InfoHub Logo

Erke qyz ben mysyq búgin de Ǵajaıyp ormanǵa jol tartty. Jolda Dúkenshi aǵaıdyń «Tek paıdaly zattar» satatyn dúkeninen balqaımaq pen jemis shyrynyn aldy. Bul ormannyń jaı orman emes, Ǵajaıyp orman ekenin biletin bolarsyń, balaqaı. Erke qyz ashyq alańqaıda ósip turǵan ádemi gúlderdi kórip, bir-ekeýin julyp almaqshy bolyp edi, gúlder syńǵyrlap kúlip qoıa berdi:

Erke qyz-aý, erke qyz,
Biz de sizdeı erkemiz.

Erke qyz sóıleıtin gúldi alǵash ret kórýde. Ańtarylyp qaldy. Mysyq bul ormandaǵy barlyq ósimdikter men janýarlardyń sóıleı alatynyn eskertken edi. Umytyp qalypty. Gúlder bir-birine sybyrlaǵandaı, syńǵyrlaı kúlip:

— Erke qyz, kóılegiń men taqıańdaǵy oıýlar qandaı ádemi, a?-dedi súısingenderin jasyra almaı. Erke qyz jymıyp,

— Iá, rahmet. Bul bizdiń qazaqtyń ulttyq oıýy-bota moıyn. Anam meniń barlyq kıimderimdi osylaı sándep bergen,-dedi maqtanyshpen. Gúlder jupar ıisterin Erke qyzǵa shashyp berdi. Erke qyz alǵys aıtyp, gúldermen qoshtasyp, mysyq ekeýi ary qaraı júrip ketti.  
Ekeýiniń aldynan ádemi úıshik shyqty. Jańadan salynǵan sıaqty. Biraq janynda qabaqtary túsip tunjyraǵan aıý, qoıan, tıin jáne kishkentaı tyshqan otyr. Mysyq olardan ne bolǵanyn surady. Sóıtse, ol tórteýi dos eken. Birigip úı salmaqshy bolypty. Biraq úı salýdy bastaǵan kezde, tyshqan «men kishkenemin, bórene basyp ketedi» dep, árnárseni syltaýratyp, oınap ketipti. Sonymen aıý, qoıan, tıin árqaısysy ózderine bólme salyp, tyshqanǵa bólme salýdy umytyp ketken eken. Endi tyshqan qaıda turady dep bastary qatyp otyr. Erke qyzdyń da kishkentaı tyshqanǵa jany ashyp ketti. Bizdiń mysyq tapqyr ǵoı!

— Oǵan nege bas qatyrasyńdar? Tyshqan kishkentaı. Kez kelgen jerge sıady. Sender árqaısyń óz bólmelerińnen  kishkene tesik jasańdar. Tyshqan sol tesikten ótip, qalaǵan bólmesinde tura beredi,-dep keremet usynys aıtty

Tabylǵan aqyl! Bári qýanyp ketti. Endi bir úıde tórt dos birge tura alatyn boldy. Mysyq taban astynda tyshqanǵa arnap óleń de shyǵaryp jiberdi.
Jalqaý bolma, tyshqanjan,
Dostaryńmen eńbekten.
Jalǵyz júrgen jaraspas,
İs bitedi tek kóppen.

Tatý bolsa jan dostar,
Bárin ońaı bolady.
Birge kúlip, birge oınap,
Úlken úı de salady.

Óleńdi estip bári kúlip jiberdi. Al tyshqan bolsa uıalyp qaldy. Erke qyz tyshqanǵa budan bylaı eńbek etýden qashpaýdy eskertti. Dostar únemi barlyq qıyndyqta birge bolý kerek ekenin aıtty. Tyshqan dostarynan keshirim surady.

Ǵajaıyp ormandy aralap, kóptegen qyzyqqa kenelgen Erke qyz ben mysyq kún batpaı úılerine oraldy. Sál keshikkenderi úshin anasy azdap eskertý aıtqany bolmasa, Erke qyz ben mysyqtyń búgingi kúnderi óte sátti ótti. Kúni boıy orman aralap, ábden sharshaǵan Erke qyz erte uıqyǵa jatty. Túsinde ǵajaıyp ormandy kórdi. Bizdiń aqyldy mysyǵymyz da sharshaǵan kórinedi. Peshtiń túbinde pyryldap uıyqtap jatyr.
Balaqaı, seniń eńbekqor ekenińe senimdimin. Dostaryńmen de tatý shyǵarsyń, ıá? Jaraısyń!

---