InfoHub Logo

Ulttyq biryńǵaı testileý... Ár túlek estigen sátte erekshe kúıge bóleıtin 3 aýyz sóz. Qýaný sezimine qaraǵanda, qorqynysh sezimi basymyraq bolary anyq. Eń mańyzdysy — bul testti ár túlek, ár ata-ana ózinshe túsinedi. Keıbiri meniń bolashaǵymdy osy test sheshedi dese, keıbiri tek jeńildikpen qaraıdy. Kóp túlekter "jurttyń balalarynan" basym túsý úshin tapsyrýy da kóz qýanarlyq jáıt emes. Basqasha turǵydan alǵanda óz balasyna qoldaý ornyna qysym kórsetip:"qaıtseń de osy baldy qanjyǵańa enshileýiń kerek", — dep talap qoıatyn ata-analar da az emes. Árıne, ár ata-ana baýyr eti balasynyń bolashaǵy úshin alańdaıdy. Ol — zańdylyq. Alaıda, ata-ana tek bolashaqqa baǵyt-baǵdar berýshi. Sońǵy mańyzdy núkteni túlektiń ózi qoıýy qajet degen oıdamyn. Bul oıymmen kóp túlekter kelisetin shyǵar.

Dál osy test úshin óz ómirin ózi qıǵan túlekter de jeterlik. Júrekti qynjyltatyn jaǵdaıdyń biri-osy. Nelikten óz ómirine ózi balta shapty? Testte joǵary nátıje kórsete almaǵany úshin be? Álde aınaladaǵy adamdardyń sózinen seskendi me? Múmkin úkilep úmit artyp otyrǵan ata-anasynyń úmitin aqtaı almaǵany úshin shyǵar... Bul suraq qoıylǵanda kóp adamdar únsiz qalary sózsiz. Bul jaǵdaıǵa kim kináli? UBT uǵymyn qate túsingen túlek pe? Álde test suraqtaryn qurastyrýshy ortalyqtar ma? Bálkim durys bilim bere almaǵan muǵalim kináli shyǵar. . Meniń oıymsha, bul qaıǵyly jaǵdaı oryn alǵanyna barlyǵy kináli. Bolashaqta bizdi ne kútip turǵanyn eshkim de bilmeıdi. Boljap ta aıta almaıdy. Sondyqtan, ár túrli jaǵdaıǵa psıhologıalyq turǵydan da, basqa jaǵynan da daıyn bolǵan durys bolar. Ata-ana óz balasyna senetindigin, bári jaqsy bolatynyn jetkizip otyrsa, muǵalimder qysym jasamasa, barlyǵy jaqsy bolatynyna senemin.

Testti joǵary nátıjede tapsyrdyń delik. Qandaı jaǵdaı oryn alady? Al tapsyra almasań she? Degenmen, "Jaqsy sóz — jarym yrys". Testti jaqsy nátıjede tapsyrdyń. Eń aldymen kimniń jetistigi? Kóz maıyn taýysyp oqyǵan oqýshynyń ba? Álde oqytýshynyń ba? Ne desek te, eńsesin bıik kótergen ata-ana, úmiti aqtalǵan muǵalim jáne eńbegi aqtalǵan oqýshy bolary haq. Al tapsyra almaǵan jaǵdaıda she? Kim kináli? Árıne, bul-oqýshy múldem eńbektenbedi degendi bildirmeıdi. Tek "Baq shaba ma, álde, bap shaba ma? ", -dep aıtqanymyz durysyraq bolar. Degenmen, jaqsy nátıjege qol jeetkize almaǵan jaǵdaıda oqýshynyń saǵy synary anyq. Taǵy da kóz qýantarlyq jaǵdaı emes. . Test ortalyqtarynda qaptaǵan mılısıa qyzmetkerleri, jedel járdem kólikteri, órt sóndirýshiler, kúızeliske túsken túlekter men balasy úshin janyn shúberekke túıgen ata-analar. Dál osy kórinister de túlekke psıhologıalyq turǵydan úlken  áserin tıgizeri aıdan anyq.

Taǵy aıta ketetin jaıt-barlyq túek óz kúshimen testty tapsyryp, grant ıegeri atandy desek taǵy bolmaıdy. Bákeń men Sákeńniń balalary bar degendeı... Kózben kórip, qulaqpen estip júrgennen keıin úndemeı qala almadym. Jalpaq tilmen aıtqanda — "korrýpsıa". Bul qanshalyqty durys? Jyl boıy kóz maıyn taýysyp, eńbektenip oqyǵan oqýshynyń eńbeginiń zaıa ketkeni me? Taǵy jaýapsyz suraq. Biraq, kimge dáleldeı alasyń? Meniń bilimim shynaıy, olardiki shynaıy emes dep... Jandy qynjyltatyn osy jaǵdaı taǵy  bar. Ne degenmen, jaqsylyqqa sengenimiz durys bolar.

Nelikten óz maqalama dál osy taqyrypty arqaý ettim dep oılaısyzdar? Osy suraqqa jaýap izdep kóreıik. Eń basty sebep-men 2018-2019 oqý jylynyń túlegimin. Iaǵnı, 11 jyl oqyp bilim alǵan, baqytty balalyq shaǵym ótken aıaýly mektebimnen ushyp ketkeli otyrmyn. Alda meni ómirimniń mańyzdy 1 baspaldaǵy UBT kútip tur. Qatty ýaıymdaýdyń qajeti joq degen oıdamyn. Biraq, aıtar aýyzǵa-árıne ońaı. Ýaıymdamaımyn degenmen de túnde uıyqtar aldynda, tilek tilegende, armanyń jaıly oılaǵanda eń aldymen til ushyna keleri — UBT dan jaqsy nátıje kórsetip, ata-anamnyń, otbasymnyń úkilegen úmitin aqtap, grant ıegeri atansam degen sóz tirkesteri. Ýaqyt jaqyndaǵan saıyn júregiń qattyraq soǵyp, ýaqyttyń zýyldap ótip jatqany seziledi. Qorqynysh kúıin keshesiń. Túlekter, tek óz bilimimizge seneıik! UBT — alynbaıtyn qamal emes. Biz-Qazaqstannyń bolashaǵymyz! Bizdiń qolymyzdan keledi! 11 jyl tekke júrmeı, bilim nárimen sýsyndaǵanymyzdy dáleldeıtin ýaqyt keldi! Barlyǵy jaqsy bolaryna seneıik!

Óz sózimdi qorytyndylaı kele, barsha túlekterge sáttilikpen qosa sabyrlylyq ta tilegim keledi. Qurmetti ata-analar, óz balalaryńyzǵa senińizder, ár bastamasynda qoldaý kórsetip, jaqsylyqqa sendirińizder! Bul sózder-árbir mektep bitirýshi túlek úshin aýadaı qajet sózder. "Grant" — eń bastysy emes. Eń bastysy-balańyzdyń bolashaǵy men onyń ómiri jáne taýynyń shaǵylmaýy. Grant — tek birneshe jylǵa beriledi. Al balańyzdyń ómiri men kóńili — máńgilik!

Daıyndaǵan: 11 "Á" synyp oqýshysy

Nurmuhanbet Nuraılym

---