InfoHub Logo

Ákesi Qarabatyr dúnıe salǵan soń sheshesi Qulaqaıǵa:

— Eldi arbap, aldaǵanyńdy qoı. Óstip júrip bir kúni baılardyń qolynan ólesiń, — dep jalynady.

— Qoıamyn, endi eshkimdi aldamaımyn, — dep anasynyń kóńilin jyqqysy kelmegen Qulaqaı eriksiz ýáde beredi.

— Qaraǵym, meniń aqylyma kónseń, Boqbasar bıdiń aqylyn al! Ózim ertip aparaıyn, — dep anasy sol kezdegi qalyń qaýymnyń syılysy bolǵan el aǵasyn aýyzǵa alady.

— Jaraıdy, — dep Qulekeń oǵan da kónedi.

— Onyń batasyn alý úshin bir mal tabý kerek, — deıdi anasy.

— Jaraıdy, jol-jónekeı birdeńe tabylar, — deıdi Qulaqaı.

— Qaraǵym-aý, álginde qoıdym degeniń qaıda? Taǵy bireýdi aldap alǵyń kelip tur ma?

— Al, aldamaıyn, bir jaqsy at taba qoıyńyzshy.

— Ony qaıdan tabamyn, jaryǵym-aý!

— Onda meniń jolyma kóldeneń turmańyz. Júrińiz, kettik.

— Qaıda?

— Bata alýǵa.

Qulaqaı anasyn ertip, bıdiń aýlyna kele jatsa, jol jıeginde bir tabyn sıyr jýsap jatyr eken.

— Mynaý Boqbasardyń sıyry ǵoı. Anaý tarǵyl ógizdi usta, — deıdi Qulaqaı qasyna erip júrgen inisi Báıdekke.

— Qoı, qaraǵym, tanyp qoısa, uıat emes pe? Óz malyn ózine aparǵanymyz, — deıdi anasy.

— Joq, sheshe, men es bilgeli men óz malyn ózi tanyǵan baı kórgem joq.

Bular kesh bata tarǵyl ógizdi jetektep, bıdiń úıine keledi.

Bı:

— Myna zálim qaıdan kelip edi, bir pále shyǵarmasa ıgi edi,— dep, Qulaqaıdy qoı soıyp, qonaq qylady. Et jelinip bolǵan soń, Qulaqaı bıden bata suraıdy. Bı esik jaqqa jaltaqtaı qarap, birdeńe dámetkendeı bolady.

— Jasańyz, jasańyz, bıeke, tábárigińiz daıyn, — deıdi Qulaqaı. Sóıtedi de Báıdekke «bar, alyp kel» degendeı ym qaǵady. Báıdek ógizdi jetelep ákep, esikten basyn kórsetedi.

— Mine, bıeke, tábárigim — tarǵyl ógiz, — dep Qulaqaı qolyn jaıady.

— E, báse, — dep bı jymyń-jymyń qaǵady, — bul qý taǵy aldap soqqaly otyr ma dep em.

Ol «bisimılla, rabbım» dep batasyn shubyrtyp jasaı bastady. Bata bitip, bet sıpasqan kezde bıdiń ortanshy uly Ospan turyp:

Mynaý ózi bizdiń ógizden aýmaıdy eken, — dese kerek.

— Á, solaı ma, — deıdi Qulaqaı qýlanyp, — ol da bireýdiń tábárikke bergeni shyǵar.

— Iá, ıá, tábárikke kelgen. Áýmın, ıgilikke ustasyn, — dep Boqbasar bı saqalyn sıpapty.

---