InfoHub Logo

«Taldyqorǵan qalasynyń mektepteri men balabaqshalarynda ata-analardan aqsha jınaýǵa qatań tyıym salynady! Eger, mundaı jaǵdaı anyqtalsa, muǵalim, tárbıeshi sol mezette jumystan shyǵarylady. Al mektep pen balabaqsha basshylary qatań jaýapqa tartylady». Taldyqorǵan qalasynyń mektep dırektorlary men balabaqsha meńgerýshilerine arnaıy jıyn ótkizgen qala ákiminiń orynbasary Márlen Kólbaev osylaı dedi.

«Sońǵy kezde áleýmettik jelilerde qala mektepteri men balabaqshalarynda ár nárseni syltaýratyp aqsha jınaý týraly aqparattar shyǵyp jatyr. Biri «Altyn kúz», biri erteńgilikterdi alǵa tartsa, endi biri ata-analar oqýlyqtar men oqý-dápterlerin satyp alyp kelýi kerek dep talap etken. Bul - qate uǵym. Memlekettik mekemelerde balalardy oqýlyqtarmen qamtý úshin qajetinshe qarajat qarastyrylǵan. Al oqý-dápterlerin alý-almaý ata-ananyń óz erkinde. Biraq, ony talap etý - jemqorlyqqa jeteleıdi», - deıdi M.Kólbaev.

Ata-anadan 18 oqý-dápterin satyp ákelýdi talap etkeni dáleldengen Taldyqorǵandaǵy № 42 balabaqshanyń tárbıeshisi qala ákiminiń orynbasary M.Kólbaevtyń jınalysynan keıin, qalalyq bilim bóliminiń buıyryǵymen jumystan shyǵaryldy. Al balabaqsha meńgerýshisine sógis jarıalandy.

---