InfoHub Logo

Adam nelikten tús kóredi? Odan keıde júrek titirkenip, jamandyq kele jatqandaı seskenip, al keıde qýanysh esik qaqqaly turǵandaı qanattanýymyz nelikten? Al (Jany jánnátta bolsyn) arýaqtardyń túste aıan berip nemese óziniń seniń isińe rıza emestigin nemese kerisinshe rızashylyǵyn bildirýin qalaı túsindirýge bolady? Bala kezimde aıtqan anamnyń bir túsi esimnen ketpeıdi. Turmysqa shyqqannan keıin kóripti: Appaq otaý úıi bar eken deıdi, dalaǵa shyqsa úıiniń dál tóbesinde bir top Aı týyp, bir top Kún shyǵyp turypty. Bir kezde qara bult kelip, bir-ekeýin alyp ketipti. Sol kezde ózi joryǵanyndaı, keıinnen bir top uly, bir top qyzy boldy. Bir ekeýiniń shetinegeni de ras. Sol bir top Kúnniń bireýi men shyǵarmyn, sirá. Minezimniń tolyp jatqan kemshilikteri men ómirimniń aıtarlyqtaı olqylyqtaryna qaramastan, men de aınalama sál-sál bolsa da sáýle túsirip kele jatyrmyn-aý degen úmitim bar. Biraq osy jaılardy sóz basynda keltire otyryp aıtaıyn degenim, ózim kórgen túster haqynda. Olar ár alýan, ómirimdegi túrli jaǵdaılarmen tikeleı baılanysty. Múmkin olar tús jóninde zertteý jasaıtyndardyń qajetine jarar. Olaı bolmaǵan kúnniń ózinde de, oqyrman úshin qyzyqty ekenine kúmánim joq. Óıtkeni ózderi de talaı tańǵajaıyp tús kórip júrgender kóp.

---