InfoHub Logo

Maqsat. Qyran qus ushar shyńynyń eń bıigine jetkende qanatyn aıqara jaıady. Qasqyr otarǵa shapqanda, búkil qoıdyń birazyn baýyzdap, aınalany qyzyl qan qylyp, qyryp salyp, ishinen bireýin tańdap jeıdi. Al, adam she? Adam maqsatqa jetkende qalaı raqattanady? Maqsatqa jetkendegi jeńis dámi qanshalyqty tátti? Nelikten qınalyp qol jetkizgen tabys janyńa jaqynyraq, basqa jetistikterden mańyzdyraq bolady? Mysaly, men bıyl toǵyzynshy oqý jylyn bastadym. Bıylǵy oqý jylyn baıqaýmen bastaý meniń qysqa merzimdi maqsatym nemese qysqa dıstansıadaǵy marafonym. Ómir adamdy jarysta ǵana ósire me? Álde tabysqa jetý degen - kúshtiligińdi, eptiligińdi, qabilet - darynyńdy, tipti múmkindigińdi kórsetetin meje me? Dál solaı sıaqty kóremin. Endeshe, ár maqsattyń óz shyńy, oǵan jetýdiń óz joly bolatyny anyq. Eńbekpen jetken jeńis – Han Táńiri de, kómekpen, demeýmen, ıtermeleýmen qolǵa júsirgen tabys – jaı ǵana qońyr tóbe. Meniń osy jyldarda tyndyrǵan isterim – ózim úshin, eńbek etip júrgen ortam úshin qandaı da bir tabysqa qol jetkizgendigimniń nátıjesi. Men budan qandaı lázzat aldym? Óstim, bul – anyq. Biraq adam qalpymdy qanshalyqty saqtaı alamyn? Endi «bárin bildim, úırendim, toldym»,- demeımin be? Jeńistiń tátti dámine masaırap ketken adamdar jaıynda estip, kınodan kórip, ǵalamtordan tanyp júrmin. Bul baıqaý muǵalimge ne úshin kerek dersiz? Ózim úshin! Ne istep júrgenimdi ózim bilmeıtin, qur statısıka qurbany bolyp júrgen ýaqyttarda boldy. Ýaqyttan da uıalý qajet. Meniń qazirgi maqsatym – ózimdi-ózim jetildirip, aldymda otyrǵan Qazaqstannyń bolashaq jastaryn adamı qasıetterge ıe azamat(sha) qylyp tárbıelep shyǵarý. Ár jıyrma tórt saǵatynyń on saǵaty uıqyǵa ketse, segiz saǵaty, ıaǵnı ýaqytynyń kóp bóligi meniń janymda júretin jandar úshin jaýapkershilikten nege qashamyn? Ózgeni tárbıelep, oqytý úshin men ózimdi tanyp, óz maqsatym aıqyn bolýy qajet. Sonda ǵana naqty jetistikke jetemin. Maqsaty aıqyn shákirt tárbıeleı alamyn. Ózim jańashyl bolsam ǵana jańartylǵan bilim bere alamyn. Keshegi án keshinde Ulyqpan Joldasovtyń «Súıýdi bilmeıtin adamdar osyn-aý ómirde nesi bar» degen án joldaryna eleń ete qaldym. Iá, men Ómirdi súıemin, ózimdi de, ózgeni de súıemin, jumysty da súıemin jáne sodan raqat tabamyn. Ótirik emes. Men osydan 5-6 jyl buryn ómirdi men jumysty súıý týraly múlde basqasha oılaıtynmyn, ózim de basqa edim. Qázir maqsatyma jetip, shabyttanyp, odan ári raqattanamyn.

---