InfoHub Logo

Ómir... Sirá, ómir jaıly tolǵanbaǵan, syrly qalamymen jyrlamaǵan aqyn-jazýshy dúnıede joq shyǵar. Talaı ǵasyrdan beri «dúnıe qalaı paıda boldy, adam qalaı jaratyldy, ómirdiń máni nede?» degen suraqtar adamzatty mazalaǵany daýsyz. Ol týraly fılosoftar, ǵalymdar, saıasatkerler bir-birinen erekshelenetin tujyrymdar keltirgen. Mende ózimniń ómirge kózqarasymdy, ómirdiń máni nede ekenin aıta keteıin.

Eshteńeni oılamaı, alańsyz, ýaıymsyz kún keship júrgen balalyq shaǵym. Ájemniń ertegisin tyńdap, atamnyń aqylyn este saqtap, ákeme eliktep, anama erkelep, baýyrlaryma qamqor bolyp júrgen baqytty kezim. Aýyldyń taza aýasyn jutyp, dostarymmen oınap, óristen qaıtqan maldardy tamashalap, kúnniń ystyǵyna qaramaı qyzyq qýyp ketetin shattyqqa toly balalyq shaǵym. Qolyma gúl alyp mekteptiń tabaldyryǵyn  attaǵan qorqynysh pen qyzyqqa toly sát, synyptastarymmen jarysyp, muǵalimniń tálimin alyp, bilim qýǵan kez. Bári ótkenniń enshisinde. Qaıta aınalyp kelmeıdi. Óıtkeni, bul ómir. Al, «ómir» degen ne? Birinshiden, toqtaýsyz zymyrap jatqan altyn ýaqyt. Ekinshiden, kúndelikti kúıbeń tirshilik. Úshinshiden, otbasy, mektep, jumysty oılap ótip jatqan kúniń... Sizdiń ómirińiz qalaı ótýde? Osy jasyńyzǵa deıin istegen isterińiz, ýaqytyńyzdy qalaı jumsap jatqanyńyz jaıly oılanasyz ba?

Adam adam bolyp jaratylǵannan beri biraz ýaqyt ótti. Sol ýaqyt aralyǵynda adamzat soǵys, jut, tabıǵı apat jáne basqa da qıynshylyqtardy basynan ótkizdi. Óz qoldarymen jasalǵan áreket qanshama. Osydan kim qandaı paıda kórdi? Olar úshin ómirdiń máni nede?

Adamdardyń armandary, maqsattary, qalaýlary ár túrli bolady. Bireýi – baı bolsam, meniń atymdy dúnıejúzi bilse eken, ekinshisi – adamdarǵa qalaı kómek kórsetsem, olardy taza jolǵa túsirsem eken dese, úshinshisi – tek bir sáttik lázatty izdep, oıyn-saýyqtan qýanysh tabady. Olar úshin ómirdiń máni osylar. Jáne ózderiniń arman-maqsattaryna jetkennen keıin rıza bolyp, qanaǵattanbaıdy. Ne sebepti? Siz sol jaıynda oılanyp kórdińiz be?

Sizge «ómirdiń máni nede?» dep suraq qoısa mindetti túrde oılanasyz. Es bilgen kezińizden qazirgi shaqqa deıingi ómirińizdi tizbektep oı eleginen ótkizip shyǵasyz. Jibergen qatelik, ótkizip alǵan múmkinshilikke ókinesiz, shynaıy qýanǵan, baqyttan gúldeı jaınaǵan kezderdi saǵynasyz, alǵash ǵashyq bolyp, mahabbattyń arbaýyna baılanǵan baldaı tátti sátterdi ańsaısyz. Sodan keıin ómirdiń mánin túsinesiz. Ol siz úshin qatelikter jibergen ótken ómirińiz jáne sol qatelikterden sabaq alǵan búgingi ómirińiz bolýy múmkin. Eń bastysy, otbasy jáne dostaryńyzdyń ortasynda ótken árbir saǵat, mınýtyńyz.

Al, men úshin ómirdiń máni – otbasym, janyma jaqyn dostarymnyń amandyǵy, elimniń tynyshtyǵy men beıbitshiligi. Meniń qalaýymnan tys zýlap jatqan ómirimde ókinbeıtin, eske alsam jymıyp kúletin baqytqa toly sátter kóp. Adamǵa ómir súrýge bir ǵana múmkindik berilgen. Kózdi ashyp jumǵansha zymyraıtyn múmkindik. Qur erinshektik qylyp jatpaı, búgingi isti erteńge qaldyrmaı eńbek etý kerek jáne bilimińdi odan saıyn jetildirip, ıgi ister jasap, ókinbeıtin ǵumyrly ómir súrý kerek.

 

---