InfoHub Logo

Álem halqy qartaıýda, barlyq elderde qart adamdar sanynyń artýy baıqalady, qartaıý deńgeıi boıynsha Japonıa birinshi orynda.

BUU sarapshylary 2020 jyldan 2050 jylǵa deıingi ártúrli elderdegi halyq sany men halyqtyń azaıýy deńgeıine qatysty boljamdar jarıalady.

Saraptamalarǵa sáıkes halyq sany azaıýy múmkin 10 elge mynalar kiredi:

1. Bolgarıa

Halyq sanynyń 2020 jyly 6,9 mıllıonnan 2050 jyly 5,4 mıllıonǵa deıin, ıaǵnı 22,5%-ǵa tómendeýi boljanýda.

Bolgar halqynyń júıeli túrde azaıýy ekonomıkalyq ósýge jáne ál-aýqattyń jaqsarýyna kedergi keltiredi, al jaǵymsyz áserlerdi azaıtýǵa baǵyttalǵan basqarý sharalary máseleniń egjeı-tegjeıin qozǵamaıdy.

2017-2021 jyldarǵa arnalǵan alǵashqy memlekettik baǵdarlama úrdisti toqtatýǵa baǵyttalǵan.

Baǵdarlamada sondaı-aq maqsatqa jetýdiń basym tásilderin anyqtaıdy: týý koefısıentin arttyrý, jastardyń emıgrasıasyn azaıtý jáne bolgar bıznesiniń qajettilikterine baǵyttalǵan zamanaýı ımıgrasıalyq saıasatty júzege asyrý úshin normatıvti jáne ınstıtýsıonaldy áleýetti qurý sharalary qarastyrylǵan.

 2. Lıtva

Eldegi halyq sany 2020 jyly 2,7 mıllıonnan 2050 jyly 2,1 mıllıonǵa deıin, ıaǵnı 22,1%-ǵa tómendeıdi dep boljanýda.

Halyq sanynyń tómendeýiniń negizgi sebepteri turǵyndardyń tez kóship ketýi, ólimniń artýy jáne týý deńgeıiniń tómendeýi boldy.

Túrli aqparat kózderine súıensek, táýelsizdik alǵannan jáne 2004 jyly EO-qa kirgennen Lıtvadan mıllıonǵa jýyq turǵyndar ketken.

Olardyń kópshiligi Batys Eýropaǵa jumys isteýge ketti. 2010 jyldan 2019 jylǵa deıin halyq sany 12% azaıǵan.

3. Latvıa

Eldegi halyq sany 2020 jyly 1,9 mıllıonnan 2050 jyly 1,5 mıllıonǵa deıin, ıaǵnı 21,6%-ǵa tómendeıdi dep boljanýda.

Halyq sanynyń tabıǵı tómendeýiniń saldarynan ólim-jitim koefısıenti týý koefısıentinen asqan kezde turǵyndardyń jalpy sany 7,1 myń adamǵa azaıdy, al kóshi-qon nátıjesinde olardyń sany taǵy 2,5 myń adamǵa azaıdy.

Latvıadan ketetin azamattardyń kóbisi Irlandıa men Ulybrıtanıaǵa qonys aýdarady eken.

4. Ýkraına

Eldegi halyq sany 2020 jyly 43,7 mıllıonnan 2050 jyly 35,2 mıllıonǵa deıin, ıaǵnı 19,5%-ǵa tómendeıdi dep boljanýda.

Halyq sanynyń tómendeýi Ýkraınanyń barlyq aımaqtarynda baıqalady. Ýkraınadaǵy kúrdeli geosaıası jáne ekonomıkalyq jaǵdaı elde emıgrasıanyń ulǵaıýyna, sonymen birge týý deńgeıiniń tómendeýine ákeldi.

5. Serbıa

Eldegi halyq sany 2020 jyly 8,7 mıllıonnan 2050 jyly 7,1 mıllıonǵa deıin, ıaǵnı 18,9%-ǵa tómendeıdi dep boljanýda.

