InfoHub Logo

Saýdyraǵan súıegin súıretip bir shal kele jatyr. Tekten-tek kele jatqan joq, shym-shytyryq oı oılap keledi ol:

«Óz salmaǵyńdy óziń kótere almaǵannan qıyn joq...»

«Mynaý avtomobılder jyn qýǵandaı zymyraıdy...»

«Salmaǵyń azaıǵan saıyn shamań azaıatyny qyzyq eken...»

«San tústi, san túrli netken ásem avtomobılder bar deseńshi!..»

«Meniń salmaǵym qansha deısiń? Elý kılogramm ba? Jo-ǵa! Myqtaǵanda qyryq bes shyǵar!..»

Ol kúrkildep jóteldi. Sonsoń kúrsindi:

«Osyndaı ómir keshemin dep kim oılaǵan... Shirkin-aı, tym qurysa eki toqashqa, bir stakan ystyq shaıǵa jetetin tıyn-sıynym bolsashy...»

Avtomobılder jyn qýǵandaı zymyrap ótip jatyr.

Jaltyldaǵan kókshil lımýzın kórinedi. Rýlin áıel ustap otyr, — ańsap júrgen ánińdeı ásem-aq! Shashy jibekshe jelbiregen. Avtomobıl júrisin baıaýlatty. Shal rúldegi áıeldiń ózine tesile qaraǵanyn ańǵarǵandaı boldy.

Arýaqtaı aryq shal: «Maǵan jetpeı júrgeni jelókpelik edi!» dep ishteı kúldi.

Jaltyldaǵan kókshil lımýzın ozyńqyrap baryp toqtady. Shal janynan óte bergende áıel terezeden basyn shyǵaryp qarady. Iá, shal qatelespepti, áıel oǵan kóz salyp otyr.

Kókshil lımýzın taǵy da ozyńqyrap baryp toqtady. Áıel kózin alar emes. Álde basqa bireýmen shatastyryp kele me? Álde jany ashyǵany shyǵar? «Men osyǵan unap qalmaıyn?» dep shal ishteı qýlanyp qoıdy.

Kókshil lımýzın bir júredi, bir toqtaıdy. Shal kósheniń oń jaǵyna ótti. Sulý áıel endi oǵan mashınasynyń oń jaq terezesinen qarady. Shal: «Jigit shaǵynda symbatty-aq edim», dep oılap, eńsesin kóterińkirep aıańdady.

Ol kósheniń sol jaǵyna qaıta ótti. Kókshil lımýzın janasalap kelip toqtady da, áıel:

— Esikti ash ta, kel, otyr! — dep daýystady.

Shal sasyp qaldy. Biraq, áıeldiń jymıysy dereý jiger berip, ol qalbalaqtap baryp mashınaǵa otyrdy. Lımýzın jaılap syrǵı jóneldi. Áıelde ún joq. Shal da úndeı almady. Lımýzın úlken úıdiń aldyna toqtady. Syrtqy esikte qarsy alǵan qyzmetshi áıel shalǵa shoshyna qarady.

Olar jasaý-jıhazdy bólmege kirisimen-aq áıel:

— Sheshin! — dep buıyrdy shalǵa.

— Ámirińizge quldyq, tek jýynyp alaıyn.

— Sheshin dedim ǵoı men!

«Shydaı almaı turǵanyna qaraǵanda, yndyny keýip júrgen boldy». Shal qyryq jamaý kir kóılegin sheship tastaı berdi.

— Shalbaryńdy da shesh!

Shaldyń endi esh kúmáni qalmady. İshi ulyp turǵan ash ekenin de, dińkesi quryp sharshaǵanyn da umytyp, sulýdyń dalıǵan myqyny men dirildegen tósine ashqaraqtana qarady. «Tańdanatyn ne bar? — dep oılady ol. — Meni qalady. Júregimen uqty da unatty meni!»

Shal: «A, qudaı, óziń qýat ber, qor qyla kórme!» dep ishteı jalbaryndy da, shalbaryn sheship tastap, áıelge qaraı aıaq basty.

— Dambalyńdy da shesh! — dep buıyrdy áıel. Qońyraýdy qaǵyp qalyp edi, ózi sıaqty jalpıǵan qyzmetshi áıel jetip keldi.

Shal sasqalaqtap qaldy. «Bulary jaramaıdy! — dedi ol ishteı. — Meniń jasymda ekeýine birdeı shama jetý qaıda!»

Qojaıyn áıel:

— Tárbıeshige aıt, balalardy ertip kelsin! — dedi qyzmetshisine.

Qyzmetshisi shyǵyp ketti. Tyrjalańash bop shal tur. Dir-dir etedi. Ne tońǵany, ne tolqyǵany. Opasyzdyq jasaǵan kúıeýinen ese qaıtarýǵa asyqqan bir áıel kóshede kez kele ketken bir beıtanys erkekti úıine alyp barypty degendi estigen ol. «Myna áıel de meni eregestiń ermegi etpek-aý» dep oılady shal. Ol basqaǵa jaramasa da, árıne, ermekke jaraıtyn edi.

Tárbıeshi, qyzmetshi jáne úni balaqaı kirdi. Balalardyń ekeýi — qyz, bireý — ul; úlkeni on jasta, kishisi alty jasta bolar. Úsheýi de perishtedeı.

«Qyzmetshini de, tárbıeshini de qoıshy, táýekel, — dep oılady shal, — al myna balalardyń kózinshe...»

Shaldyń moıny qyldyryqtaı, aıaq-qoly erbıgen qý shybyqtaı. Qabyrǵasyn kóz jeter jerden sanap alýǵa bolatyn. Tiri adam sıaqty emes, saltaq-saltaq sary terimen qaptap qoıǵan qý súıek sekildi...

Qojaıyn áıel:

— Ásel tamaq ishti me? — dedi tárbıeshige.

— Azǵantaı ǵana ishti. Kofesin ishpeı qoıdy, — dep jaýap berdi tárbıeshi.

— Geksel she?

— Ol múlde ishken joq.

— Alǵan she?

— Shokoladtan bir tistedi de qoıdy.

Ásem áıel kir-qojalaq shaldy balalarǵa nusqap kórsetip:

— Myna kisini kórdińder me? — dedi. — Bul ábden júdep, taramysyna ǵana ilinip tur. Eger tamaq ishpeseńder, sender de dál osyndaı bolyp qýrap qalasyńdar!

Shoshyp ketken úsh perishte shesheleriniń dalıǵan myqynyn panalady. Ańsaǵan ándeı ásem áıel:

— Tez kıin de, qarańdy batyr! — dep aqyrdy shalǵa.

Orysshadan aýdarǵan ǴABBAS QABYSHEV

---