InfoHub Logo

Bir kúni qaryny jarylardaı toıǵan mysyq, as tarqatý úshin kóshe boılap qydyryp kele jatsa, jolynda terisi qabyrǵalaryna jelimmen japsyryp qoıǵandaı, ashtyqtan buralǵan ıtti kezdestirip qaldy. Úndemeı qasynan ótip ketpekshi edi, ishinen jaqsylyq perishtesi túrtkeninen be beıjaı ótip kete almaı, óziniń qaýipsizdigi úshin sharbaqtyń ústine qarǵyp shyǵyp:

— Qalyń qalaı tórt aıaqtym?

— Óziń týra eki aıaqta júrgendeı aıttyń ǵoı. Suraıtyn nárse tapqan ekensiń? Kórinip turǵan joq pa?

— Kórip turmyn... Kórip turmyn... Jaǵdaıyń máz emes eken!

— Bárin kóre tura ádeıi suraý senderdiń qandaryńda bar osy...

— Baıqamaǵan ekenmin. Senderge kóbirek belgili.

— Ashtyqtan óleıin dep jatqanymdy kórip, sońǵy saparyma mazaqpen attandyraıyn dep pe eń?! Álde, janyń ashyp, as usynaıyn dep pe eń?!

— Endi... Endi... As usynamyn dep aıta almaımyn...

— Onda súıekterińdi shaınap syndyrmaı turǵanda, qarańdy joǵalt!

— Sen bosqa ashýlanyp jatyrsyń... Asyqpa...

— Meniń kúıimde bolsań, asyqpaǵanyńdy kórer em — dep, quıryǵyn kóterip qýalaı jóneldi.

— Qarynyń toıady. Biraq, sál shydaýǵa týra keledi.

— Qaıda tamaq?

— Sen maǵan tıispeýge ýáde berseń, alyp baraıyn...

— Kelistik!

Sóıtip, mysyq jerge syrǵyp tústi de, kóshe basynda ashana ustaıtyn eki aıaqty dosyna alyp bardy. Jańa tanysyn qabyrǵanyń buryshynda qaldyryp, qyzmettik esik aldyna jaqyndap «máý» dep kútýge kiristi. Kirpigin aıqastyrǵansha bolǵan joq, aldynan ashana áleminiń altyn qaqpasy ashylyp, taǵamdardyń qaldyqtaryn kóterip ústi-basy aq mataǵa oralǵan jigit shyqty.

— Sen marǵaý toımaıdy ekensiń. Jeı ǵoı, báribir bosqa ysyrap bolady — dep, jerge qoıyp óz patshalyǵyna oraldy. Tolyq ketkenine kóz jetkizgen ol

— Áı, sen ólip qalǵan joqsyń ba?

— Shyǵa bereıin be?

— Qoryqpaı kele ber — degeni sol edi, qara quıyndaı qasyna jetip taǵamǵa bas saldy.

— Raqmetińdi qarynyń toıǵan soń aıtarsyń — dep, as tarqatý josparyn oryndaýyn jalǵastyrdy.

Ekinshi kúni marǵaýdyń qaryny ashyp kelse, álgi ıt keshegi orynda qarsy aldy.

— Raqmet saǵan. Sen bolmasań kózime shirkeı úımeleýshi me edi...

— Bar bolǵany sol ma?

— Iá, taǵy ne kerek edi...

— Boldyń ba?

— Joq... ne ǵoı... keshegi jaqsylyǵyńdy búgin de... qalaı aıtsam eken...

— Jaraıdy. Kúte tur.

Ótken kúnniń úlgisi boıynsha, dastarhan jaıyldy. Biraq, búgin onyń óziniń de qaryny ashyqannan tarıhı dushpanymen birge dámdes boldy. Ekeýiniń de normasy oryndalyp, jan-jaqqa qydyrýǵa ketti.

Úshinshi kúni ádettegideı jaýaptylyqpen óz ýaqytynda kele jatsa, qarama-qarsy júni jyltyrap ıt kele jatyr.

— Endi kele jatsyń ba? Saǵan da qalǵan bolý kerek! — dedi de, aıaldamaı óz jónimen ketti. Mysyq mán-jaıdy birden túsinse de, túısigine jetkize almady. Ashana aýlasyna barsa, shoshqa qoradan aıyrymy joq. Bári shashylyp jatyr. Arasynan ilip alar as joq. Senarı boıynsha esik aldynda «máý» degeni sol edi, tozaqtyń qara darbazasy ashylyp ishinen sypyrǵysh ushyp shyqty. As jemese de, taıaq jeýge shaq qalǵanda, jany barda, jolyn tapqan marǵaý qashyp úlgerdi.

Tórtinshi kún ıt jánnát mekenge aınaldyrǵan qyzmettik esik aldyna kelip «áýp» degeni sol edi. Oıda joqta, basy jaryldy. Soǵan yzalana burysh-buryshqa jasyrynyp páleniń bárin bastaǵan mysyqty kútti. Biraq onyń tóbesi de kóringen joq.

Óziniń ıiskeý qabilettin iske qosyp, izin sýytpaı taýyp keldi. Mysyq bolsa kesheli beri dám tatpaǵandyqtan bolar, boıyn diril basyp qozǵalýǵa murshasy kelmeı jatyr. It oǵan

— Munyń bári seniń kesiriń! Sen bolmasań basym aman bolýshy edi. Qara, endi ne boldy! Qara deımin!

— Maǵan ne qyl deısiń? — degen sózi aýyzynan zorǵa shyqty.

— Ne qyl deısiń?! Sen ne menimen oınap tursyń ba?!

— Óziń sheship al...

— Men munyń bárin bosqa qaldyrmaımyn! Qazir, kókeńdi tanytamyn!

— Óziń bil...

— Ólimiń meniń qolymnan!

Besinshi kún de týdy. It keshegi sózinde turdy. Ol taǵy da ólmeýdiń qamyn jep, kósheden ótkenderge jaǵympazdanyp as surap júr.

---