jasalǵan kokteıldiń dámin ózgertpeıdi. Al aǵzańyz aıyrmashylyqty birden sezinedi. Sýperfýdtar kokteıldi qunarly jáne paıdaly etedi, antıoksıdanttarǵa, dárýmender men mıneraldarǵa baıytady, metabolızmińizdi jaqsartyp, ımýndyq júıeńizdi kúsheıtedi.

Táttilerdi retteńiz

Balmuzdaq pen qant qospaı tátti sútti kokteıl daıyndaý múmkin be? Álbette, daıyndaǵanda da qandaı! Sizge bar bolǵany tabıǵı qant almastyrǵysh tabý kerek.

Bizdi durys túsinińiz: biz de balmuzdaq pen sútten daıarlanǵan kokteılden asqan dámdi eshnárse joq dep esepteımiz. Biraq, «Sulýlyq – qurbandyqty talap etedi» demekshi, mundaı artyq kalorıamen sulýlyqqa qıanat jasamaıyq.

Sútten jasalǵan kokteılderdiń táttiligin qant, balmuzdaq jáne shárbátpen retteýdiń qajeti joq. Banan, qurma, bal, stevıa, kokos jáne júzim qanty sıaqty paıdaly táttilendirgishterdi paıdalanyńyz.

Resepterge kósheıik. Nazar aýdaryńyz, barlyq kokteılderdi jasaý úshin blender men sút qajet. Biz eń qarapaıym jáne tez resepterdi berýge tyrystyq. Kokteılderge saı keletin birneshe oılar men ıngredıentterdi usyndyq, olardy óz qalaýlaryńyzben qoldana alasyzdar.

Banandy sútti kokteıl

Banandy sútti kokteıldiń úlken bir úlesin daıyndaý úshin sizge mynadaı qospalar qajet:

•    Sút – 250 ml
•    Vanıldi balmuzdaq – 1 as qasyq
•    Týralǵan banan – 2 dana
•    Kópirshitilgen kilegeı – dámine qaraı
•    Darshyn – dámine qaraı
•    Bir dana balǵyn shıe – ásemdik úshin

1. Blenderdiń ydysyna sútti quıyńyz, balmuzdaq pen banandy qosyńyz. Barlyq qospalardy birtekti úlpildek konsıstensıaǵa aınalǵansha blendermen urǵylańyz da bıik stakanǵa quıyńyz.
2. Kokteıldi kópirshitilgen kilegeı, darshyn jáne shıemen ásemdeńiz. Tútikshemen ishińiz.

Túrlendirýge bolatyn zattar: arahıs maıy, shokolad balmuzdaǵy, darshyn, Nutella.

Sút pen balmuzdaqtan jasalǵan shokoladty kokteıl

Sút pen balmuzdaqtan jasalǵan shokoladty kokteıldiń úlken bir úlesin daıyndaý úshin sizge mynadaı qospalar qajet:

•    Sút – 250 ml
•    Shokoladty balmuzdaq – 3 as qasyq
•    Marshmelloý – dámine qaraı
•    Kópirshitilgen kilegeı – dámine qaraı
•    Untaqtalǵan fýndýk – 1 shaı qasyq

1. Blenderdiń ydysyna sútti quıyńyz, shokoladty balmuzdaq pen fýndýk untaǵyn qosyńyz. Barlyq qospalardy birtekti qoımaljyń massaǵa  aınalǵansha blendermen urǵylańyz da bıik stakanǵa quıyńyz.
2. Kokteıldi kópirshitilgen kilegeı jáne qalaýyńyzsha marshmelloýmen ásemdeńiz. Tútikshemen ishińiz.

Túrlendirýge bolatyn zattar: qurma, untaqtalǵan qoıý shokolad, kokos jantaǵy.

Kokosty sútti kokteıl

Kokosty sútti kokteıldiń úlken bir úlesin daıyndaý úshin sizge mynadaı qospalar qajet:

•    Kokos súti – 250 ml
•    Vanıldi balmuzdaq nemese muzdatylǵan ıogýrt – 3 as q.
•    Kokos jantaǵy – 4 as q.
•    Banan – 1 d
•    Qoıýlatylǵan sút – 2 as q.

1. Blenderdiń ydysyna sútti quıyńyz, vanıldi balmuzdaq pen kokos jarnasyn qosyńyz (kokteıldi banan nemese qoıýlatylǵan sútpen táttilendirip jiberseńiz bolady). Barlyq qospalardy birtekti qoımaljyń massaǵa aınalǵansha blendermen urǵylańyz da bıik stakanǵa quıyńyz.
2. Kokteıldi kokos jantaǵymen nemese jalbyz japyraǵymen ásemdeńiz. Tek qana salqyn kúıinde keń tútikshemen ishińiz.

Túrlendirýge bolatyn zattar: jalbyz, kokos súti, qoıýlatylǵan sút, kokos jantaǵy.