Serbıa álemdegi halyq ósiminiń eń teris kórsetkishine ıe. Týýdyń jalpy koefısıenti bir anaǵa 1,44 bala, bul álemdegi eń tómengi kórsetkishterdiń biri.

Týý deńgeıiniń tómendigi jáne jastardyń emıgrasıasyna baılanysty, el álemdegi halyqtyń ortasha jas mólsheri eń joǵary on eldiń qataryna kiredi.

6. Bosnıa jáne Gersogovına

Eldegi halyq sany 2020 jyly 3,3 mıllıonnan 2050 jyly 2,7 mıllıonǵa deıin, ıaǵnı 18,2%-ǵa tómendeıdi dep boljanýda.

Bosnıa jáne Gersegovına — Ońtústik-SHyǵys Eýropadaǵy memleket. Balqan túbeginiń batys bóliginde ornalasqan.

Búgingi tańda bul jumyssyzdyq deńgeıi óte joǵary Eýropadaǵy eń kedeı elderdiń biri. Negizgi syrtqy saýda seriktesteri Eýropalyq Odaq elderi bolyp tabylady.

Halyq sanynyń azaıýyna Eýropalyq Odaqtyń tabysty elderine emıgrasıanyń joǵary deńgeıi jáne bala týý deńgeıiniń tómendeýi sebep bolyp otyr.

7. Horvatıa

Eldegi halyq sany 2020 jylǵy 4,1 mıllıonnan 2050 jyly 3,4 mıllıonǵa deıin, ıaǵnı 18,0%-ǵa tómendeıdi dep boljanýda.

Horvatıa buryn Iýgoslavıanyń quramynda bolǵan elderdiń ishinde eń damyǵany.

Alaıda 1991 jyly bolǵan soǵys saldarynan memlekettiń ekonomıkasy áli qalpyna kelýde. Elde jumyssyzdyq deńgeıi joǵary, ol 17% quraıdy.

8. Moldavıa

Eldegi halyq sany 2020 jyly 4,0 mıllıonnan 2050 jyly 3,4 mıllıonǵa deıin, ıaǵnı 16,7 % tómendeıdi dep boljanýda.

Eńbekke qabiletti halyqtyń edáýir bóligi Reseıdegi eńbek kóshi-qonynda.

Halyq sanynyń azaıýy týý deńgeıiniń tómendeýine jáne syrtqy kóshi-qonnyń teris saldosyna baılanysty.

9. Japonıa

Eldegi halyq sany 2020 jyly 126,5 mıllıonnan 2050 jyly 105,8 mıllıonǵa deıin, ıaǵnı 16,3%-ǵa tómendeıdi dep boljanýda.

Japonıa — ómir súrý deńgeıi óte joǵary damyǵan el. Japonıada ómir súrý uzaqtyǵy eń joǵary jáne náresteler óliminiń deńgeıi eń tómen.

Alaıda japon qoǵamy tez qartaıýda. Ekinshi dúnıejúzilik soǵys aıaqtalǵannan keıin týýdyń ósýin bala týý deńgeıiniń tómendeýi basty.

Demograftar men úkimet bul máseleni qalaı sheshýge bolatyndyǵy týraly qyzý pikirtalastar júrgizýde. Demografıalyq máselelerdi sheshý úshin týýdy yntalandyrý usynyldy.

10. Albanıa

Eldegi halyq sany 2020 jylǵy 2,9 mıllıonnan 2050 jyly 2,4 mıllıonǵa deıin, ıaǵnı 15,8%-ǵa tómendeıdi dep boljanýda.

Halyq sanynyń azaıýynyń negizgi sebepteri — kóshi-qonnyń kóbeıýi jáne týýdyń tómendeýi.

Kerimsal Jubatqanov tarıh ǵylymdarynyń kandıdaty

Oqýǵa keńes beremiz:

Álemdegi eń baqytty elder

Qurdymǵa ketken elder

---