InfoHub Logo

Hromtaý qalasyna saıahat

1. Qala jaıly qysqasha málimet. Hromtaý qalasy oblys ortalyǵy Aqtóbe qalasynan 68 km qashyqtyqta ornalasqan. İrgesi 1940 jyly ken ornynyń ıgerilýine baılanysty jumysshy kenti retinde qalanǵan. Shahar arqyly respýblıkalyq mańyzy bar Qandyaǵash-Altynsarın-Jitiqara-Qostanaı temir joly jáne Qarabutaq-Komsomol-Denısovka-Qostanaı avtomobıl joldary ótedi.

2.Shahardyń ataýy jaıly. 1937 jyly bul óńirge hrom rýdasynyń tabylýyna baılanysty kóptegen ul ókilderi kóship kelip,ornalasty. Keńes Odaǵy kezinde burynǵy tarıhı ataýlary ózgeriske ushyrap,orys tili arqyly qalyptasqan toponımder júıesi paıda bolǵanyn bilemiz. Jerinen hrom keni tabylyp,óndiriletindikten jáne onyń qaldyqtary taý bolyp úıilip jatqandyqtan qala ataýy Hromtaý atanǵan degen derek bar.

3. Qaladaǵy negizgi kásiporyndar.

«Qazhrom» TUK» AQ fılıaly — Dóń taý-ken baıytý kombınaty osynda qala quraýshy kásiporyn retinde belgili. Munda aýdannyń eńbekke qabiletti turǵyndarynyń otyz paıyzdan astamy eńbek etedi. Hromtaýda aldaǵy ýaqytta shaǵyn jáne orta kásipkerlikti damyta túsýdiń múmkindikteri zor. Resmı derekterge súıensek, qazirdiń ózinde munda 122 dúken, 17 restoran men kafe, 10 shashtaraz, 6 notarıýs, 10 dárihana, 7 qoǵamdyq monshalar, sonymen birge tigin jáne aıaq kıim sheberhanalary jumys isteıdi.Qala boıynsha 1300 sharýashylyq júrgizýshi shaǵyn jáne orta kásipkerlik nysandary ornalasqan.

4. Shahardaǵy áleýmettik-mádenı mekemeler.

Qalada jalpy bilim beretin 6 mektep, 1 kásiptik-tehıkalyq mektep, 3 balabaqsha, Kenshiler mádenıet úıi, klýb, poshta, telegraf júıeleri, 100 oryndyq shıpajaı turǵyndarǵa qyzmet etedi.

5.Hromtaý- monoqalalar qataryna oblystan engen jalǵyz qala.

Elimizde tirkelgen 27 monoqalalardyń qataryna Aqtóbe oblysynan jalǵyz Hromtaý qalasy engen. Úkimet monoqalalardy damytý 2012-2020 jyldarǵa arnalǵan baǵdarlamasy boıynsha alǵashqy jyly 38,6 mlrd, keler jyly 43,2 mlrd. teńge qarjy bólse, jyl saıyn onyń kólemi artyp, shaǵyn qalalardyń damýyna serpin berip keledi.

6. Qalanyń damý ereksheligi. Bul turǵyda sóz qozǵaǵanda, onyń mıneraldy-shıkizat resýrstarynyń mol qory men alýan túrliligin atap ótýge bolady. Respýblıka boıynsha óndiriletin hrom men nıkel rýdalarynyń jáne hrom tuzdary men keramıkalyq plıtalardyń 100 paıyzy , temir qorytpalarynyń 40 paıyzy Hromtaýdyń úlesine tıedi.

7. Hromtaýdyń qazirgi tirshilik tynysy. 2018 jyly Dóń taý ken baıytý kombınaty shyǵarǵan hrom ónimi ótken jyldaǵydan 107,1 paıyzǵa artqan . Aýyl sharýashylyǵy ónimderin qaıta óńdeýde «Agrofırma Taý» JSHS 12 aıda óndirilgen sút ónimderiniń kólemi 1460 tonnaǵa jetken . 2018 jyldyń sáýir aıynan bastap «Newmay Keramıka» kompanıasy keramıka óndirý zaýytyn qaıta jańǵyrtý jumystaryn bastaǵan. «Týǵan jerge taǵzym» aksıasynyń aıasynda bilim aleıasy men densaýlyq aleıasy salynyp,halyq ıgiligine qyzmet etýde. Qalada 26 myń 641 adam turady.

---