InfoHub Logo

Nadan adam gazet, jýrnal oqymaıdy. Gazet, jýrnal oqymaǵan adam — soqyr, múgedek.

Ár memlekettiń qandaı saıasat qoldanatyny, ár memlekettiń tysynda, ishinde saıasaty qandaı tásilmen júrgiziletini hám ár memlekettiń áleýmet isiniń aǵymy, sharýashylyǵynyń qurylys tártibi gazet, jýrnalynda jazylady. Gazet, jýrnal habarshysy.

Gazet, jýrnal, kitap oqymaıtyn adam ómirin bosqa ótkizgen, qalyń, sapyrylysyp, asyǵyp qaınaǵan toptyń arasynda meń-zeń bolyp, qaqtyǵyp, adasyp qalǵan pende.

Qalyń toptyń ersili-qarsyly sapyrylysyp, gýlesip jatqanyna meń-zeń bolyp adasqan pánde túsinbeıdi. Adamzatqa eki túrli as kerek: bireýi — tánine, bireýi — rýhyna. Rýhyna kerektiń úlkeni — gazet, jýrnal, kitap oqý. Gazet, jýrnal, kitap oqyǵan adamnyń bilimi, dúnıege, turmysqa kózqarasy birte-birte keńeıe bermek, mańaıynda bolyp jatqan isterdiń ne ekenin, mańaıynda sapyrylysyp áreket qylyp jatqan adamdardyń kim ekenin hám óziniń kim ekenin bilmek.

Gazet, jýrnal, kitap oqyǵan kisi kóp bolsa da, az bolsa da saıasat isine hám áleýmet isine qatynasa bermek. Qazaqtyń jumyskerleriniń, kedeıleriniń kóbi gazet, jýrnal, kitap oqymaıdy. Kóbi oqý bilmeıtin-aq shyǵar. Al oqý biletinderiniń kóbi oqymaıdy. Búl úlken kemshilik. Bul qur tánine ǵana as izdep, top ishinde qaqtyǵyp, adasyp qalǵandyq. Qazirgi ýaqytta ásirese Keńestik respýblıkada óziniń kim ekenin tanymaǵandyq.

İshki hám syrtqy dúnıelerde ne bolyp, ne qoıyp jatqanyn bilmegen jumysker hám kedeı Keńestik respýblıkada bolsa da óz sybaǵasyn ózi qansha aıtqanmen túgeldep ala almaıdy.

Muny jumysker, kedeıler tabynyń oqý biletin jigitteri esterinen qaldyrmaý kerek.

Alyp turatyn gazet, jýrnaly bolsa jyrtpaı, búldirmeı, basqa alyp turmaıtyn joldastaryna berýleri kerek.

10.10.1922 jyl

---