InfoHub Logo

قازاقستاندا جىل سايىن 1- مامىردا قازاقستان حالقىنىڭ بىرلىگى كۇنى اتاپ وتىلەدى. بۇل مەرەكەنىڭ باستاۋى 1996 جىلدان باستالعان. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ قابىلداعان جارلىعى بويىنشا 1 مامىر  - قازاقستان حالقىنىڭ بىرلىگى كۇنى دەپ جاريالاندى. قازاقتىڭ كەڭ بايتاق دالاسىندا قازىرگى تاڭدا 130-دان استام ۇلت وكىلدەرى بىرلىكتە، تاتۋلىقتا عۇمىر كەشۋدە. جىل سايىن تويلاناتىن بىرلىك كۇنىنىڭ ماقساتى - ەلىمىزدەگى ءتۇرلى ۇلت پەن ءدىن وكىلدەرىنىڭ بىر-بىرىنە دەگەن سىي-قۇرمەتى مەن تاتۋلىقتى، بىرلىكتى ارتتىرۋ بولىپ تابىلادى. اتالعان مەرەكە كۇنى قازاقستان اۋماعىندا تۇرىپ جاتقان ۇلت پەن ۇلىس وكىلدەرى ءتاتۋ-تاتتى، بەرەكە مەن بىرلىكتە، بەيبىتشىلىك پەن ىنتىماقتا ءومىر ءسۇرىپ جاتقاندىعىن اتاپ وتەدى. قازاقستاندا قازىرگى تاڭدا ءاربىر ۇلتتىڭ سالت-داستۇرلەرىن جاڭعىرتۋعا، مادەنيەتىن ىلگەرىلەتۋگە ءتۇرلى جاعدايلار جاسالعان. نەگىزىنەن ءبىر مەملەكەتتە وسىنشا كوپ ۇلت وكىلدەرىنىڭ ءتاتۋ-تاتتى ءومىر ءسۇرۋى ىنتىماقتى، توزىمدىلىكتى تالاپ ەتەدى. سول سەبەپتەندە بۇل كۇننىڭ ماڭىزى زور. بۇل مەيرامدا قازاقستان رەسپۋبليكاسىندا تۇراتىن حالىقتاردى بىرلىككە، ىنتىماققا تاربيەلەيتىن مەرەكەلىك ءىس-شارالار وتكىزىلەدى. بۇل مەرەكەنى جوعارعى دەڭگەيدە اتاپ ءوتۋ ءۇشىن ءارتۇرلى مادەني ورتالىقتار جۇمىلدىرىلادى. ونداعى ولاردىڭ ماقساتى -قازاقستان حالقىن وزگە حالىقتاردىڭ داستۇرلەرىمەن تانىستىرۋ بولىپ تابىلادى. مەيرامعا ەڭبەك ۇجىمدارى، ستۋدەنتتەر، ءارتۇرلى قوعامدىق بىرلەستىكتەردىڭ وكىلدەرى بەلسەنە اتسالىسادى. سونىمەن قاتار 1- مامىر كۇنى ءتۇرلى مادەني كورمەلەر ۇيىمداستىرىلادى. ءار ۇلتتىڭ تاعامدارىنان ءدام تاتىپ، ۇلتتىق كيىمدەرىن تاماشالاۋعا مۇمكىندىك الامىز. مەيرام حالىقتى ەلىمىزدە ءومىر ءسۇرىپ جاتقان وزگە ۇلتتاردىڭ داستۇرلەرىمەن تانىستىرىپ، ۇلتتار اراسىنداعى بىرلىكتى نىعايتۋعا اسەرىن تيگىزەدى.

 

---