InfoHub Logo

Jaqan qý elden shyqqan kedeı bolady. Bylaısha aıtqanda bar adamdar ol kezde ony óte jek kóredi. Ol óziniń joqtyǵyna, nasharlyǵyna qaramastan óte pysyq, elden shyqqan qý bolady. Jaqan qazirgi Pavlodar oblysy, Baıan aýdany, burynǵysha Aqbet taý bolysy, tórtinshi aýylda týyp-ósedi. Rýy — súıindik, onyń ishinde aıdabol, arǵy atasy — jolan. On toǵyzynshy ǵasyrdyń sońǵy jartysynda ómir súrgen adam. Bul Jaqan óte qýlyqshyl, taqpaqshyl, saýyqqoı jaıdary adam boldy. Jaqannyń ákesi ózi de nashar, kedeı bolǵanymen eski patsha saıasaty zamanynda úlken jerlerde, úlken jıyndarǵa qatynasyp júredi.

Bir kezde Jaqan Omby qalasyna barady. Bul kezde Ombyda bolǵan jınalysqa qatynasqan adamdardyń kútýshisi bolady. Jaqan atqosshy bolyp erip barǵanmen, qoly bos ýaqytynda Ombynyń qalasyn aralaıdy. Bazardan bir qalaıy ojaý satyp alady. Bul kezde osy qalaıy ojaýdyń halyqqa tarap shyqpaǵan kezi. Sonymen Jaqan elge qaıtyp kelip, kúzdigúni el taýǵa qonǵan soń, Jaqan óziniń qasyna úlken balasyn ertip alyp, Qarjas Úkibaıdyń úıine keledi. Qonyp otyrǵannan keıin Jaqan Úkibaıǵa aıtady:

— Men sizge syıǵa Ombydan aq kúmis ojaýdy ádeıi tartýǵa alyp kelip otyrmyn. Osy ojaýdy eshkimge aparmaı, sizge alyp kelip otyrmyn. Sondyqtan amandyq bolsa, báıbisheńizge tyqtyryp qoıyńyz, — dep ojaýdyń maqtaýyn jetkizedi. Osymen Úkibaı ojaýdy saldyryp qoıady. Eshkimge bergizbeıdi, kelgen kisige de kórsettirmeıdi.

Al Jaqan qaıtar ýaqytta Úkibaı:

— Ne aıtatynyń bar? — deıdi.

— Men ne qalaımyn sizden? Bizdiń sharýany bilesiz. Hal-jaı belgili. Balalarǵa soǵym kerek. Basqa ne aıtaıyn, —  deıdi.

Sonda Úkibaı turyp:

— Qoı bersem, taıynsha bersem, azsynarsyń, astymdaǵy atymdy al, — degen eken deıdi.

Sonymen Jaqan óte rıza bolyp, Úkibaıdyń atyn alyp, eline qaıtady. Kelesi jyly jazǵyturym el taýdan kóship jatqan kezde toǵaı boıynan shyqqan, el aralaǵan Apaıdyń baqalshylary álgi Jaqan tartýǵa alyp kelgen kúmis qalaıy ojaýdy baqalshy qydyrtyp, jún-jurqaǵa satyp júrgenin Úkibaı kóredi. «Aqshalaı bolsa, ojaýdyń quny 5 tıyn, bolmasa bir ýys qoıdyń júni» deıdi. Sonda Úkibaı aıtqan eken:

— Álde Qudaı-aı, mynaý Jaqan meni aldap, ótirik aıtyp, astymdaǵy atymdy aldap soqty-aý! Kúmis ojaý degeni qalaıy ojaý bop shyqty-aý, — degen eken.

Sóıtip, Jaqan qý Úkibaıdy qýlyǵyn asyryp aldaǵan eken.

---