InfoHub Logo

Qulan ıektenip atqan tań japyraǵy seldir ormandy altyn nurǵa malshyndyra bastady. Aınala múlgigen uıqyda. Tym-tyrys. Sálden soń taý basynan kún de syǵalady. Ózen jaǵasyna boı túzegen qalyń aǵash ishinen shyqqan Toqyldaq úni meńireý taý ishin jańǵyryqqa bólep jiberdi.

— Toq, toq… toq, toq, toq… Kún shyqty, endi uıqy joq, — dep

Toqyldaq ushar basy aspanmen tildesken dáý samyrsynnyń qabyǵyn qaqqylap jatty.

— Tań atpaı mazamdy alǵan kim? — dedi samyrsynnyń uńǵylynan shyqqan ún.

— Toqyldaqpyn. Sen kimsiń?

— Tıinmin.

— Tıin, Tıin! Jyldam kıin, moınyńdy bur, ornyńnan tur, toǵaıǵa júr, órik qaq, jıdek tap, jańǵaq shaq!

— Qap, bálem! — dep ashýǵa býlyqqan Tıin dalaǵa shyqty.

Toqyldaq samyrsynnan ushyp baryp, qaraǵaıǵa qonyp, ony da qaqqylaı bastady:

«Toq, toq… toq, toq. Kún shyqty, endi uıqy joq».

— Tań atpaı erigip júrgen qaısyń? — dedi aǵash ishinen shyqqan shańqyldaq daýys.

— Toq, toq… Toqyldaq degen menmin. Óziń kim boldyń?

— Sýsarmyn.

— Sýsar, Sýsar! Kólge jýsar, uıqyńnan tur, moıynyńdy bur, toǵaıǵa júr, órik qaq, jıdek tap, jańǵaq shaq!

— Qap, bálem! — dep kúrek tisterin aqsıtyp, sýsar dalaǵa shyqty. Biraq Toqyldaq kórshi shynardyń butaǵyn qaǵa bastaǵan edi.

— Toq, toq… Toq, toq, toq. Kún shyqty, demek, uıqy joq!

— Áı, bul qaısyń tań atpaı mazalaǵan?

— Toq, toq… Toqyldaq degen men bolam. Óziń kimsiń?

— Kúzenmin!

— Kúzen, Kúzen, sýda júzgen!

Uıqyńnan tur, moıynyńdy bur, toǵaıǵa júr, órik qaq, jıdek tap, jańǵaq shaq!

— Qap, bálem! Myna jaǵyń qarysqyrdyń yzasy-aı! — dep Kúzen dalaǵa shyqqansha, toqyldaq shyrshanyń qabyǵyn qaqqylaı bastady:

— Toq, toq, toq, toq, toq… Kún shyqty, demek, uıqy joq!

— Áı, dúrsildetken qaısyń?

— Toq. toq… Toqyldaq degen men bolam. Óziń kimsiń?

— Kámshatpyn, Kámshat!

— Kámshat, Kámshat, ala monshaq! Uıqyńnan tur, moıynyńdy bur, toǵaıǵa júr, órik qaq, jıdek tap, jańǵaq shaq.

— Qap, bálem! — dep, tisin shaqyldatqan Kámshat dalaǵa júgirgenshe, Toqyldaq terektiń butaǵyn qaqqylaı bastady:

— Toq, toq, toq, toq… Kún shyqty, demek, uıqy joq!

— Bul kim eken? — degen daýys terektiń túp jaǵynan estildi.

— Toq, toq… Toqyldaqpyn. Óziń kim boldyń?

— Menmin ǵoı. Qoıan.

— Qoıan, Qoıan, jyldam oıan! Uıqyńnan tur, moıynyńdy bur, toǵaıǵa júr, órik qaq, jıdek tap, jańǵaq shaq!

— Qap, bálem! Jańa ǵana kózim ilinip edi, — dep Qoıan ininen shyqqansha, Toqyldaq lyp berip emenge qondy.

— Toq, toq, toq, toq, toq… Kún shyqty, endi uıqy joq!

— Bul kim tarsyldatqan? — Gúril emenniń túbinen estildi.

— Toq, toq… Toqyldaqpyn. Óziń kimsiń?

— Men be? Men Maımaq emespin be?

— Maımaq, Maımaq! Taltaq aıaq, uıqyńnan tur, moıynyńdy bur, toǵaıǵa júr, órik qaq, jıdek tap, jańǵaq shaq!

— Áı, myna Toqyldaǵyń ras aıtady. Uıqyǵa áli erte bolar, — dep Maımaq aıý apanynan shyǵyp, sharýasyna kiristi. Toqyldaq basqa aǵashqa ushyp ketti.

Balalar! Toqyldaqqa qaı haıýanattyń ashýlanǵany durys ta, qaısysyniki durys emes?

---