InfoHub Logo

— Aldymen kishi qyzym ketti. On úsh jyl buryn. Al byltyr úlken qyzymdy jerledim. Eki-aq bala kótergenmin. Ekeýi de joq endi. Ózim ǵana qaldym.

— Nemerelerińiz bar ma?

— Kishi qyzymda bala bolmady. Al Lıpanyń uly, odan bir qyz, bir ul shóberelerim bar. Qazir Kanadada. Bes jyl boldy kóship ketkenderine. Sheshelerin qoıǵanda da kele almady. Jalǵyzbyn. Jalǵyz turamyn. Seksen úshke kelip óstip jalǵyz qalamyn dep oılady deısiń be. Jas kezinde ádemi, tipti sulý bolǵan tárizdi. Janary solmaǵan. Júzin terezege buryp, alysqa qadalyp sóıleıdi.

Kózine uıqy tyǵyldy. Turyp ketý yńǵaısyz. «Qazir jylasa, myna kisi balamnyń bar ekenin bilip qoıady» dep oılady ol. Sodan soń páterine kirgizbek túgil mańynan júrgize qoımas.

— Shaıdy ysytaıyn ba?

— Men boldym. Óziń ishpeseń, áýre bolma.Ol basyn shaıqap, dastarhandaǵy bos keselerge qarady.

— Qazir turamyn, — dedi kempir, — qazir.

Qolyn stolǵa tirep kóterilmek boldy da kaıta otyrdy.

— Qazir, qazir.

Ol ornynan turyp, qoltyǵynan dememek bolyp edi, kempir:

— Ózim. Qazir ózim turamyn, — dedi.

Jaqtyrmaǵan syńaıly.

— Ózińiz bilińiz.

Dastarhandy retteýge kiristi.

— Nemerem telefon soqqan. Úırene almaı júrmin deıdi. Tili, salty basqa el ǵoı. Ózi de jer ortasyna keldi. Barǵan soń áıelimen ajyrasyp ketken.

— Nege?

— Áı! — kempir qolyn siltedi, — ózderi biledi de. Munda turǵanda da jetiskenderi shamaly  edi. Andreıdiń kózi taıa bere ol da qańǵyp  ketetin. Qyzyp keledi. Telefonmen sóılesedi. Meni kórmeıdi, estimeıdi dep oılaı m  eken. Men bárin sezemin.

— Shaı quıaıyn ba?

— Kishkene, bir jutym ǵana. Sodan keıin turamyn. Sharshadym. Jatý kerek.

— Al Tamara kaıta iship ketipti. Nan ustap ant berip edi endi aýzyma almaımyn dep. Zvondasam, mas bolyp otyr. Jaraıdy. Mine, turdym.

Shynymen, tyrmysyp kúsh jınady da ornynan kóterildi.

— Mine, kettim. Qolym kaqsap áketip bara jatyr. Aýa raıy buzylar ma eken. Ásirese shynashaǵym jan shydatar emes.

Ár qadamyn abaılap basyp, óz bólmesine bettegen kempirdiń daýysy alystap túsiniksiz kúmbirge aınalyp ketti. Azdan sońmúlde tynyshtalǵan. Jatsa kerek.

Ol as úıdi rettep bolyp óz bólmesine ótti.

Ernin tistep, eppen esikti japty.

— Kishkentaı balapan. Uıyqtamaı jatyrsyń ba? Meniń bópem jylamaıdy eken.

Jórgekterdi ashyp astyn kórdi de kóterip betine basty.

— Táttisiń ǵoı, kishkentaı. Orys apa mamaǵa ne deıdi? Orys apa Tamara kóke iship ketipti deı me? Tamarasy kim eken orys apanyń? Bizden páteraqy surasa ne betimizdi aıtamyz, bópem? Erteń aqsha berińder dese qaıtemiz. Seniń kózińdi qurt dese ne deımiz? Óltiremiz deısiń be? Sen qashan ósip mamaǵa kómektesesiń?

Muńaıa qalǵan ol kereýettiń ústine qolyndaǵy úlken, qyzyl bet qýyrshaqty qoıdy. Sodan keıin aýyr kúrsinip shamdy sóndirgen.

---