InfoHub Logo

Áýestik, ınovasıa jáne sıqyr týraly... 

1. «Nege?» degen suraqty jıirek qoıyp turyńyz

Balalaryńyz bar bolsa nemese olarmen kóp sóılesetin bolsańyz (nemese ózińizdiń kishkentaı kezińiz esińizde bolsa), balalardyń eń súıikti suraǵy — «Nege?» ekenin álbette bilersiz. Eresekter ol suraqty áldeqaıda sırek qoıady. Biz aıǵaqtar men baıypty derekterge júginýge úırenip alǵanbyz, bul jaqsy. Biraq bizdiń básekelesterimiz de dál sol aqparatty biledi. Bundaı jaǵdaıda kóbirek nársege qol jetkizý úshin bıznes-strategıany qalaı qurǵan jón? «Nege?» degen suraqty jıirek qoıa berińiz.  

Mysal retinde adamnyń bir meıramhanaǵa ne úshin jıi bara beretinin taldap kóreıik:  

► Siz nege súıikti meıramhanańyzǵa bara beresiz? — Ol yńǵaıly jerde ornalasqan, oǵan qosa tamaqtary sapaly.  

► Bul taǵam sizge nege unaıdy? — Ol dámdi, qymbat emes.  

► Sonda da, mańaıda uqsas oryndar kóp bolsa da, siz nege dál osy meıramhanaǵa baryp júrsiz? — Bul jerdiń qyzmeti jaqsy.   

► Sizge bul jerdiń qyzmeti nege unaıdy? — Jaqsy syılaıtyndary sondaı, kóńilim jaılanyp shyǵa keledi.  

► Bulaı syılaǵannan nege kóńilińiz jaılanady? — Meıramhana menejeri adamnyń atyn esinde saqtap, kúlip qarsy alady. Daıashylar eshqashan asyqtyrmaıdy jáne shyn kóńilimen kúnniń qalaı ótkenin suraıdy. Keıbireýleri tipti ádette qandaı taǵamǵa tapsyrys beretinimdi de biledi.

► Bul nege sizdi qaıta-qaıta osy meıremhanaǵa bara berýge májbúrleıdi? — Bul jerde ózimdi otbasy múshesindeı sezinemin, bul qazirgi kezde óte sırek bolatyn jaǵdaı.   

Qaıta-qaıta suraq qoıa otyryp, mekemege degen kóńil burýshylyqtyń sebebi naqty bir taǵamdar men olardyń baǵasynda ǵana emes, sondaı-aq sol jerde ózińdi qalaı sezinetinińe de baılanysty ekenin baıqadyq. Qaı salada jumys istep júrseńiz de, siz úshin klıentterińiz ben olardyń qandaı sezimde bolatyny bárinen de mańyzdy bolýy tıis. Sonymen qatar «Nege?» degen suraq klıentterińizdi jaqsyraq túsinip alýyńyzǵa sep bolady.  

2. Mıyńyzdyń álfa-tolqyndaryn iske qosyńyz  

«Eger jańa yntalar paıda bolmasa, jańa ıdeıalar da bolmaıdy», — dep Walt Disney Company ınovasıalar jáne shyǵarmashylyq bóliminiń burynǵy basshysy Dýnkan Ýordl (Duncan Wardle) áldeneshe ret aıtqan. Shynymen de solaı. Únemi bir nárseni isteı berip, siz ózińizdi jańa birdeńe oılap tabý múmkindiginen aıyrasyz.  

Ózińizdiń ádet bolyp qalǵan kún tártibin ózgertip, mıyńyzdyń álfa-yrǵaǵyn iske qosýǵa tyrysyp kórińiz. Mı tolqyndarynyń bul túri tynysh jaǵdaıdaǵy sergektik kúıde paıda bolady. Ǵalymdar olardyń (álfa-tolqyndardyń) joǵary deńgeıli kreatıvtilikpen baılanysty ekenin dáleldedi. 

