InfoHub Logo

Týǵan jer

....Osy sóz. Kóńilińdi kóterip, júregińdi tebirentip, ózińe kúsh-qýat beretin asyl qazyna. Sonaý ǵaryshta júrseń de, týǵan jeriń árdaıym esińde bolyp,  topyrǵyn ańsaısyń. «Týǵan jerdeı jer qaıda, týǵan eldeı el qaıda» demeı me kemeńger halyq. Halqymyzdyń basyna túsken náýbet jyldarynda «Elim-aı!» dep eńirep , júregi qan jylap, taý asyp, tarydaı dúnıeniń tórt buryshyna shashylǵan qaıran qazaǵym! Sol kezden qansha sý aǵyp, qansha jyl aýysty. Biraq «Elim-aý!» dep eńirep, zar tartqan ún aqyn aǵalarymyzdyń qolyndaǵy qalam tartýyna sebepker boldy da, bolyp keledi.Týǵan jerine degen ystyq saǵynysh sezimi, perzenttik ystyq yqylasy, qanyna sińgen «balalyq borysh» degen tereń uǵym – bári de talaı keremet týyndylardyń dúnıege kelýine sebepker boldy.          Taǵy bir danalyqta «Otansyz adam – ormansyz bulbul » delingen. Ózimniń arǵy ata-babalarym sonaý 19 ǵasyrdyń 60-shy jyldarynda aq patshanyń otarshyldyq saıasatynyń saldarynan kóp qıynshylyq kórip, biraq tózimi taýsylǵan kezde Altaı taýlaryn asyp Mongolıa eline ketýge májbúr boldy. Iá, sol ketken sátte qandaı sezimde boldy deseńshi! Ata-babamyzdyń tól jerine, týǵan topyraǵymen qaýyshý múmkindigi tek bir ǵasyrdan astam ýaqyttan keıin ákelerimizge buıyrady. Jat elde júrgen jyldary balalaryna óz ana tilin umyttyrmaı, ata saltyn, ana sútin qadirleýdi jas býyn urpaqqa sińire bilgen. Jáne elge oralǵan kezde ózimen saqtalǵan baı mádenı qatpardyń ıegeri bola turyp, ony jergilikti halqynyń arasynda nasıhattap, tarata bastady. (Negizi úlgi alarlyq jaǵdaı).

Minekı, dalada 26 qarasha, 2018 jyl. Men , Avdolqyzy Sara osy oıtolǵaý joldaryn týǵan elimniń topyraǵynda bola turyp, zor maqtanyshpen, biraýyz sózimen jetkize alýǵa kelmeıtin keremet sezimde jazyp otyrmyn. Men qazaq qyzymyn! Men óz týǵan jerimdi maqtan tutyp, onyń órkendeýine bir tıtteı bolsyn úlesimdi qosýdamyn. Qalaı deseńder, árıne úzdik oqýmenen, úlgili tártippen, belsendiligimmen. Boıymdaǵy osyndaı keremet maqtanysh sezimdi keı kezde qatarlas turǵan balalarǵa túsiný qıynyraq bop turady. Sebebi men sol «taǵdyr tálkegine túsip, tarydaı shashylǵan mıllıon qazaqtyń urpaǵymyn». Ony jaqsy túsine turyp, men týǵan jerimniń qadir- qasıetin basqalarǵa qaraǵanda ózgeshe sezinemin. Sondyqtan bizden keıin keletin urpaqqa  Ahmet Baıtursynovtyń «yzyńdaǵan masasyndaı» bolyp , týǵan jerge degen perzenttik súıispenshilik sezimin boıyna sińirý – ózimniń mindetim dep bilemin. Qatarlas dostar, keler urpaq ! Bizdiń qolymyzǵa dúnıeniń bir keremetine teńeýge keletin  Týǵan jerimiz  bar. Onyń taýlary, tasy, sarqyrap aqqan kólderi men bulaqtary ótken tarıhtan syr shertip, qazaqqa óz tegin umyttyrmaýǵa zor kúsh beredi. Beıbitshilik zamanda taý , muhıt asyp, o jaqta keremet ómir izdemeı-aq týǵan elińe qyzmet qyl. Sonda ǵana balalyq boryshyń aqtalyp, keler urpaq týǵan jerinde, qazaq topyraǵyna tamyryn tereńge jiberip elimizdi «Máńgilik el» qylýyna senimim tolyq. Senderdiń qaryndastaryń Avdolqyzy Sara.

---