InfoHub Logo

Ár sabaǵy bolyp ótip taǵylym,
Ár shákirttiń oıatatyn tanymyn.
Meıli, eseıip ketse de sol ul-qyzy,
Sanasynda júre berer áli kún,
Ustaz degen – mártebeli bir esim.

Ómiriniń maǵynaly shaqtary
Mektep bolyp, sodan baqty tapqany.
Ustaz degen – sol uıanyń júregi,
Ustaz degen – sol ujymnyń maqtany.

(Ustazdyq qyzmetten qurmetti demalysyna shyǵyp jatqan ustazǵa keıingi býyn áriptesiniń quttyqtaý sózi)

Qurmetti Ustaz!

Ózińiz de bir kezdegi ómir jolyńyzda osynaý mekteptiń tabaldyryǵynan jas ustaz bolyp attaǵan edińiz. Osy bir kezderińiz týraly san ret oılanǵanymyzda ózińizden keıin kelgen áriptesterińiz – bizder úshin osynyń ózi qyzyqty, osynyń ózi taǵylym bolyp kóringen edi. Sebebi eshqandaı ustaz búginimen ǵana ómir súretin shákirt tárbıelemeıdi, keshe men búginniń, búgin men erteńniń shákirt boıynda ádemi úılesimdilik taýyp otyrýy – ustazdyq qyzmettiń eń basty ólshemderiniń biri.

Siz ómirlik tájirıbeńizdi de, ustazdyq tájirıbeńizdi de osynaý mektebińizde ustaz bop júrip jınadyńyz. Úlgili ata-ana, ulaǵatty muǵalim boldyńyz. Shákirt júregine jol taptyńyz. Mektep bitirip ketken qanshama túlekterdiń ónegesinde Sizdiń ustazdyq qyzmetińizdiń qoltańbasy jatyr deseńizshi!

Osynaý bilim ordasyna sizden keıin kelip, qazir ustazdyq qyzmettiń ujymyndaǵy orta býyndy quraıtyn bizdiń ózimiz Sizderden tálim alǵanymyz, Sizderden úırengenimiz kúni keshe ǵana sıaqty edi, endi bizdiń ózimizdiń de izimizge jas ustazdar ere bastapty. Dástúr osylaı jalǵasady.

Sizder shákirt tárbıelep qana qoıǵan joqsyzdar, ózderińizden keıin kelgen áriptesterińizge de jol kórsettińizder, úlgi-ónege bola aldyńyzdar. Bul ár ýaqytta aǵa býyn úshin zor mindet ári abyroıly maqtanysh edi.

Eger dál osy kezeńde ustazdyq qyzmettiń bel ortasynda júrgen bizder úshin de óz boıymyzda ustazǵa tán qasıetterdiń baı jıyntyǵy qalyptasqan bolsa, onda munyń ar jaǵynda sizderden úırengen tálimniń de ushtyǵy jatyr. Eger biz boıymyzda qalyptasqan osynaý qasıetterdiń asyl legin ózimizden keıin kelgen býyn men óz shákirtterimizdiń boıyna sińire alsaq, onda munyń da ón boıynda sizderden úırengen tájirıbeniń tálimi bar.

Endi, mine, aldyńǵy býyn – sizder de óz ujymdaryńyzdan qurmetti demalysqa shyǵyp bara jatyrsyzdar.

Qurmetti Ustaz!

Sizdi áriptesterińiz osynaý merekeli sátpen quttyqtaı otyryp, ózińiz ben otbasyńyzǵa bereke-birlik, myqty densaýlyq tileıdi.

Igi tilekpen: ujymyńyz, áriptesterińiz

---