InfoHub Logo

QR Premer-Mınıstri Álıhan Smaıylovtyń tóraǵalyǵymen ótken keńeste bilim salasyn damytýdyń ózekti máseleleri qaraldy.

Oqý-aǵartý mınıstrligi halyqtyń áleýmettik osal tobynan shyqqan balalarǵa memlekettik tapsyrys sheńberinde jekemenshik mektepte oqý kezinde jappaı oqytý qorynan (mektep formasymen, tamaqpen qamtamasyz etý jáne t.b.) kómek alýǵa múmkindik berýdi usyndy.

Qazirgi ýaqytta bul norma memlekettik mektepterde ǵana qoldanylady. Premer-Mınıstr bul usynysty qoldady.

Sondaı-aq qıyn jaǵdaıǵa tap bolǵan jáne memlekettik tapsyrys alatyn balabaqshalarǵa barýǵa múmkindigi joq otbasylardan shyqqan balalar úshin tamaqtanýǵa aqy tóleý tetigin iske asyrý máselesi qaraldy.

Bul sharany 2023 jyldyń basynda iske qosylatyn «Otbasynyń sıfrlyq kartasy» servısi arqyly júzege asyrý usynyldy.

Aldaǵy ýaqytta azyq-túlik shyǵyndaryn tóleý úshin daǵdarys jaǵdaıyndaǵy otbasylardan shyqqan balalar anyqtalady.

Álıhan Smaıylov memlekettik organdardyń qajetti aqparattyq júıelerin ıntegrasıalaýdy aıaqtaýdy jáne osy bastamany qarjylandyrý tetigin pysyqtaýdy tapsyrdy.

Bul rette ol qarajat maqsatsyz paıdalanylmas úshin onyń tıimdi ıgerilýin baqylaýdy qamtamasyz etý qajettigine nazar aýdardy.

«Prezıdenttiń tapsyrmasy boıynsha biz bilim berýge qomaqty qarajat bólemiz jáne jańa bastamalardy iske asyrýǵa qosymsha aqsha bólýge daıynbyz, biraq sapa men tıisti baqylaýdy qamtamasyz etý qajet», — dedi Álıhan Smaıylov.

Sonymen qatar keńeske qatysýshylar ortalyqtandyrylǵan deńgeıde balabaqshalarǵa biryńǵaı kezekti iske qosý máselesin talqylady, bul búdjet qarajatyn únemdeýge jáne oryndardy bólý kezinde sybaılas jemqorlyqty boldyrmaýǵa múmkindik beredi.

Atap aıtqanda, ekinshi deńgeıdegi bank qosymshalary men Egov arqyly kezekke turý jáne tıisti joldama alý qarastyrylǵan.

Álıhan Smaıylov bul bastamany qoldap, jańa júıede uıymdastyrýshylyq tártipti, onyń ishinde qosarlanǵan kezekti boldyrmaýdy, balalardyń derekterin tekserýdi jáne t. b. tolyq qamtamasyz etýdiń mańyzyn atap ótti.

---