InfoHub Logo

Úkimettiń búgingi otyrysynda Ulttyq biryńǵaı testileýdiń jańa formatyn tanystyrǵan bilim jáne ǵylym mınıstri Erlan Saǵadıev test suraqtarynyń 120-ǵa deıin azaıǵanyn, alaıda keıbir tapsyrmalar boıynsha eki upaı alýǵa bolatynyn jetkizdi. 

Sóıtip, UBT-dan eń joǵary - 140 upaıdy jınaýǵa múmkindik bar. Joǵary jáne joǵary oqý ornynan keıingi bilim departamentiniń dırektory Darhan Ahmed-Zakı atalǵan eki upaı qaı pánderdiń suraqtary boıynsha beriletinin túsindirip berdi.

"Ulttyq biryńǵaı testileý kezinde ondaı suraqtar mektep túlegi ózi tańdaıtyn profıldi pánderdiń ishinde bolady. Negizgi úsh pánde ol suraqtar bolmaıdy", - dep atap kórsetti D.Axmed-Zakı.

Al mektepke deıingi jáne orta bilim departamentiniń dırektory Jańyl Jontaeva bir suraqtan eki upaı alýdyń jolyn túsindirip berdi. "Bir suraqtyń ishinde eki durys jaýap bolady. Máselen, "Otan soǵysy qandaı jaǵdaıda boldy?" degen suraqtyń ishinde bes jaýap bolsa, sonyń ekeýi durys jaýap bolyp sanalady. Bireýi belgilense, bir upaı, ekeýin de durys tapsa, eki upaı beriledi",- dep atap kórsetti J.Jontaeva. Onyń aıtýynsha, bundaı tapsyrmalar mektep emtıxanynda da bolady. Sebebi eki pán testpen qabyldanady.

Aıta keteıik,  Úkimettiń búgingi otyrysynda QR Bilim jáne ǵylym mınıstrligi Erlan Saǵadıev ulttyq biryńǵaı testileýdiń jańa formaty boıynsha esep berdi. Kelesi jyldan bastap túlekter mektep dıplomyn alý úshin emtıxan tapsyrady. Al joǵary oqý ornyna túsý úshin Ulttyq biryńǵaı testileýdi tapsyrý qajet.

Mınıstrdiń aıtýynsha, mektepti bitirgen kezdegi emtıxan bes pán boıynsha ótkiziledi. Sonyń ishinde tórteýi mindetti, bireýi oqýshynyń tańdaýyna qaraı qabyldanady. "Búginde barlyq mektepterde ondaı emtıxandar bar. Ony Ulttyq biryńǵaı testileýge barmaǵandar tapsyryp júr. Sondyqtan eshqandaı ózgerister joq. Bir jańalyq, buǵan deıin emtıxan suraqtaryn oblystyq bilim berý basqarmalary daıyndasa, endi eki pán boıynsha test tapsyrmalaryn Ulttyq testileý ortalyǵy ázirleıtin bolady. Negizi, test suraqtary daıyn. Sondyqtan mektepterde ol suraqtardy synaqtan ótkizýge bolady", - deıdi E.Saǵadıev.

Sondaı-aq, ulttyq biryńǵaı testileýdiń jańa formatyna sáıkes, "Altyn belgi" ataǵyn mektepterdiń ózderi rastaıdy. Ony ulttyq biryńǵaı testileý kezinde dáleldeýdiń qajeti joq.

"Al ulttyq biryńǵaı testileýdiń ózi joǵary oqý ornyna túsý jáne memlekettik granttardy taratý úshin ótkiziledi. Testileýdiń formaty da ózgerip otyr. Buǵan deıin bes pán boıynsha 125 suraq bolǵan. Sonyń ishinde tek tórt pánniń 100 jaýaby ǵana eskerilse, jańa format boıynsha 120 suraq bolady. Barlyǵy eskeriledi. Eń joǵary upaı sany - 140. Sebebi keıbir suraqtar boıynsha eki upaı alýǵa múmkindik bar. Sóıtip, ulttyq biryńǵaı testileý birte-birte SIT-ge (System Integration Test) aýysyp otyr. Testileý kezinde úsh mindetti jáne eki salalyq pánder bolady"- dep atap kórsetti mınıstr.

 

---