InfoHub Logo

Investısıalyq monetalar qospasyz altyn jáne kúmis syndy asyl metaldardan jasalatyndyqtan óte baǵaly. Bul metaldarǵa degen suranys turaqty bolǵan saıyn olardan jasalǵan monetalar da qymbattaı túsedi. Keıbir sarapshylardyń aıtýynsha, kúmis monetalar altynnan jasalǵandarynan da joǵary paıda ákeledi. Sebebi, baǵalary únemi qubylyp turatyn álemdik naryqta onyń quny tezirek ósedi. Oǵan qosa, kúmis altyn sıaqty asa qymbat emes jáne kópshilikke qoljetimdi. Ony satyp alýǵa tabysy ortasha adamdardyń múmkindigi bar. Sol sebepti kúmisten paıda taýyp otyrǵandar jetip artylady.

Ulttyq Banktiń Óskemende ornalasqan moneta saraıy 3 túrli monetalardy shyǵarady. Alǵashqysy – aınalymdyq, ıaǵnı biz kúndelikti turmysta paıdalanatyn temir aqsha. Al nomınalynan bólek basqa da qundylyǵy erekshe ınvestısıalyq jáne koleksıalyq monetalardy Ulttyq Banktyń bólimshelerinen satyp alǵan durys. Óıtkeni, basqa jerde olar qymbattyraq turady. Satyp alý úshin Ulttyq Banktyń (www.nationalbank.kz) saıty arqyly tapsyrys berip, monetany poshta arqyly alýǵa múmkindik bar. Osy rette eskeretin bir jaıt – qazaqstandyq ınvestısıalyq monetalardy resmı saýdalaǵanda qosymsha qun salyǵy qosylady.

Monetalardyń baǵasy Ulttyq Banktyń ǵalamtor resýrsynda jarıalanyp otyrady. Ony kórý úshin «Ulttyq valúta» degen bólimge kirseńiz boldy. 

Monetalar uzaq merzimdik salyq bolyp esepteledi. Biraq, onyń paıdasy óte zor. Máselen, 1996 jyly shyǵarylǵan bizdiń alǵashqy ınvestısıalyq monetalar 20 jyldyń ishinde altynnyń baǵasymen birge 10 ese qymbattady. Asyl metaldardyń birneshe ret bırjada tómendep ketkenine qaramastan qazirgi tańda ol osyndaı ósim kórsetip otyr. 

Sońǵy ýaqytta turǵyndar tarapynan ınvestısıalyq monetalarǵa degen qyzyǵýshylyqtyń artqanyn baıqaı alamyz. Eń bastysy – Ulttyq Bank sizdiń ınvestısıalyq monetańyzdy kez kelgen ýaqytta ashyq túrde satyp alatynyn este saqtaý qajet, ıaǵnı onyń quny bırjadaǵy asyl metaldyń baǵasy boıynsha esepteledi. Al koleksıalyq monetalarǵa kelsek, onda jaǵdaı basqa. Investısıalyq monetalar asa bezendirýsiz, qarapaıym túrde quıylatyndyqtan olardyń baǵasy tómenirek. Koleksıalyq monetanyń quramynda sondaı kólemde asyl metal bolǵanymen, onyń dızaıny kúrdeli, jumysy joǵary deńgeıde oryndalǵan. Sondyqtan da biz onyń ásemdigi úshin aqsha tóleımiz.

Qaıtadan satyp alýdyń tásiline toqtalsaq, bul proses óte jeńil ótedi. Ol úshin ınvestısıalyq monetany Ulttyq Bankke ákelip ótkizesiz, sosyn ol boıynsha tıisti qujat rásimdelýin kútesiz. Sodan keıin moneta saraptamaǵa jiberilip, túpnusqa ekendigi rastalsa, 10 kún ishinde naryqtaǵy baǵa boıynsha sizge aqsha tólenedi. 

Investısıalyq moneta jaqsy syılyq ta bola alady. Onyń máni de bar. Eger ınvestısıalyq moneta bolsa, ol aqsha salý quraly, al koleksıalyq bolsa, óte ádemi syı retinde qabyldanady. Sebebi, bundaı monetalar óziniń ásemdigi men sapasy úshin búkil álemge áıgili.

Arýjan Serik

---