InfoHub Logo

Táýelsiz Qazaqstannyń elordasy – Astana qalasy. Ol keńbaıtaq Otanymyzdyń júreginde, halqymyz qasıet tutyp, qasterlegen qasıetti Saryarqadaǵy Esil ózeniniń oń jaǵalaýynda ornalasqan. Aýa raıy – shuǵyl kontınentaldy: qańtar aıyndaǵy ortasha temperatýrasy 17,4 gradýs sýyq bolsa, shildede bul kórsetkish 20,3 gradýs jylyǵa deıin kóteriledi. Jyl boıyna orta eseppen 335 mm qar men jańbyr jaýady.

Qalanyń negizi 1832 jyly qalanǵan. Sol jyly patshalyq Reseı Qaraótkel óńirinde Aqmola okrýgtik prıkazyn ashyp, onyń ortalyǵyn Aqmola dep ataý jóninde sheshim qabyldaıdy. Keıin bul áskerı beket okrýgtik qala (1863), ýez ortalyǵy (1868) atandy. 1961 jyly qalanyń aty Selınograd bolyp ózgertildi. 1960-1965 jyldary Aqmola oblysynyń jáne tyń ólkesiniń ortalyqtary boldy. 1992 jyly qalaǵa tarıhı ataýy qaıtaryldy.

1997 jylǵy 10 jeltoqsannan bastap, Aqmola qalasy táýelsiz qazaq memleketiniń astanasyna aınaldy. 1998 jylǵy 6 mamyrda Aqmola ataýy Astana bolyp ózgertildi.

Jańa elorda táýelsizdigimizdiń tiregi, qolǵa alynǵan uly reformalardyń uıytqysy jáne jıyrma birinshi ǵasyrdaǵy jańa eldik bolmysymyzdyń rýhy men beıne-bederin qalyptastyrýshy ortalyqqa aınalýǵa tıis. Onyń baǵyn kótergen táýelsizdik ıdeıasy.

El tórine tý tikken jańa elorda – aıryqsha nyshandyq qubylys. Ony qazaq eliniń óz taǵdyryna degen óz jaýapkershiligin tolyq sezine otyryp qabyldaǵan XX ǵasyrdaǵy asa iri saıası tańdaýy retinde ǵasyr qoltańbasy dep ataýǵa da ábden bolady. Ol XXI ǵasyrǵa álemdegi eń jas elorda bolyp, al tarıhqa – bodandyq buǵaýyn úzgen qazaq eliniń táýelsizdik astanasy bolyp enedi.

Astana – XXI ǵasyr qalasy. Jańa astana taǵdyry jas urpaq taǵdyrymen, jastardyń arman-úmitimen tyǵyz baılanysty.

---