Balmuzdaqty sútti kokteıl

Balmuzdaqty sútti kokteıldiń úlken bir úlesin daıyndaý úshin sizge mynadaı qospalar qajet:

•    Sút – 250 ml
•    Plombır balmuzdaǵy – 4 as qasyq
•    Bal – 1 as qasyq
•    Vanıl syǵyndysy – bir-eki tamshy.
•    Darshyn – shaı qasyqtyń ushymen
•    Untaqtalǵan zimbir - shaı qasyqtyń ushymen

1. Blenderdiń ydysyna sútti quıyńyz, plombırli balmuzdaq, bal men vanıl syǵyndysyn qosyńyz. Dámine qaraı zimbir untaǵy men darshyn qosyńyz. Barlyq qospalardy birtekti qoımaljyń massaǵa  aınalǵansha blendermen urǵylańyz da bıik stakanǵa quıyńyz.
2. Dámine qaraı kokteıldi kópirshitilgen kilegeımen ásemdep, betine bal quıyńyz. Tek qana salqyn kúıinde tútikshemen ishińiz.

Túrlendirýge bolatyn zattar: zimbir, jańǵaq, chıa dánderi, bal.

Qulpynaıly sútti kokteıl

Qulpynaıly sútti kokteıldiń úlken bir úlesin daıyndaý úshin sizge mynadaı qospalar qajet:

•    Sút – 300 ml
•    Vanıldi balmuzdaq nemese muzdatylǵan tabıǵı ıogýrt – 4 as qasyq
•    Tazartylǵan jáne jýylǵan qulpynaı – 2 staqan
•    Qant ulpasy – dámine qaraı ásemdik úshin.
•    Kópirshitilgen kilegeı – dámine qaraı ásemdik úshin.
•    Balǵyn qulpynaı - dámine qaraı ásemdik úshin.

1. Blenderdiń ydysyna sútti quıyńyz, týralǵan qulpynaı (aldyn ala ezip alsańyz da bolady), balmuzdaq nemese ıogýrt qosyńyz. Barlyq qospalardy birtekti qoımaljyń massaǵa aınalǵansha blendermen urǵylańyz da bıik stakanǵa quıyńyz.
2. Dámin qaraı kópirshitilgen kilegeı, qant ulpasy jáne qulpynaımen ásemdeńiz. Tútikshemen ishińiz.

Túrlendirýge bolatyn zattar: banan, kópirshitilgen kilegeı, godjı jıdegi, shárbát.

Sútten jasalǵan kofeli kokteıl

Sútten jasalǵan kofeli kokteıldiń úlken bir úlesin daıyndaý úshin sizge mynadaı qospalar qajet:

•    Sút – 250 ml
•    Qoıý salqyndatylǵan kofe – 1/3 staqan
•    Shokolad shárbaty – 1 as qasyq
•    Vanıldi balmuzdaq nemese tabıǵı ıogýrt – 4 as qasyq
•    Úgitilgen shokolad - dámine qaraı ásemdik úshin.
•    Kópirshitilgen kilegeı - dámine qaraı ásemdik úshin.

1. Blenderdiń ydysyna sút pen kofeni quıyńyz, balmuzdaq nemese ıogýrt, shokolad shárbátin qosyńyz. Eger de sizdiń blenderińiz muzdy týraı alatyn bolsa, onda birneshe muz tekshelerin qosyp jiberseńiz bolady.  Barlyq qospalardy birtekti qoımaljyń massaǵa  aınalǵansha blendermen urǵylańyz da bıik stakanǵa quıyńyz.
2. Dámine qaraı kokteıldi kópirshitilgen kilegeı men úgitilgen shokoladpen ásemdeseńiz bolady. Tútikshemen ishińiz.

Túrlendirýge bolatyn zattar: jalbyz, kópirshitilgen kilegeı, darshyn, banan, suıyq karamel.

Sút, balmuzdaq jáne muzdatylǵan jıdekterden jasalǵan kokteıl

Sút, balmuzdaq jáne muzdatylǵan jıdekterden jasalǵan kokteıldiń úlken bir úlesimin daıyndaý úshin sizge mynadaı qospalar qajet:

•    Sút – 250 ml
•    Muzdatylǵan jıdek – 100 g
•    Vanıldi balmuzdaq nemese muzdatylǵan ıogýrt – 4 as q.
•    Qant ulpasy nemese tátti shyryn (qoldanatyn jıdegińizge baılanysty) – dámine qaraı.

1. Blenderdiń ydysynda jıdekterdi jaqsylap týrap alyńyz. Eger de sizdiń blenderińiz muzdy týraı alatyn bolsa, onda birneshe muz tekshelerin qosyp jiberseńiz bolady. Sút, balmuzdaq nemese ıogýrt jáne de joǵaryda atap ótilgen táttilerdiń kez kelgenin dámine qaraı qossańyz bolady.Barlyq qospalardy birtekti qoımaljyń massaǵa  aınalǵansha blendermen urǵylańyz da bıik stakanǵa quıyńyz.
2. Kokteıldi balǵyn jalbyz jáne jıdekpen sándeńiz (úlgisi fotoda kórsetilgen). Keń tútikshemen ishińiz.

Túrlendirýge bolatyn zattar: banan, balǵyn jıdekter, agava shárbáti, jalbyz japyraǵy.

Astaryńyz dámdi bolsyn!

---