Biz bosańsyp, erkin júrgen kezde: vanada, serýendep júrgende, medıtasıa nemese jattyǵý jasaý kezinde basymyzǵa keremet ıdeıalar qonaqtaıdy.  

Jumys kúni ishinde álfa-yrǵaqqa ený bylaı tursyn, tynysh otyryp bir dem alýdyń ózine ýaqyt bolmaı qalyp jatady. Bundaı jaǵdaıdy ózgertýge tyrysyńyz. Mysaly, Google kompanıasynyń qyzmetkerleri ýaqyttarynyń 20% oılanyp-tolǵanýǵa jumsaı alady, osynyń arqasynda Gmail, AdSense jáne «Google jańalyqtar» paıda boldy.  

Álfa-tolqyndardy qoldanýǵa bolatyn jumys jaǵdaıyn jasańyz. Mysaly, komandanyń búkil músheleriniń jınalysyn birlesip isteletin jattyǵýǵa nemese medıtasıaǵa aýystyryńyz. Eger bul siz úshin asyra silteý bolyp tabylsa, jınalys kezinde mýzyka oınatyp qoısańyz bolady. Sondaı-aq jınalystardy resmı túrinen góri jaı áńgimelesý retinde ótkizip kórińiz.   

3. Ár adamnyń shyǵarmashylyq turǵyda áleýeti zor ekenin este ustańyz  

Shyǵarmashylyq — tek «kreatıvshilerdiń» quzyreti dep biletin basshylar jıi qatelesip jatady. Biraq bundaı áleýet árkimde de bar. Jasampazdyq áleýetiniń kózi ashylýy úshin qolaıly jaǵdaı týdyrý qajet.  

►Keńse dızaınyn ózgertip tastańyz. Ár-alýan bólimderde isteıtin adamdar bir birimen kezdeısoq jolyǵyp qalyp, áńgimelesip kete alatyndaı etip jumys ornyn quryńyz. Dál osyndaı aıaqasty bolǵan áńgimeler kezinde jańa ıdeıalar óte jıi paıda bolyp jatady.  

►«Jaqsy» ıdeıanyń túsinigin ózgertińiz. Bir qaraǵanda qansha jerden aqylǵa qonbaıtyn bolyp kórinse de, jurttyń usynǵanyn keri ysyra bermeńiz. Adamnyń qazirgi aıtyp turǵan ıdeıasy nasharlaý bolsa da, kelesi ıdeıasy keremet ıdeıa bolyp shyǵýy múmkin. Onyń ıdeıalaryn salǵan jerden synap tastaı berseńiz, kelesi joly ol oıyndaǵysyn aıtpaı qoıýy múmkin.  

►Paıymdaý túrin ózgertińiz. Basshylyq nemese kreatıvtik bólim komandadaǵy basqa adamdardan shyǵarmashylyq turǵysynda artyq dep oılaýdyń jóni joq. Kompanıada bir birine septesý, qoldaý mádenıeti damyǵan, al adamdar bir birin teń kóretin bolsa, qyzmetkerlerdiń áleýeti arta túsedi.  

Tehnologıa + Kreatıv = Syıqyr

Jasandy ıntellekttiń damýyna baılanysty mıllıondaǵan jumys oryndary avtomattandyrylady. Biraq kreatıvtiliktiń quny arta beredi. Bul sizdiń brendińizdiń sýyrylyp alǵa shyǵýy úshin ǵana emes, sondaı-aq keıin basqalarǵa jem bolmaýy úshin de qajetti ıngredıent.  

Qazirgi óz komandańyzdyń tapqyrlyǵyn barynsha qoldap, bolashaqta barlyǵyńyz birlesip óz syıqyrlaryńyzdy jasaý úshin komandańyzǵa ınvestısıa salatyn ýaqyt. Ýolt Dısneı aıtpaqshy: «Jospar jasaı berýge nemese álemdegi eń ǵajaıyp jerdi túzýge bolady. Biraq armandy aqıqatqa aınaldyrý úshin adam qajet». 

Oqýǵa keńes beremiz:

Ýolt Dısneı jetistiginiń tarıhy

---