InfoHub Logo

Tóremurat aınalaǵa qaraýyl qoıyp, kóptegen mal soıdyryp «Qyzdanaıdy ekinshi ret alǵanymnyń toıy» dep, úlken toı jasaıdy. Toıdyń kóptegen báıgelerin taǵy Qurmanǵazy alady. Keshke oıyn bastalǵanda baıaǵy kıik atysta, altynqabaqta jeńilip júrgen batyrlardyń jigitteri qorlyǵy ótken Qurmanǵazydan ósh almaq bolyp, Shóken degen qyzdy azǵyryp, oǵan bir-eki aýyz óleń úıretip, Qurmanǵazyǵa qarsy aıttyrady. Oıynda eshnárse joq kúıshige qylymsyp Shóken qyz kelip: «Jıen aǵa, aıtysaıyq!» — deıdi. Qurmanǵazy qarsy almaýǵa arlanyp, «bolsyn» deýi-aq muń eken, kezek te suramaı, Shóken bastap ketedi:

Baılardan qazyq qalady qonǵan jerde,
Túlkiniń eti qalady soıǵan jerde.
İshken as, syı-qurmetti olja kórip,
Júresiń tóbet ıtteı toıǵan jerde.
Sen júrgen bir «boz qańǵyr» bizdiń elde,
Shet jerde álin bilmeı álek bolǵan,
Sózim shyǵyn bolady-aý sendeı kemge», — dep óleńdetedi.

Qurmanǵazy bul áńgimeniń túbiniń qaıdan shyqqanyn sezedi. Qyzdyń óz qara basynan mundaı aýyr sóz shyǵatynynyń eshbir reti joǵyn biledi. «Jetim bala — kekshil» degendeı, qyzdyń sózi óńmeninen ótkendeı bolady. Dombyraǵa qosylyp, qalaıda jaýap berý kerektigin oılap, shyrqap ketedi:

«Shyǵa almaı jaman júredi týǵan jerde,
Qaıda da er júredi syıǵan jerde.
Saırandap sary dalany ketsem kezip,
Ónerpaz atym shyqty sizdiń elde.
Teńediń kemitem dep meni ıtke,
Adasqannyń ózine aldy jón de.
Azǵyrǵan bireýlerdiń tiline erip,
Qurbyjan tilim tıse, artyq kórme.
Qonaq kórgen kórgendi eldiń qyzy,
Aýylyńa kelgen jurtqa «tıistiń» nege?» —  deı bergende Narynbaı sezip qalyp, aıdap salyp otyrǵan jigitterdi aldyna shaqyryp alyp, qamshynyń astyna alady. Oıynnyń qyzyǵy búlinedi. Tóremurat, Narynbaı, Qyzdanaı úsheýi Qurmanǵazyny úsh jaǵynan jubatyp, aqyl aıtqanymen, kúıshiniń kóńiline bir túıin túsip, oıyndy qalaı qyzdyramyn degenimen, bul keshte Qurmanǵazy syrttaı ǵana jarqyldap, ishi tútin bolady. Narynbaıdyń ashýynan záresi ushyp ketken Shóken qyz qasha jónelip, endi oıynnyń qarasyn da kóre almaıdy. Oıyn taraǵan soń, Qurmanǵazy jatqan úıine kelip, kórer tańdy kózimen atqyzady. Erteńinde batyrlardyń aldynda taǵy bir kúı tartyp, onyń atyn «Tóremurat — Narynbaı» ataıdy. Qoshtasyp, batyrlar bergen arǵymaq atty jetekke alyp, Bókeıge qaraı jol tartady.

---