InfoHub Logo

Balanyń bos ýaqytyn qalaısha tıimdi ótkizýge bolady? Bul suraqqa árbir ata-ana ózinshe jaýap beredi. Biri balany túrli úıirmeler men qosymshalarǵa, sporttyq seksıalarǵa aparsa, ekinshisi kerisinshe, mektep baǵdarlamasynan ózgeniń barlyǵyn «bos áýreshilikke» teńeıdi. Mamandardyń pikirinshe, bastaýysh synyp oqýshylaryna aptasyna 1-2 qosymsha sabaq jetkilikti bolsa, odan sál úlken balalarǵa bir mezette 2-3 úıirmege qatysý qıyndyq týǵyzbaıdy. Al joǵarǵy synyp oqýshylarynyń úıirmeler men seksıalarǵa ýaqyty joq ekeni belgili. Sebebi olardyń barlyq ýaqyty men zeıini joǵarǵy oqý ornyna túsýge daıyndalýǵa ketedi.

Seksıalar men úıirmelerdiń paıdasy:

— Ózine degen senimdiligi artady. Eger bala mektepte ózin jetkilikti deńgeıde kórsete almasa, sabaq oqý qıynǵa túsip, synyptastarymen til tabysa almasa, oǵan ózine unaıtyn jaǵymdy orta qajet. Mundaı jerde bala ortaq qyzyǵýshylyǵy bar dostar tabady.

— Múmkindikterin jetildiredi. Árıne, balańyz birden belgili ánshi nemese sportshy bolmaýy múmkin. Alaıda, izdegen adam qashan da tabady. Súıikti ispen aınalysý — dene men mıdyń shynyǵýyna jaǵymdy áser etedi. Al sporttyq seksıaǵa qatysqan balanyń densaýlyǵy da myǵym bolady.

— Ózge orta men jańa tanystar. Jas ártis, sýretshi nemese dzúdoshy mektepten keıin qyzyǵýshylyǵy bir adamdarmen birge kóńil sergite alady.

— Uqyptylyq pen uıymdastyrýshylyq qasıetterin damytyp, bastaǵan isin sońyna deıin jetkizýdi úırenedi. Qosymsha sabaqtarǵa baratyn balaǵa ýaqytty tıimdi josparlaýdy úırenýge týra keledi. Sebebi súıikti isimen aınalysýǵa, sabaq oqýǵa, serýendeý men úı sharýasyna kómektesý úshin júıeli jospar jasaı bilý mańyzdy. Eger balanyń, rasymen, qyzyǵýshylyǵy bar bolsa, forma ákelýdi de, úıge berilgen tapsyrmany da oryndaýdy umytpaıdy.

Munyń barlyǵy balaǵa ıntellektýaldy, áleýmettik jáne tulǵalyq turǵydan damýǵa talpynys beredi. Jáne de mundaı balalardyń jaman ádetterge jolaýy ekitalaı.

Ókinishke oraı, mektepten tys qosymsha sabaqtardyń kemshilikteri de bar. Olar:

— Balaǵa shamadan tys aýyrtpashylyq túsedi. Eger de oqýshy úı tapsyrmalaryn oryndaýǵa úlgermeı, durys tamaqtanýǵa kóńil bóle almasa, oınaýǵa ýaqyty qalmasa, keı qosymsha sabaqtardan bas tartýǵa týra keledi.

— Ata-anaǵa qosymsha aýyrtpashylyq túsedi. Qarjylyq shyǵyndardy esepke almaǵan kúnniń ózinde, balany mýzykalyq mektepke nemese basqa da qosymsha sabaqtarǵa aparyp-ákelýdiń ózi ýaqyt jumsaýdy talap etedi.

Árıne, birinshi qıyndyqtar týyndaǵan sátten-aq, balanyń qyzyǵýshylyǵy tómendeýi múmkin. Keıde jasóspirim naqty bir qyzyǵýshylyǵyn anyqtaı almaı túrli úıirme aýystyryp jatady. Qandaı da bir qosymshaǵa barýdy talap etý nemese balaǵa erkindik berý — ata-ananyń sanaly tańdaýy. Sebebi, ata-ana ǵana óz balasynyń erekshelikteri men múmkindikterin biledi. Eń bastysy — qosymsha jattyǵýlar balaǵa aýyrtpashylyq ákelmese bolǵany.

bilimland.kz

---