InfoHub Logo

Parlament Májilisiniń depýtaty Irına Smırnova bilim berý salasyna bólinetin qarjyny kóbeıtip, muǵalimderdiń jalaqysyn kóterý boıynsha Úkimetke joldaǵan depýtattyq saýalyna jaýap aldy. Onyń aıtýynsha, jaýap xatty daıyndaǵandar ony durys túsinbedi, dep xabarlaıdy QazAqparat.

"Iá, Úkimetten jaýap keldi. Árıne, ondaı aqshanyń bilim berý salasyna bólingeni jaqsy bolar edi deıdi. Biraq, ázirshe biz ekonomıkalyq kúsh-qýatymyz jaǵynan Ekonomıkalyq yntymaqtastyq jáne damý uıymyna kiretin eldermen teńese almaıdy ekenbiz. Sol sebepti dál qazir bilim berý salasyna qyrýar qarjyny bólgen jaǵdaıda birden oń nátıjege jetý qıyn deıdi. Alaıda men óz depýtattyq saýalymdy joldaǵanda jaı qyrýar aqshany bere salyńdar dep aıtqan joqpyn. Ol aqsha jetispeı jatyr degenmin. Sondyqtan aqsha jetpeı tursa, ony ashyq aıtý kerek. Mektepterdi qarjylandyrý kólemi aıtarlyqtaı dárejede emes, muǵalimder laıyqty jalaqysyn almaı otyr. Osyny ashyq aıtý qajet. Sosyn aldaǵy ýaqytta bilim berý salasyndaǵy jaǵdaı qalaı ózgeredi? Onyń bolashaǵyna bir kóz tastap, nendeı oń ózgerister bolady? Bir úmit otyn jaǵyp qoısa da bolady ǵoı. Al maǵan joldaǵan xatta qur ondaı aqshany bóle almaımyz dep jazǵan. Negizi, ondaı aqshany tabýǵa bolady. İzdese, tabylady", - dedi I.Smırnova.

Depýtattyń oıynsha, muǵalimderdiń jalaqysy bir stavka úshin, kem degende, 150 000 teńge bolýy qajet. Al klass jetekshiligi men san alýan ádistemelik jumystardy qosqanda 200 000 teńge tólense, qazaqstandyq muǵalimderdiń qatary sıremeı, kerisinshe, kásibı mamandarmen tolyǵatyn edi. "Muǵalimderdiń eńbegin laıyqty baǵalaý máselesin qaperden eshqashan shyǵarmaý qajet. Eger biz olardyń jalaqysyn ósirmesek, bilim berý salasyna aqshany kóptep bólmesek, onda ol aqshany basqa salalarǵa bólýdiń eshbir qajeti joq", - dep atap kórsetti I.Smırnova.

Aıta keteıik, qyrkúıek aıynda ótken QR Parlament Májilisiniń otyrysynda depýtat Irına Smırnova bilim berý salasyn qarjylandyrý máselesin kóterip, qazaqstandyq muǵalimderdiń jalaqysy tym az ekenin jetkizdi. Halyq qalaýlysy sonyń bárin depýtattyq saýalda kórsetip, ony Úkimet basshysynyń atyna joldady. Depýtattyń aıtýynsha, búginde Danıa, Islandıa jáne taǵy basqa Eýropa memleketterinde bilim berý salasyn qarjylandyrý kólemi ishki jalpy ónimge shaqqanda 6-9 paıyzdy qurap otyr. Sonyń nátıjesinde Germanıa sıaqty elde muǵalimderdiń jalaqysy 4 myń eýroǵa deıin jetedi. Kórshi Qytaıda mektep muǵalimderi, kem degende, 1 myń AQSH dollaryn alady. "Bizde bolsa, muǵalimderdiń eńbekaqysy 40-50 myń teńgeni quraıdy. Synyp jetekshiligi úshin 5-aq myń qosady. Ondaı júıemen bilim berý salasyn damytý qıyn. Qazaqstan da bilim berý salasyn qarjylandyrý kólemin ishki jalpy ónimge shaqqanda 6-9 paıyzǵa deıin jetkizýi tıis", - deıdi depýtat Smırnova.

---