InfoHub Logo

Bir baıdyń alaqanyna salyp aıalap ósirgen jalǵyz qyzy bolypty. Jalǵyz da bolsa júzge tatıtyndaı aqylyna kórki saı bolyp ósken eken. «Qyz ósse, eldiń kórki» degen ras, baı qyzynyń aqyl-kórki ańyzǵa aınalyp, tóńiregindegi aıaq jeter jerden arnaıy at sabyltyp kelýshiler kóbeıdi. Malyna sengen baılar, áline sengen batyrlar sóz salady. Jalǵyz perzenti bolǵan soń, baı qyzynyń qas-qabaǵyna qarap, ómirlik jar tańdaý erkin ózine beredi. Al qyz bolsa anaý-mynaýǵa kóńili tolmaǵan syńaı tanytyp, «teńim emes» degen jaýappen toıtaryp tastaı beredi.

Sonymen, kúnder zýlap, jyldar jyljyp ótip jatady. «Kerbez qyz» atanǵan baı qyzynyń kóńilinen shyǵar eshkim kezige qoımaıdy.

Árıne, bul jaǵdaı aldymen ata-anasyn alańdatyp, kerbez qyzdan jeńgeleri arqyly sheshesi «ne oılaǵany bar eken?» dep syr tartady. Sonda qyz: «Erteńimdi oılamaı kergip júrgen jaıym joq. Biraq kóringenniń eteginen ustamaı, kóńilim qulaǵan bireýge taǵdyrymdy tapsyrsam ba dep edim. Ata-anama rızamyn, jaryq dúnıe syılady, álpeshtep ósirdi, erkimdi ózime berdi, sonyń arqasynda el ishine «Kerbez qyz» atym jaıyldy. Endigi oıym, meniń osy kerbezdigimdi kimde-kim sybyzǵy tilinde jetkize alsa, janymdy túsinetinine kózim jetip, soǵan barar edim» deıdi.

Qyz nıeti el ishinde tez taraıdy. osydan keıin-aq baı aýylyna jorǵa mingen baı da emes, naıza ustaǵan batyr da emes, endi nebir nántalap sybyzǵyshylar aǵylyp kele bastaıdy. Kerbez qyzǵa kópke deıin birde-bir sybyzǵyshy unamaıdy. «Jaı taqpaq, belgili saryn» dep jaqtyrmaı qaıtara beredi.

Sodan kúnderdiń kúninde kedeıqoldylaý kıingen qarapaıym bir jigit kelip, «Kerbez qyzdyń kóńilin ósireıin, kerbezdigin sybyzǵyma kóshireıin» dep kúı tartady. Kedeı jigittiń kúıi qyz kóńilinen shyǵyp, ekeýi kóńil qosady. Buǵan qyzdyń ata- anasy da rıza bolyp, ulan asyr toı jasaıdy.

Sonda tartylǵan osy «Kerbez qyz» kúıi edi deıdi.

---