InfoHub Logo

Túrkistan oblysy adamı áleýetti damytý basqarmasy
Ǵ. Muratbaev atyndaǵy Jetisaı gýmanıtarlyq-tehnıkalyq kolejiniń
mýzyka pániniń oqytýshysy Ábsamatov Nurlybek Ábildauly

Uly Abaıdyń «Ánniń de estisi bar eseri bar» deıtin dana sózi bar. Áýenniń ıirimine túsken tolqyn qulaqtan kirip boıyńyzǵa taraǵan kezde túrli áserde bolasyz. Degenmen ár mýzykanyń adamǵa ártúrli áser etetinin eskerý kerek. Sebebi mýzykanyń bári bir janrǵa negizdelmeıdi. Olardyń: hıp-hop, jaz, lırıkalyq, rok, rok-n-roll syndy kóptegen janry bar. Ár janrdyń tolqyny túrli bolady. 

Adam qandaı janrda mýzyka tyńdasa da eń bastysy áýenge degen mahabbaty magnıtshe ustap turady. Bul – barlyq adam balasyna tán qasıet. Al bul qasıettiń adam balasyna áser etý kúshi qandaı, nege ózimizge unaıtyn mýzykany tyńdaı bergimiz keledi, jaýap izdep kórsek. 

Mýzyka – adam janynyń kilti

Adam mýzyka tyńdaý arqyly ishki jan dúnıesin syrtqa shyǵarady. Muńaıǵan sátte qýaný úshin eń jaqsy kóretin mýzykańyzdy tyńdaý jetkilikti bolýy da múmkin. Tipti sózben jetkize almaı turǵan sezimińizdi siz tyńdap otyrǵan áýen jetkize alady. Jan dúnıeniń názik qyldary áýenmen birge tolqıdy. Bul – jannyń tynyshtyǵy. İshki álemniń syryn aqtarýǵa ásirese lırıkalyq janrdaǵy sazdy áýender áser etedi.

Mýzyka – dáriger

Mýzyka janyńyzdyń tynyshtyǵyn saqtap qana qoımaıdy. Sizdiń ishki emosıańyzben kúresýge kómektesedi. Jelpinip turǵan, sabyrsyz minezińizge áýen áser etken bolsa, siz sabyrlyqqa úırenesiz. Al ol úshin arnaıy keste jasaýdyń qajeti joq. Sizge áser etken áýendi tyńdańyz. Mýzyka – dáriger. Bul tirkes keıingi kezde paıda bolǵan tirkes emes. Sebebi ejelden beri adamdar mýzykany emge paıdalanǵan. Senbeýińiz de múmkin, biraq mýzyka degenniń bári baraban men gıtara nemese arnaıy bir qurylǵy emes. Tabıǵattyń da óz áýeni baryn umytpańyz. Árbir qustyń saıraýy, sýdyń syldyry – bári adam mıyna áser etý kúshi bar tabıǵı emder.

Mýzyka – qarý

Mýzyka adam janynyń kilti ǵana emes, ol – qarý. Qoǵamda túrli áleýmettik jaǵdaı óris alyp jatqannan keıin, mýzykany qarý retinde paıdalanýǵa bolady. Máselen qylmyskerlerdiń shyndyǵyn moıyndatý úshin keı túrmelerde, jyndyhanalarda bir dybysty áýender qosylady. Ol áýen adam mıynyń belsendi jumys isteýin toqtatady. Ne aıtyp ne qoıǵanyn bilmeıtin dárejege jetedi. Bul ǵana emes túngi klýbtarda qoıylatyn mýzykalardyń tolqynyna erip ketseńiz ózińizdi tappaı qalatyn deńgeıge jetesiz. Keıbir ánderdiń áýenderi ǵana emes sózderi de adamǵa áser etedi. Onyń áserinen adam máńgilik «túnekke» enýi múmkin, ózine qol jumsaýy da ǵajap emes.

Ár rıtmge, ár áýenge selqos qaramańyz. Sebebi adam mıy men júregi sezimtal jáne syrttan keletin kez kelgen dúnıeni qabyldaýda belsendi. Bárin ózińizge jaqyn tarta berseńiz aýryp qalýyńyz da múmkin. Mýzykany da talǵammen tyńdaı bilińiz. 

---