InfoHub Logo

Aldymyzdaǵy mamyr aıynyń basynda baspasózdi kúsheıtý ám jetim balalardyń turmysyn jóndeýge kirisip, járdem jınaý sharalary isteleıin dep jatyr. Bul eki jumystyń ekeýi de — eń tyǵyz, eń zor, eń ekpindi jumystar. Qanshama kúshin salyp, qanshama qolynan kelgen járdemin úkimet istegenmen, aıtylǵan ister kóńildegideı tolyq járdem ala alatyn emes.

Úkimet syrtqy ám ishki soǵystardyń túrli zardabynan áli kedeı, muny jurt ózi de kórip otyr.

«Baspasózdi kúsheıtý jumysyn» partıa mekemeleri basqarmaq. Al «jetim balalarǵa járdem kórsetý jumysyn» basqaryp, ótkizetin halyq aǵartý mekemeleri. Bul aıtylǵan eki orynnyń (partıanyń ám halyq aǵartý isiniń) mekemeleri jer-jerlerge tıisti jobalaryn jiberip jatyr. Sol jobalarmen jergilikti mekemeler bul eki jumany jaqsylap ótkizýleri kerek.

Bul eki iske aldyn ala daıarlanyp kóńildegideı qyp ótkizýge Qazaqstannyń barlyq mekemeleri ám barlyq jarly tabynyń azamattary zor mindetti.

Qazaqstanda qazaq tilinde shyǵatyn baspasózdiń jaıyn, Qazaqstanda jetim balalardyń kúıi jurttyń bárine qandaı ekeni belgili. Bular týraly qaıta-qaıta aıtýdyń da, jazýdyń da kóp qajeti joq.

Eńbekshil tabynyń azamattary jumylý kerek. Bul eki is solardyń mindeti.

25.04.1923 jyl

---