InfoHub Logo

Egemendigimizdiń máńgilik úshtaǵany – Altaıdan Atyraýǵa, Alataýdan Arqaǵa deıin keń kósilgen baıtaq jerimiz, ananyń aq sútimen boıymyzǵa daryǵan qasterli tilimiz jáne barlyq qıyndyqtardan halqymyzdy súrindirmeı alyp kele jatqan bereke-birligimiz. Biz osy úsh qundylyqty kózdiń qarashyǵyndaı saqtaımyz.

Babalardan mura bolǵan qasıetti jerimiz – eń basty baılyǵymyz. Qazaqqa osynaý ulan-ǵaıyr aýmaqty syrttan eshkim syıǵa tartqan joq.

Táýelsizdik úshin aq bilektiń kúshimen, aq naızanyń ushymen elin qorǵaǵan babalar rýhynan qýat alǵan yzǵarly Jeltoqsan oqıǵasy qazaq halqynyń qasireti de, qasıeti de jeterlik tarıhyna aınaldy. Iá, Jeltoqsan oqıǵasy qanshama yzǵarly estilse de, janymyzǵa nur septi. Jeltoqsan jańǵyryǵy bizge Táýelsizdiktiń tańyn ákeldi.

Elbasy 1991jyly 16 jeltoqsanda saıası, ekonomıkalyq, áleýmettik, demografıalyq jáne basqa da jaǵdaılarǵa baılanysty jeti ret emes, jetpis ret ólshep, bir ret kesýge májbúr boldy. Súıtip Biz tyǵyryqtan shyǵar joldyń sańylaýy da kórinbeıtin qıyn kúnderden qaqtyǵys pen qantógiske urynbaı aman shyǵyp, eshkimge esemizdi jibermeı, jańa sıpattaǵy Qazaq memleketin qurdyq.

Bıyl Táýelsizdigimizge 30 jyl tolyp otyr. Bul qazaq memlekettiliginiń qaıta jańǵyrýy men ata-babalarymyzdyń talaı urpaqtary arman etken azattyqqa qol jetkizgenin kórsetetin mańyzdy kezeń. Tarıh ólshemderi boıynsha 30 jyl – bir sát.  Degenmen, kóptegen halyqtar úshin bul kezeń qıyndyqtar men jeńisterge, daǵdarystar men jetistikterge toly tutas dáýirdi qamtydy.

Men Táýelsizdiktiń alǵashqy onjyldyǵyn jańa Qazaqstannyń irgetasyn qalaý ýaqyty dep sıpattar edim. Elbasynyń basshylyǵymen memlekettik rámizder bekitildi, tıimdi bılik júıesi qalyptasty. Ulttyq valúta engizildi. Qarýly Kúshter quryldy. Elimizdiń Negizgi Zańy qabyldandy. Shet memlekettermen dıplomatıalyq qatynas ornatty. Qazaqstan bedeldi halyqaralyq uıymdarǵa múshe boldy.

Barsha otandastaryma, ásirese, jastarǵa aıtarym: keń baıtaq Qazaqstandy asqaq armandaryń men batyl josparlaryńdy emin-erkin júzege asyra alatyn, tabysyńa marqaıyp, árdaıym tileýińdi tileıtin qasıetti Otanyń retinde baǵalańdar! Táýelsiz el bolý ony jarıalaýmen nemese memlekettiń irgetasyn qalaýmen shektelmeıdi. Táýelsizdik úshin naǵyz kúres kúndelikti eńbekpen, úzdiksiz ári dáıekti eldik saıasatpen máńgi jalǵasady. Biz qýatty táýelsiz memleketimizben ǵana ult retinde jer betinde saqtalamyz. Osy aınymas aqıqatty berik ustanýymyz qajet. «Táýelsizdik bárinen qymbat!» degen bir aýyz sóz máńgi uranymyz bolýǵa tıis.

Ál Farabı atyndaǵy Qazaq Ulttyq Ýnıversıteti, Jýrnalısıka fakúlteti, baspa isi mamandyǵy Alhan Rasýl

---