InfoHub Logo

Aqyr sońynda mefraý Van Damnyń shydamy sharyqtaý shegine jetip, marapatqa ıe boldy.

Onyń kúıeýi ótken aptanyń jumasy kúni shybyn janyn Táńirge tabys etip tyndy.

Olardyń otasyp, bir shańyraq astynda tirlik keshkenderine otyz eki jyl. Erjetken úsh balasy bar. Kúmis toılarynyń qarsańynda, merekeni atap ótý úshin jaldap qoıǵan zaldyń tórinde otyrǵan mefraý Van Damǵa jap-jas beıtanys jigit kelip:

— Sizdiń kúıeýińiz tórt jyldan beri qaıdaǵy bir jezókshemen baılanysyp júr, men álgi qanshyqty sol úshin tastap ketkenmin. Siz bul týraly biletin be edińiz? — dedi.

Ol bilmeıtin edi.

Biraq, kúıeýiniń ár jumasyn saıyn chemodanyn toltyryp alyp, qalanyń shetindegi ýıkendke ne úshin qatynap júrgenin túsingendeı boldy.

Aldyn-ala josparlanyp qoıylǵan kúmis toıyna osy bir keleńsizdiktiń kesiri tıgen joq. Kerisinshe erli-zaıypty Van Damdar áshekeılengen oryndyqtarǵa jaıǵasyp, zal toly toıǵa jınalǵan qonaqtardyń arqasynda tamasha ótkerip tastady. Olardyń qurmetine birneshe márte saýlyq tileıtin sazdy áýender shyrqalyp jatty.

Erteńinde mefraý Van Dam kúıeýine barlyǵyn biletinin, ajyrasýdan bas tartatynyn málimdedi. Onyń dál osyndaı sheshim qabyldaýy, kúıeýine degen asqan ińkár mahabbattyń da, ózegin órtegen qyzǵanyshtyń da, júregine shemen bolyp shógip qalǵan kektiń de kesiri emes edi. Ol tek qana zeınetaqysy men saqtandyrýynan aıyrylyp qalmaý úshin osylaı isteýge májbúr boldy.

Dese de, kúıeýiniń tabysy kóp emes-ti, sharýashylyq shyǵyndaryna soqyr tıyndaryn sanap beretin. Odan qalǵanyn álgi bir bıkeshtiń qaltasyna salady. Bir kúni mefraý Van Damǵa jańa kóılek kerek bolǵanynda, beti qyzaryp balalarynan aqsha suraýǵa týra keldi. Kúıeýiniń ajal saǵatynyń tezdetip soǵýy, saıyp kelgende muny aýqatty áıel sanatyna qosady. Sol sebepti de ol kúıeýiniń ólimin taǵatsyzdana tiledi.

Kóp jyldar kútýge týra keldi.

Olar bólek bólmelerde tirlik keshýge de úırenisip, óz aralarynda bir-birine jaq ashpaıtyn. Mefraý Van Dam kúıeýin tamaqtandyryp, kıip júrgen anaý-mynaý kıimderin retke keltirip qoıatyn. Ár juma saıyn onyń chemodanyn toltyryp qoıýdy da ádetke aınaldyryp alǵan-dy. Kúıeýi qoshtaspastan álgi bıkeshke ketip qalatyn. Kúıeýi de áıeliniń shyn máninde ne qalaıtynyn bilmeı basy qatatyn.

Ótken aptanyń jumasy kúni mefraý Van Damnyń tózimi aqyr aıaǵynda marapatqa ıe boldy. Tańerteń ol kúıeýi túneıtin bólmeniń terezesindegi perdeniń túrilmeı qalǵanyna kózi tústi.

Asyp-tasqan úmit sezimine bólenip, jatyn bólmeniń tabaldyryǵyna tabanyn tıgizdi.

Biraq kúıeýiniń kirpigi áli de bolsa qımyldap jatty.

Tósek-orynynda jatyp, oǵan dáriger shaqyrý kerektigin tapsyrdy.

«Bári de sol aıtqandaı bolsynshy» — dep, Mefraý Van Dam kúıeýiniń ol ótinishin de jerde qaldyrmaı qulyqsyz oryndaı saldy.

Dáriger kelip, ony túgel tekserip, naýqasqa shıpa bolatyn dárilerdiń tizimin toltyrydy da, dálizge shyǵa bere oǵan:

— Sizdiń kúıeýińiz óte qaterli aýrýǵa shaldyqqan. Háli óte múshkil. Júregi aýyrady. Siz meniń kómegime óte kesh júginip otyrsyz. Sirá, ol ózin birneshe aı boıy qolaısyz sezinip júrse kerek. Sizdiń kúıeýińiz júregine salmaq salǵan.

— Bolary boldy, boıaýy sińdi — dedi mefraý Van Dam.

Dáriger bul kisiniń osylaı bolǵanyna qýanyp turǵanyn da ańǵaryp qaldy. Degenmen de ol jasy talaıdy kórgen otbasy dárigeri bolǵandyqtan, kópten beri anaý-mynaý nárselerge tań qalmaıtyn bolyp alǵan edi, sol sebepti de eshteńege tańdanysyn bildirmedi.

Sonan soń Mefraý Van Dam dári untaǵyna bola dárihanaǵa da baryp keldi. Biraq ol da kómektese alǵan joq. Kúıeýi sol kúni keshkilik kóz jumdy. Ómiriniń sońǵy jumasy kúni ol onymen birge qaldy. Ol jan tásilim etetin sátte mefraý Van Dam qasynda otyrdy. Áne-mine kelip áldıleıtin ajaly jaqyndap qalsa da, ol munymen sóılesken joq. «Keshirshi» degen sońǵy sózin de qımady buǵan. Bir túıir bolsa da álsizdik kórsetpedi. Buǵan betin buryp qaraǵan da joq. Bul onyń tóseginde otyrsa da, tek jalǵyz ózi ǵana naǵyz erlershe demi taýsylyp, týǵaly beri elý segiz jyl ǵumyr keshken jaryq dúnıege solaı qosh aıtty.

— Qalaı bolǵanda da meniki durys bolypty — deıdi mefraý Van Dam búginde — ol o, dúnıege jap-jas qalpynda attandy. Al men bolsam alpysqa aıaq artqanymda mol aqshany qolyma túsirdim, rahattanyp ómir súrýge ýaqyt jetip jatyr. Al anabir saldaqy saýsaǵyn soryp sorlap qaldy.

---