InfoHub Logo

Qazaqta toı dese qara bas domalaǵan. Qazaq halqy bar kezde toı da jalǵasyn taba bermek. Qazirgi kezde ulan-asyr toı jasaý úlken mańyzǵa ıe jáne ol halyq arasynda básekege aınalǵan. Saltanatty toı rásimin ótkizý úshin adamdar, tipti, nesıe-qaryz alýǵa daǵdylanǵan. Salt-dástúr bárine ortaq bolsa da, ár qalanyń ózine tán ereksheligi bar. Mysaly, ońtústikte betashar rásimi ulttyq aspap dombyramen ashylsa, batysta estradamen ótkizý ádetke aınalǵan. 

Qazir sáni men saltanaty kelisken záýlim meıramhanalar, shoýmen-asabalar jáne ár túrli án-bı ansámblderiniń kásibiniń domalanyp turǵan zamany. Toı ótkizýde bulardyń biri tizimde joq bolsa, halyq arasynda áńgime bolatyn dárejege jetti. Munaıly ólke Atyraýda toı rásimin ótkizý qalaı, osyǵan toqtalatyn bolamyz. 

Qazaqtyń shattyqtan sharshaǵanyn kórgen joqpyz. Qalaı desek te, alys-berisi, barys-kelisi úzilmegen, jyl on eki aı toı jasaıtyn halyqpyz. Keń peıil, keremet darhan bolmystyń arqasynda meıramhanalardyń da mereıi asyp, tabysy artyp, kásibi ilgerileýde.

Nurtilek, Baǵdat, Qýandyq, Damır. Bular qazir abyroıy da, aqshasy da aspandap turǵan, Atyraýǵa ataǵy shyqqan áıgili asabalar. Qazirgi toı ıeleri toıǵa kelgen qonaqtardyń kóńilin kóterip, joǵary dárejede ótkizgisi kelse, osy asabalarǵa júginedi. Olardyń bir kúndik gonorary 300 myńnan bastalady. Atyraýdaǵy eń qymbat asaba – Nurtilekti óz toıyńyzda kórgińiz kelse, qorjynyńyzda 1000$ bolýy tıis. 

«Keshińizdiń shyraıyn keltiretin Shyraılym!». Qazirgi tańdaǵy eń kóp  suranysqa ıe «Shyraılym» toby osy uranmen kóp toıdyń shyraıyn keltirip júr. Myń buralǵan bıshilerimen, kózdiń jaýyn alar qazaqy naqyshtaǵy ádemi kóılekterimen erekshelenedi. Olar salt-dástúrimen qosa, zamanaýı baǵyttaǵy qyz uzatý, kelin túsirý, quda kútý rásimderin ótkizedi. Bul top lazerlik shoý baǵdarlamasymen halyq arasynda úlken tanymaldylyqqa ıe. Eń birinshi orynda turǵan ansámbldiń bir toıǵa qyzmet etý baǵasy – 150 myń bolsa, basqa ansámblderdiń de surar baǵasy osydan kem emes. Sonymen qatar bul tizimdi «Sholpan-aı», «İnjý-Marjan», «Altyn ǵasyr», «Beımaral» jáne t. b. toptar tolyqtyrady. 

Sonymen qatar, Atyraýlyq toılar óner juldyzdary eń kóp tóbe kórsetetin ortaǵa aınalǵan. Únemi suranysqa ıe ánshiler qatarynda Erke Esmahan, Tóreǵalı Tóreáli, Ábdijappar Álqoja, Janbolat pen Jazıra, Nurbolat Abdýllın jáne t. b. bar. Olardyń bir toıǵa kelip án salýy 5000$ men 7000$ aralyǵynda.

Qazaqtyń toıy – tárbıeniń quraly, jergilikti mádenıettiń kórsetkishi. Buryndary ádet-ǵurpymyzdy, salt-dástúrimizdi nasıhattap, óner jarystyratyn torqaly toıdyń ózi bolǵan. Al, qazirgi toıdyń mán-mazmuny da, mańyzdylyǵy da múldem basqasha. Jańashalandy deısiz be, ózińiz bilesiz.

---