InfoHub Logo

Ata-babamyzdyń ańsaýymen, er júrekti aǵa-apalarymyzdyń qaısarlyǵymen, qanymen, janymen  kelgen  kıeli Táýelsizdigim!  Egemen el bolyp, esimizdi jıǵaly kózdi ashyp-jumǵansha 30 jyl da óte shyǵypty. Búginde Táýelsizdik qurdastary oı-sanasy tolysqan, orda buzar 30-ǵa da keldi. 30 jyl – az ýaqyt emes. 30 jylda biz qandaı jetistikterge jettik? Eldigimizdi nyǵaıta túsý úshin taǵy ne isteı alamyz? degen saýaldar árbirimizdi tolǵandyrady.

Táýelsizdik bizge ońaılyqpen kelmedi. Tarıhqa kóz júgirtsek, qazaq eliniń soǵyssyz, shaıqassyz ótken kúni bolmaǵan. Sonaý Aqtaban shubyryndydan bastap, keshegi 1986 jylǵy Jeltoqsan oqıǵasyna deıin qazaǵym óz jerinde basyn tómen túsirip  ómir súrip keldi. «Búginde bizdiń táýelsizdigimizdiń qaınar kózi- qazaq halqynyń san ǵasyrlar boıǵy kúresinde, azattyqqa umtylǵan qaısarlyǵynda jatyr» dep Elbasymyz aıtqandaı, sol syndarly ýaqytta  qaısar aǵa-apalarymyz elim dep, jerim dep shyryldap, jandaryn aıamaı kóteriliske shyqpaǵanda Táýelsizdikke qol jetkize almas edik.  Sondyqtan azattyq jolynda qanyn tógip, janyn bergen ata-baba amanaty- Táýelsizdigimizdi qasterleý, baǵalaý árbir Qazaqstandyq azamattyń paryzy.

Búgingi tańda, Qazaqstannyń ózindik úni, mártebesi bar. Biz álemdik deńgeıde aıaǵymyzdy nyq, senimdi basyp, elimizdi basqa elderge myqty memleket retinde tanyta aldyq.  Dúnıe keremet ózgerý jolynda, biraq biz ulttyq  ıdeıany saqtap, tarıhı mura, qundylyqtardyń qasıetin joǵaltpaı keıingi urpaqqa amanat etýimiz kerek.

Menińshe, osyndaı halge jetýimiz Qudaıdyń bizge bergen syıy, meıirimi, amanaty dep esepteımin. Biz óz ultymyzdyń, memleketimizdiń tarıhyn erekshe qadirlep, saqtaýymyz kerek.

Omarova Yrysty
Keshki (aýysymdy) mekteptiń
qazaq tili men ádebıeti páni muǵalimi

 

---