InfoHub Logo

Úkimettiń búgingi otyrysynda bilim jáne ǵylym mınıstri Erlan Saǵadıev «Altyn belgi» ıegerleri men xalyqaralyq olımpıada jeńimpazdarynyń barlyq oqýshylarmen birge ulttyq biryńǵaı testileýge qatysatynyn jetkizdi. Alaıda olar úshin bir jeńildik qarastyrylǵan.

Vıse-mınıstr Elmıra Sýxanberdıevanyń aıtýynsha, ulttyq biryńǵaı testileý kezinde «Altyn belgi» ıegeri qatardaǵy mektep oqýshysymen teń upaı jınasa, memlekettik grant dárejesi joǵary túlekke beriledi.

«Iá, jeńildik tek qatarlaspen teń upaı alǵan jaǵdaıda ǵana beriledi. Máselen, eger «Altyn belgi» ıegeri men tórt-beske oqyǵan bala birdeı upaı sanyn jınasa, onda memlekettik grant «Altyn belgi» ıegerine tapsyrylady. Degenmen, ondaı jaǵdaılar az. Sebebi «Altyn belgi» ıegerleri óz dárejesine saı bilimdi kórsetýge tyrysýy qajet», - deıdi E.Sýxanberdıeva.

UBT-nyń jańa formatyn talqylaý barysynda qoǵam tarapynan «Altyn belgi» ıegerlerin testileýden múldem bosatý týraly usynys bolǵan. Alaıda mınıstrlik ony qoldaǵan joq.

«Birinshiden, ulttyq biryńǵaı testileýden «Qazaqstan tarıxy» pánin alyp tastaýdy usynǵan. Shynymen de, qazirgi kezde ony eki ret: mektepte jáne test kezinde tapsyrady. Alaıda mınıstrlik ony qaldyrý qajet dep sanaıdy. Sebebi bul - óte mańyzdy pán. Ekinshiden, «Altyn belgi» ıegerleri, san alýan xalyqaralyq olımpıadalar men jobalardyń jeńimpazdaryn UBT-dan bosatý týraly usynys bolǵan. Biz ony da qoldaǵan joqpyz. Bizdińshe, ulttyq biryńǵaı testileýdi barlyq oqýshylar tapsyrýy tıis», - dedi E.Saǵadıev.

Aıta keteıik, kelesi jyldan bastap túlekter mektep dıplomyn alý úshin bólek emtıxan tapsyrady. Al joǵary oqý ornyna túsý úshin biryńǵaı ulttyq testileýdi tapsyrý qajet. UBT-da «Altyn belgi» ataǵyn dáleldeýdiń qajeti joq. Ony mektepterdiń ózderi rastaıdy.

---