InfoHub Logo

Aqyryn júrip anyq bas,

Eńbegiń ketpes dalaǵa.

Ustazdyq etken jalyqpas,

Úıretýden balaǵa, — dep uly oıshyl atamyz Abaı Qunanbaıuly jyrlaǵandaı, ómirdegi kóp mamandyqtardyń ishinde jan — jaqty bilimdilikti, ıkemdilikti, sheberlikti, erekshe shákirt jandylyqty, meıirimdilikti asa  qajet etetin — ustazdyq mamandyq . Ustaz. . Ár adam oıǵa alǵanda ezýine kúlki oralyp, alǵash ret bilim kúninde bir qushaq gúlin alyp, ata — anasy jetektep ertip aparǵan bilim ordasyn kórgen sáttegi alǵashqy ustazyna amandasyp, syńǵyrlaǵan qońyraý únin estip, aıańdaı basyp mektep tabaldyryǵyn attap, alǵashqy synybynyń partasyna otyryp, sol sáttegi tańsyq dúnıe — qolyna qalam alǵan sáti oralady degen oıdamyn. Eń alǵashynda óte qatal jandy, ıaǵnı muǵalim kórgendeı bolary sózsiz. Sebebi dál ózim osy jaǵdaıdy bastan keshken bolatynmyn. Biraq keıinnen óziniń ekinshi anasyndaı jaqyn tartyp, meıirlene álippe áripterin úıretip, jaqsydan úırenip, jamannan jırenýge, bilimdi azamat pen azamatsha bolýǵa jeteleıtin ustazynan jaqyn jan joq ekenin túsinedi.

Bilim — sheti men shegi joq telegeı teńiz bolsa, sol teńizdiń sánin keltirip, baıyppen ǵana ár shákirt júregine jol taýyp, sonyń kiltin asha bilgen aq jelkendi keme — ardaqty ustazdarymyz. Birinshi synyptan — on birinshi synypqa deıin esimizdi tolyq bilmeıtin, ár jáıt túsiniksiz bolyp kórinetin sátimizde qolǵa qalam ustaýdan bastap, ár ǵylym salasynyń qyr — syryn úıretip, jetik meńgertken, bilim nárimen sýsyndatyp, elimizdiń bir kirpishi bolyp qalanatyn azamat bolýǵa tárbıelegen altyn uıa mektebimniń aınasy, ustazdar qaýymyna alǵysym sheksiz.

Shyn ustaz — ustaz bolýdy balalyq shaǵynan armandaıdy degen oıdamyn. Qıyndyǵy men qyzyǵy qatar júretin osynaý mamandyqtyń shynaıy ıesi bolý úshin kóptegen qıyndyqtardan ótedi. Qıyn deý sebebim:ár sabaǵyńa jete daıyndayp, balalarǵa bilim berip qana qoımaı, tálim — tárbıe berý, ómirge ıkemdeý, adaldyqqa baýlý, sonymen qatar adamgershilik qasıetterdi boıyna darytý ońaı emes sharýa. "Ustaz bolý — óz ýaqytyńdy aıamaý, ózgeniń ýaqytyn aıalaý", — dep Muhtar Áýezov aıtqandaı, ýaqytpen sanaspaı balalardyń bolashaǵy úshin aıanbaı jumys jasasań, eńbegiń esh ketpesine senimdimin. Qansha jyldar boıy  ter tógip, eńbek etseń de, "boldym, toıdym, men bárin de bilemin" dep aıtý taǵy orynsyz. Ómir bir orynda turyp qalmaıdy, únemi tek alǵa jyljý ústinde. Osyǵan oraı jańa zamannyń jańa adamyn tárbıelep, oqytý úshin únemi izdenis ústinde júrip, bilimdiligimen qatar biliktiligin de arttyryp otyrý qajet.

Meniń pikirimshe, sonymen qatar ǵıbratty ǵumyrynyń qymbat shaqtaryn bolashaq býyndardy oqytý men tárbıeleý isine arnap keledi. Óz isine berilgen, shákirtiniń janyna nur quıa bilgen ustazdarymyzdyń eńbegi óte zor. Mekteptegi shákirtin óz balalarynan artyq kórip, bar nazaryn shákirtine aýdaryp, ýaqytynyń kóp bóligin mektepte ótkizetin ustazdar qaýymynyń shákirtteri úlken shyńdardy baǵyndyrǵan sátte ózi sol shynar shyńnyń eń bıigine shyǵyp turǵandaı erekshe kúıge bólenip, ózinen shákirtiniń ozǵanyn kórip, qýanyshynyń eki eseleneri sózsiz. Meniń pikirimshe, ár shákirtine erekshe súıispenshilikpen, erekshe kózqaraspen qaraıtyn ustazdar úshin ár shákirtiniń óz eńbegin aqtaǵanyn kórip, rızashylyǵyn alý úlken qýanysh ákeledi.

Aspan álemin baǵyndyrǵan ǵaryshker de, elimizdiń kók baıraǵyn kókke jelbiretip júrgen sportshylarymyz da, Qazaqstannyń atyn bar álemge áıgili etip júrgen birtýar azamattarymyz da eń alǵashynda ustazdardan tálim — tárbıe jáne eń bastysy bilim alǵan. Ustaz degen uly esimdi qurmetteı, syılaı bileıik, jas býyn. Óz maqalamdy elbasymyz Nursultan Ábishuly Nazarbaevtyń sózimen aıaqtaǵym kelip otyr: "Bolashaqta eńbek etip, ómir súretinder — búgingi mektep oqýshylary, muǵalim olardy qalaı tárbıelese, Qazaqstan sol deńgeıde bolady. Sondyqtan ustazǵa júkteletin júk aýyr". HHİ ǵasyr — bilimdiler ǵasyry. Endeshe bizge oı órisi joǵary damyǵan, zerdeli, jan — jaqty damyǵan, parasatty urpaq kerek ekenin bir sátte esten shyǵarmaǵanymyz jón. Bilikti de bilimdi ustazdarymyz barda kelesi urpaq bilimdi bolary haq.

 

Daıyndaǵan:11 "Á" synyp oqýshysy

Nurmuhanbet Nuraılym 

---