InfoHub Logo

Ǵabıt Músirepov atyndaǵy Qazaq memlekettik akademıalyq balalar jáne jasóspirimder teatrymen birlese otyryp, Ál-Farabı atyndaǵy Qazaq Ulttyq ýnıversıtetinde Sáýir aıy «Teatr aıy» bolyp jarıalanady! Osy kelisimge sáıkes biz sáýir aıynyń on besinshi juldyzynda qazaqtyń mańdaıyna bitken jazýshysy- Ázilhan Nurshaıyqovtyń áıgili romany «Mahabbat, qyzyq mol jyldardyń» spektakline bardyq. 

Maǵan erekshe áser qaldyrǵan bul qoıylym kelgen árbir kórermenniń erekshe mahabbatyna ıe boldy. 

Qoıylym oqıǵasy maıdannan aman oralǵan ardager jazýshynyń beıbit ómirdegi tynys-tirshiliginen bastaý alady. Bas keıipker Erbol obrazy arqyly qazaq jaýyngerleriniń erligi men shynaıy mahabbat sezimi baıandalady. Jas soldattyń Almaty qalasyndaǵy Qazaq ýnıversıtetine túsip, 33-shi aýdıtorıaǵa kirgennen bastap, ómiri baqyt pen ókinishke, qýanysh pen muńǵa toly boldy. Aýdıtorıaǵa kirgennen bastap bir top qyzdardyń arasyna tap bolýy, qyzdardy ǵajap gúl álemine teńeýi - onyń qyz balaǵa degen syılastyǵyn kórsetedi. Sol aıdaı sulý qyzdardyń ishinde Erboldyń mahabbatyna aınalǵan Meńtaıdyń bolýy, onyń qylyǵy, onyń ádemiligi, minezi kórermenniń ystyq yqylasyna ıe boldy. Ortadan sál ǵana tѳmendeý boıy bar, samaı tusy buıralanyp turatyn qoıý qara shashyn uzyn qos burym etip ѳrip, ony aq mandaıynan joǵarylata basyna birneshe ret orap, eki ushyn tas qylyp tѳbesine túıip tastaǵan, aq beti taza qolmen arshyǵan jumyrtqadaı kirshiksiz, jasy on segizge kelgen taldyrmash qyzdardyń beınesi ásem etip beınelenedi. Erbol men Meńtaı ekeýiniń bir-birine qushtarlyǵy, ishteı jaqsy kórip turyp, aıta almaýy, Erboldy «aǵa» dep ataýy Meńtaıdyń tárbıeliligi men aqyldylyǵynan kórinis berdi. 

Kórinistegi kórermenge áser etip, jaǵymsyz obrazda beınelengen obraz-Tumajan beınesi. Tumajan Oshaqbaev — jaǵymsyz keıipker, tek ózin oılaıtyn, ótirik sóıleıtin, arsyz jan, Meńtaıdyń aǵasynyń maıdandasy jáne Meńtaıdy aldap ózine atastyryp qoıady. Qyz balasynyń taǵdyrynyń qıynshylyǵy, qyz balasynyń ómiri qoıylym barysynda óte aýyr beınelenedi. Mahabbattyń órti kúshti bolǵanymen, ǵashyqtardyń oıynan bir-birine degen sezimderi óshpeı, qanshama qıynshylyq bolsada ekeýi otaý qurady. Bir ókinishtisi,Erbol men Meńtaı,Tólegen men Jibek, Eńlik pen Kebek, Qozy men Baıan, Qalqaman men Mamyr, Ahmet men Jamal sekildi ómirleriniń sońyna deıin birge bola almady.Erbol Meńtaıdy shyn súıdi,degenmen mahabbat ajaldy jeńýge qaýqarsyz.Ol óz súıgenin,jańa týǵan sábıimen birge jer qoınaýyna tapsyrdy.Shyǵarmanyń osy tusynda kózime eriksiz jas kelgen edi.

Osy qoıylymnyń barysynda :

Qudaı-aý, qaıda sol jyldar,

Mahabbat qyzyq mol jyldar?

Aqyryn-aqyryn sheginip,

Alystap ketti-aý qurǵyrlar,-degen Abaı atamyzdyń óleń joldary eriksiz eske túsedi. 

Biz barǵan bul shyǵarmadan biraz oı túıdik, alar aqparatymyz kóp boldy. Oınaǵan akterler men aktrısalardyń róli keremet boldy,sondyqtan sizge aıtar usynysym bar :

Rýhanı kenelgińiz kelse, kórermen, teatrǵa kelińiz! 

Ál-Farabı atyndaǵy Qazaq Ulttyq Ýnıversıtetiniń 1 kýrs stýdenti-Sultanova Aqnur 

Qazaqstan tarıhy kafedrasynyń dosenti-Djoldybaeva Ý. M

---